10
Yesu iŋgin ataam to sirsiir
1 Yesu isaav muul ighaze: “Onoon kat, you nasaav payam: Tamtoghon to ighaze ilooŋ ila sirsiir to sipsip, ye irau itaghon ataam, ve ilooŋ ila. Ve ighaze tamtoghon eta itaghon ataam maau, ve imalaaŋ pa sirsiir ve ilooŋ ila, nene ye yubyub ve ŋgeu to ighaze iwaghamun sipsip.
2 Eemoghon ŋgeu to itaghon ataam to sirsiir, ve ilooŋ ila, nene ye ŋginiiŋ tau to sipsip.
3 Tovenen ŋginiiŋa to ataam to sirsiir pale ikaak ataam pani, ve ye ilooŋ ila. Yes sipsip toni tighilaal aliŋa. Tovenen ye ipoipoi eŋaeŋa izadi, ve ighereb di tivot tila.
4 Ighaze iyou di tisob tivot tila pumuri, ye pale imuuŋ padi, ve tikeet taghoni, ve yesŋa tilaagh tila. Pasa, tighilaal aliŋa.
5 Eemoghon ighaze ŋgeu ite paam ipoi di, nene irau titaghoni maau. Pale tighau pani. Pasa, tighilaal aliŋa maau.”
6 Yesu isavia saveeŋ palelaaŋ tonene padi, eemoghon yes to tiloŋlooŋ saveeŋ toni, tighilaal pughu maau.
7 Tovenen ye isaav padi muul ighaze: “Onoon kat, you nasaav payam. Ataam to sirsiir to sipsip tivotvot ve tiloŋlooŋ pani, nene you taug.
8 Tamtoghon tisob to timuuŋ payou ve tinim, yes yubyubŋa, ve ndiran to tiwaghamun sipsip.
Eemoghon sipsip tilooŋ aliŋadi maau.
9 You taug to ataam to sirsiir. Tovenen ighaze tamtoghon eta iŋarua ghou inim, ve ilooŋ ila sirsiir lolo, nene pale you nagham mulini ve ineep pooi. Ve ye pale ivotvot ve iloŋlooŋ, leso igham a aniiŋ popoia. Yo 14:6; Ep 2:18; Hib 10:19
10 Ŋgeu yubyub, ye inim pa iwaghamun sipsip moghon. Ye iyubyub di, ireureu di, ve irabrab di timatmaat. Eemoghon you nanim pa nagham sipsip tiou tineep poia le poia kat.
Yesu, ye ŋginiiŋ poia to sipsip
11 “You taug to ŋginiiŋa poia to sipsip. Pasa, ŋginiiŋa poia, ye ipul tau kat pa sipsip toni. Mbo 23:1; Ezek 34:8+; Yo 15:13; Hib 13;20; Syg 7:17
12-13 Eemoghon ŋgeu to iŋgin sipsip to tamtoghon ite, ye ŋginiiŋ tau to sipsip maau. Ighamgham uraat pa le atia moghon. Tovenen ye pale ighur lolo pa sipsip kat maau. Pasa, ye sipsip tama maau. Ighaze ighita ŋgavuun sagsag eta inim, nene pale ipul sipsip tineep, ve ighau. Tovenen ŋgavuun sagsag pale ighan di, ve ireu di timbiriis.
14-15 “You taug to ŋginiiŋ poia to sipsip. You nawatag sipsip tiou, ve yes tiwatag ghou, inimale you nawatag Tamaŋ Maaron, ve ye iwatag ghou. Ve you pale napul taug namaat pa sipsip tiou. Leso nagham mulin di ve tineep pooi. Mt 11:27; 2Tim 2:19; 1Pe 2:25; 1Yo 3:16
16 Eemoghon you leg sipsip pida paam.
Yes to sirsiir tonene maau. You leg uraat to nayou di tinim titaghon ghou paam. Yes pale tilooŋ aliŋag, ve yesŋa sipsip tiou pida tilup di tinim lupuuŋ ee moghon, ve ledi ŋginiiŋ ee moghon. Yo 11:51+; Mbaŋ 10:34; Ep 2:11+
17 “Tamaŋ Maaron lolo payou kat. Pasa, you pale napul taug namaat. Leso namundig pa mateeŋ ve naneep matag iyaryaar muul. Pil 2:8+
18 Tamtoghon eta to taan irau irab ghou namaat sorok ne maau. Nayokia taug, ghoro tirab ghou namaat. Pasa, you tapirig irau nayokia taug namaat, ve tapirig irau namundig matag iyaryaar muul, itaghon saveeŋ to Tamaŋ isavia payou.”
19 Yes Yuda tilooŋ saveeŋ toni tonene, le tivalag di muul.
20 Tauto todi katindi tighaze: “Ŋgeu tonene, talooŋ saveeŋ toni pasa? Ye avuvu samia izeeva, tauto ŋgar toni iwaghamgham.” Yo 8:48,52
21 Eemoghon tamtoghon pida tisaav tighaze: “Ŋgeu to ighaze avuvu samia izeeva, nene irau isavia saveeŋ tovene maau. Ve aghita. Avuvu samia eta irau igharaat tamtoghon mata pisi ve ighita ndug? Maau.” Yo 9:32+
Yes Yuda tighur koi pa Yesu, ve tighaze tirabi pa yaam
22 Tinepneep le sawa to lupuuŋ tiina ite to yes Yuda ivot. Nene lupuuŋ to matadi iŋgal sawa to tigharaat mulin Rumai Tiina, ve tighuri inim Maaron le. Sawa to lupuuŋ tonowen, nene sawa to ndug yauŋa.
23 Yesu ilaghlaagh ila ruum to nepooŋ to Solomon ireii ila Rumai Tiina dige ne lolo,
24 ve daba pida to yes Yuda tila tiluvuti, ve tisaav pani tighaze: “Yei nikaria saŋaniiŋ ghom wa. Pale ŋeez o uvotia taum? Ighaze onoon yom Mesia, ghoro usaav ghazooŋa payei!”
25-26 Yesu ipamuul aliŋadi ighaze: “You nasaav payam wa. Eemoghon yam aghur ila saveeŋ tiou maau. Uraat naol to naghamgham di ila Tamaŋ iza, nene tipariaaŋ saveeŋ tiou. Eemoghon yam sipsip tiou maau, tauto aghur inim tiou maau. Yo 5:36, 8:47, 14:11; 1Yo 4:6
27 Sipsip tiou, nene yes to tiloŋlooŋ aliŋag. You nawatag di tisob, ve yes titaghon ghou.
28 You nagham ledi nepooŋ poia to iseŋseeŋga taghoni gha ila. Tovenen yes irau timaat ve tilaledi ne maau. Pale tineep le alok. Ve tamtoghon eta irau isad di ila nimag maau. Yo 6:39; Ro 8:38+; 2Tes 3:3
29 Pasa, Tamaŋ to ighur di tinim leg ne, tapiri ilib pa mbeb tisob. Tovenen tamtoghon eta irau isad di ila ye nima ne maau.
30 You ve Tamaŋ, yeru ee moghon.” Yo 1:1, 17:11,21+
31 Yes Yuda tilooŋ saveeŋ toni tonene, ve timundig tigham yaam, ve tighaze tirabi imaat pataghaaŋ. Yo 8:59
32 Tovenen Yesu ighason di ighaze: “You nagham uraat popoia naol ila matamim itaghon ŋgar to Tamaŋ. Sa uraat isosor, to aghaze arab ghou pa yaam?”
33 Yes tipamuul aliŋa tighaze: “Yei nighaze nirab ghom umaat pa uraat popoia to ugham di ne maau. Nighaze nirab ghom umaat pasa, yom tamtoghon sorok to taan. Eemoghon upakur taum ughaze yamru Maaron raratemim. Tovenen yom uveleg Maaron ve uwaghamun iza.” Wkp 24:16; Mt 26:65; Yo 5:18
34-35 Yesu isaav padi muul ighaze: “Yam awatag maau? Saveeŋ waaro eez to ineep ila tutuuŋ tiam isaav tovene: Maaron isaav pa daba pida ighaze: ‘You nasaav payam: yam ndimaronŋa.’ Daba tonowen, yes tamtoghon to taan. Eemoghon Maaron aliŋa to iŋarua di, nene iwaat di ighaze yes ndimaronŋa. Ve iit tawatag: Maaron aliŋa to timbooda wa, nene irau toraaŋi maau. Ineep tovene. Mbo 82:6; Mt 5:18
36 Eemoghon you, Tamaŋ Maaron ighur ghou pa nagham uraat patabuaŋ tonene, ve imbaaŋ ghou nazi nanim taan. Tovenen ighaze nawaat taug naghaze you Maaron Natu, pughu vena to aghaze you naveleg Maaron ve nawaghamun iza?
37 Ighaze you nagham Tamaŋ uraat toni maau, yam aghur inim tiou malep.
38 Eemoghon ighaze naghamgham uraat toni, yam irau aghur inim tiou. Tovenen ighaze saveeŋ tiou igham gham aghur ila maau, aghita uraat to naghamgham di ne, ve aghur ila. Leso ŋgar tiam ivot, ve aghilaal aghaze: You naneep ila to Tamaŋ, ve Tamaŋ ineep inim tiou.” Yo 14:10+, 17:21
39 Yes Yuda tilooŋ saveeŋ toni tonene, ve titoova pa tikisi muul. Eemoghon ye ighau padi ila.
40 Ilaagh ila imbut ya Yordan, ve ila ivot muul ndug to muuŋ Yoan ineep pani ve irurughuuz tamtoghon. Yesu inepneep tonowe,
41 ve ival tiina tila tivot toni, ve tiwasavon di tighaze: “Yoan igham mbeb gharatooŋa eta maau. Eemoghon saveeŋ isob to ye isavia pa ŋgeu tonene, nene onoon moghon.”
42 Tovenen tamtoghon katindi to tinepneep tonowe, tighur ila toni.