119
Suŋuuŋ to tamtoghon to ighur lolo kat pa Maaron aliŋa
Tataghon Maaron saveeŋ toni, ghoro poia toni iza toit
Yes to tighamgham sosor maau, ve laghooŋ todi deŋia moghon itaghon saveeŋ to Yoova, nene pale poia toni izaza todi ve tinidi iza.
 
2-3 Yes to matadi kisin ataam to Maaron ighuri pa tamtoghon toni ve titaghoni,
ve tighur lolodi kat pa Maaron, ve tizuaria di leso tiwatagi kat,
ve tighamgham sosor maau,
ve laghooŋ todi, titaghon ataam to Maaron, nene pale poia to Maaron iza todi ve lolodi poia kat. Yo 14:21+; Mbaŋ 24:16; 1Tim 1:5
 
Yoova, yom ughaze nitaghon tutuuŋ tiom eŋaeŋa ŋgara le nitaghoni kat.
 
Tutuuŋ tiom to tineep pataghaaŋ, ŋgar tiou iyaryaaŋ naghaze le nataghon katin di.
 
Pasa, ighaze matag iŋgal tutuuŋ tiom tisob,
nene irau mayag ila ival tiina matadi maau.
 
Ataam tiom to gabizooŋ mbeb, nene deŋia moghon. Ighaze upatooŋ ghou pani,
nene pale lolog poia payom, ve napait ghom toman lolog ŋgalaaŋa.
 
Tutuuŋ tiom naol to tineep pataghaaŋ, you pale matag kisin di, ve nataghon di irau sawa isob. Tovenen upul murim payou malep.
Tagham ŋgar poia ila to Maaron
 
Ighaze pain paghu eta lolo pa laghooŋ toni iŋgalaaŋ ila matam, pale igham sa?
Ye irau mata iŋgal aliŋam ve itaghoni.
 
10 You naghur lolog payom kat, ve nazuaria ghou naghaze le nawatag katin ghom.
Tovenen upul ghou nayel pa tutuuŋ tiom malep.
 
11 You naghita aliŋam naghaze nene mbeb tau. Tovenen naghur poiani ineep ila lolog.
Leso ipalot ghou, ve nagham sosor payom sob.
 
12 O Yoova, you napait ghom pa poia tiom.
Upaghazoŋan ghou pa tutuuŋ tiom naol to tineep pataghaaŋ.
 
13 Tutuuŋ tiom naol to yom uvotia di, you pale nasavia di le tisob.
 
14 Ataam to yom ughuri payei, sawa to nataghoni, nene igham lolog poia kat, nanimale yes to tipakur di pa mbaliiŋ to taan.
 
15 Matag itaghon tutuuŋ tiom eŋaeŋa ŋgara naghaze le naghazooŋ padi.
Ve matag iŋgalŋgal ataam tiom irau sawa isob.
 
16 Tutuuŋ tiom naol to tineep pataghaaŋ, tigham lolog poia le poia kat.
Irau lolog imaagh pa aliŋam maau.
Maaron aliŋa ipalot ghiit, leso tayoon ariaŋa pa badooŋ pataŋani
 
17 O Yoova, you mbesooŋa tiom. Upatooŋ poia tiom payou.
Leso naneep pooi, ve nataghon aliŋam irau sawa isob.
 
18 Upaghazoŋan ŋgar tiou, leso naghilaal ŋgar popoia naol to tineep ila saveeŋ tiom lolo.
 
19 Taan tonene, nene ndug tiou kat maau. You naneep nanim loom pani moghon.
Tovenen ugham ghou naghazooŋ pa tutuuŋ tiom naol ŋgara. Pil 3:20; Hib 11:13
 
20 Moghon moghon, you lolog naghaze le upatooŋ ghou pa ataam tiom to gabizooŋ mbeb, ghoro poia!
 
21 Yes to tipapait taudi ve tiveleg ghom, yom uyaan di, ve mbalmbali tiom izaza todi.
Pasa, tiyel pa tutuuŋ tiom.
 
22 Ve you, ghoro matag kisin ataam to yom ughuri payei, ve nataghoni irau sawa isob.
Tovenen saveeŋ velegiiŋ ve mayaŋiiŋa to tipiyaav di payou ne, yom upaghau di payou.
 
23 Yes daba to tighamgham pooz ne paam, tilup di, ve tikalkaal ataam tighaze tiwaghamun ghou.
Eemoghon you mbesooŋa tiom. Pale matag itaghon tutuuŋ tiom naol to tineep pataghaaŋ, ve nagham ŋgar padi pooi.
 
24 Ataam to yom ughuri payei, nene igham lolog poia le poia kat.
Ve ipasaluŋgan ghou, leso nawatag sa ŋgar to pale nataghoni.
Taghur lolood pa saveeŋ onoon ve tataghoni
 
25 You tapirig isob, ve rismoghon tone namaat ve nagheen ila ghavuur.
Upamundigin ghou, ve ugham tapirig ivot muul itaghon saveeŋ tiom.
 
26 Ŋgar naol to naghamgham di ne, you navotia di payom. Tauto ulooŋ suŋuuŋ tiou, ve uul ghou.
Upaghazoŋan ghou pa tutuuŋ tiom naol to tineep pataghaaŋ.
 
27 Tutuuŋ naol to yom ughur di, upatooŋ ghou pa ataam to nataghon di.
Ve you pale matag itaghon uraat tiom gharatooŋadi, ve nagham ŋgar padi pooi.
 
28 You lolog ipataŋan le tapirig isob.
Upalot ghou itaghon saveeŋ mbuaaŋ tiom.
 
29 Uul ghou pa naneep saguan pa ŋgar kaarom.
Saveeŋ tiom, nene inim ataam pa poia tiom iza tiou.
 
30 You lolog ighur naghaze you pale nataghon ataam to saveeŋ onoon.
Ve matag iŋgalŋgal ataam tiom to gabizooŋ mbeb.
 
31 O Yoova, ataam to yom ughuri payei, you nakisi ineep tuŋia ila lolog.
Tovenen upul ghou malep! Pa vene, mayag.
 
32 Yom upatooŋ ghou pa mbeb katindi.
Tauto tinig iza pa nataghon ataam to tutuuŋ tiom.
Taghason Maaron pa ipatooŋ ghiit pa tutuuŋ toni
 
33 O Yoova, tutuuŋ tiom naol to tineep pataghaaŋ, upatooŋ ghou pa ataam to nataghon di.
Leso matag kisin di, ve nataghon di ila ila le sawa tiou isob.
 
34 Upaghazoŋan ghou pa saveeŋ tiom ŋgara.
Leso matag kisini, ve nataghoni toman lolog irau sawa isob.
 
35 Umuuŋ ve upatooŋ ataam payou, leso nataghon tutuuŋ tiom.
Pasa, ataam tonenen to igham lolog poia le poia kat.
 
36 Upamundigin lolog, leso nataghon ataam to yom ughuri payei, ve nagham ŋgar pa ndouŋ leg mbaliiŋ to taan sob. Lu 12:13+; 1Tim 6:9+
 
37 Upaghau matag pa mbeb soroksorok to taan to anoŋadi maau ne,
ve upalot ghou pa nataghon ataam tiom. Leso naneep matag iyaryaar.
 
38 You mbesooŋa tiom. Tovenen matam iŋgal saveeŋ mbuaaŋ tiom, ve ugham anoŋa ivot payou.
Saveeŋ tiom tonenen iŋarua tamtoghon tisob to timatughez payom ve titaghon ŋgar tiom.
 
39 Saveeŋ samia to koiagŋa tipiyaava payou, nene igham ghou namatughez. Pasa, ighaze tamtoghon tighur ila saveeŋ todi tonowen, nene pale mayag.
Tovenen utatan saveeŋ todi, leso tamtoghon tighur ila sob.
Pasa, ataam tiom to gabizooŋ tamtoghon, nene deŋia moghon.
 
40 O Yoova, you naghaze nataghon tutuuŋ tisob to yom ughur di.
Tovenen utaghon ŋgar tiom deŋia, ve ugham ghou naneep matag iyaryaar.
Maaron aliŋa ipariaaŋ ghiit pa taghur ila toni
 
41 O Yoova, you nawatag: Yom lolom ineep tuŋia ila to tamtoghon tiom ve uluul di. Upatooŋ ŋgar tonanan payou paam, ghoro poia.
Tovenen ugham mulin ghou pa pataŋani tiou itaghon saveeŋ mbuaaŋ tiom.
 
42 Leso you irau napamuul saveeŋ velegiiŋ to tipiyaava payou.
Pasa, you naghur ila saveeŋ tiom.
 
43 You naghur matag pa gabizooŋ tiom.
Tovenen uul ghou lak! Leso avog ivotia gabuam to avom onoon ve utaghon saveeŋ tiom irau sawa isob.
 
44 You pale nataghon saveeŋ tiom irau sawa isob.
To aazne, ve itaghoni taghoni gha ila.
 
45 Tutuuŋ to yom ughur di, you nazuaria ghou pa nataghon di.
Tovenen mbeb eta irau ipoon ataam payou maau.
 
46 Ataam to yom ughuri payei, you pale navotia ila yes kinik matadi paam.
Pasa, you namatughez, ma mayag pa tamtoghon eta maau. Mt 10:18+; Mk 13:9; 1Pe 3:15
 
47 Tutuuŋ tiom to naol ne, tigham lolog poia le poia kat.
Tauto lolog padi kat.
 
48 You lolog pa tutuuŋ tiom to naol ne ve napatab padi. Tovenen nakaak nimag, ve napait ghom pa tutuuŋ tiom.
Tutuuŋ tiom naol to tineep pataghaaŋ, matag itaghon di naghaze nagham ŋgar padi pooi.
Ighaze tambaad pataŋani, Maaron aliŋa pale irab ateed
 
49 You mbesooŋa tiom. Matam iŋgal saveeŋ to umbua toman ghou.
Pasa, saveeŋ tiom tonowen ipapalot ghou pa naghur matag payom, ve nasaŋan ulaaŋ tiom.
 
50 Ighaze pataŋani igham ghou, nene pale saveeŋ tiom iuul ghou ve naneep pooi.
Ŋgar tonene, to irab ateg le ateg izi.
 
51 Yes to tipapait taudi ve tiveleg ghom, moghon moghon tiveveleg ghou paam.
Eemoghon you napul murig pa saveeŋ tiom maau.
 
52 O Yoova, matag iŋgalŋgal sawa naol to muuŋ uŋgabiiz tamtoghon ve ughur atia padi.
Tauto ipalot ghou, ve igham ateg izi.
 
53 Ighaze naghita ndiran samsamiadi tipul muridi pa saveeŋ tiom, nene igham ghou ateg yabyab kat.
 
54 Taan tonene, you naneep pani nanim loom moghon,
ve natoor mbouŋ katindi pa tutuuŋ tiom naol to tineep pataghaaŋ.
 
55 Yoova, matag iŋgalŋgal ghom pa mboŋ paam, ve nataghon saveeŋ tiom.
 
56 You gabuag tovene: Tutuuŋ to yom ughur di, matag kisin di ve nataghon di irau sawa isob.
Lolood poia pa Maaron ve tataghon saveeŋ toni
 
57 Yoova, you naghita ghom unumale mbeb tau. You naneep ilat tiom. Unumale taan poia eez to tipuli payou pa naneep pani.
You nambua saveeŋ payom naghaze you pale nataghon aliŋam.
 
58 Taŋiiz tiou iŋarua ghom toman lolog: Lolom isamin ghou, ve ughur poia tiom iza tiou itaghon saveeŋ mbuaaŋ tiom.
 
59 You naŋgabiiz laghooŋ tiou naghaze nene deŋia maau.
Tauto natoor ŋgar tiou, ve naghaze nataghon ataam to yom ughuri payei.
 
60 Ve irau nasaŋan maau.
Pale rikia moghon ve nataghon tutuuŋ tiom.
 
61 Ndiran samsamia tighur liis naol pa tighaze tiliis ghou.
Eemoghon irau lolog imaagh pa tutuuŋ tiom maau.
 
62 You namundig pa mboŋ anoŋa,
ve napait ghom. Pasa, ataam tiom to gabizooŋ mbeb, nene deŋia moghon.
 
63 Yes to timatughez payom ve titaghon ŋgar tiom,
you lolog padi, ve nagham di tinim nditag.
 
64 O Yoova, yom lolom ineep tuŋia ila to tamtoghon tiom ve uluul di. Ŋgar tiom tonanan, yom upatooŋa irau taan isob.
Upaghazoŋan ghou pa tutuuŋ tiom naol to tineep pataghaaŋ, leso nawatag di kat.
Maaron, ye poia kat
 
65 O Yoova, you mbesooŋa tiom. Yom ughamgham poian ghou kat itaghon saveeŋ mbuaaŋ tiom.
 
66 You naghur ila naghaze tutuuŋ tiom to naol ne, nene popoiadi moghon.
Tovenen upatooŋ ghou pa ŋgar poia ve ataam to naŋgabiiz poian mbeb.
 
67 Muuŋ, you nayel pa ataam tiom.
Eemoghon yom ulos ghou ve upasaluŋgan ghou, tauto aazne, matag kisin aliŋam ve nataghoni.
 
68 Yom poiam kat. Ve ŋgar to ughamgham di ne paam, popoiadi moghon.
Upaghazoŋan ghou pa tutuuŋ tiom naol to tineep pataghaaŋ.
 
69 Yes to tipapait taudi ve tiveleg ghom, tiŋgal saveeŋ kaarom payou, ve tiwaghamun izag.
Eemoghon matag kisin tutuuŋ to yom ughur di, ve nataghon di toman lolog.
 
70 Ndiran tonowen ledi ghilalooŋ rita maau.
Eemoghon you, saveeŋ tiom igham lolog poia le poia kat.
 
71 Pataŋani to muuŋ igham ghou, nene poia.
Pasa, ipasaluŋgan ghou, ve ipamundigin ŋgar tiou pa tutuuŋ tiom naol to tineep pataghaaŋ.
 
72 Saveeŋ to ivot ila avom, you naghita inimale mbeb tau.
Ilib pa yaam silva ve gol ndiŋndiŋ ndiŋndiŋ.
Tutuuŋ to Maaron, nene deŋia moghon
73 Taum nimam igharaat ghou, to navot.
Tovenen upaghazoŋan ghou pa tutuuŋ tiom to naol ne, leso nagham ŋgar padi pooi.
 
74 Yes to timatughez payom ve titaghon ŋgar tiom, ighaze tighita ghou, nene pale lolodi poia.
Pasa, you naghur ila saveeŋ mbuaaŋ tiom, ve naghur matag naghaze naghita anoŋa ivot.
 
75 O Yoova, you nawatag: Ataam tiom to gabizooŋ tamtoghon, nene deŋia moghon.
Ve yom utaghon saveeŋ mbuaaŋ tiom irau sawa isob.
Tauto ulos ghou pa upasaluŋgan ghou.
 
76 Yom lolom ineep tuŋia ila to tamtoghon tiom ve uluul di.
Upatooŋ ŋgar tovene payou paam itaghon saveeŋ to yom umbua toman ghou.
Leso urab ateg, ve upalot ghou.
Pasa, you mbesooŋa tiom.
 
77 Lolom isamin ghou, ve uul ghou naneep pooi.
Pasa, saveeŋ tiom, tauto igham lolog poia le poia kat.
 
78 Yes to tipait taudi ve tiveleg ghom, tinoknok ŋgaliiŋ saveeŋ kaarom payou. Utatan di, ve ugham di mayadi.
Eemoghon you matag itaghon tutuuŋ to yom ughur di naghaze nagham ŋgar padi pooi.
 
79 Yes to timatughez payom ve titaghon ŋgar tiom, ghoro tinim tiou ve yeiŋa nilup ghei.
Pasa, ndiran tovene tiwatag ataam to yom ughuri pa tamtoghon tiom.
 
80 You naghaze ŋgar to ineep ila lolog ne, eta isosor malep, ve nataghon katin tutuuŋ tiom naol to tineep pataghaaŋ. Leso mayag sob.
Taŋiiz to ŋgeu to izuaria tau ighaze itaghon katin tutuuŋ to Maaron
 
81 O Yoova, you nakaria saŋaniiŋ pa ulaaŋ tiom, le tapirig isob kat.
Eemoghon you naghur ila naghaze aliŋam pale ighur anoŋa.
 
82 You naghur matag naghaze naghita saveeŋ mbuaaŋ tiom anoŋa ivot. Eemoghon nasaŋan le maau.
Pale ŋeez o uul ghou ve ateg izi?
 
83 You nasami, ve tamtoghon lolodi imaagh payou wa. Tighita ghou nanimale buzbuz.
Eemoghon tutuuŋ tiom naol to tineep pataghaaŋ, lolog imaagh padi maau.
 
84 You mbesooŋa tiom. Pughu vena to yom umbabatut koiagŋa, ve tighamgham pataŋani payou?
Pale ŋeez o uŋgabiiz di, ve ughur atia padi?
 
85 Ughita. Yes to tipapait taudi ve tiveleg ghom, titai saambu payou tighaze natap nazila.
Ndiran tonowen titaghon saveeŋ tiom maau.
 
86 Tutuuŋ tiom tisob, popoiadi moghon. Tovenen yei irau ninumeer di pa tipasaluŋgan ghei.
Aazne, tamtoghon tighur pataŋani payou sorok. Tovenen uul ghou lak!
 
87 Pasa, mala maau pale tipasob nepooŋ tiou to taan.
Eemoghon tutuuŋ to yom ughur di, you napul murig padi maau.
 
88 Yom lolom ineep tuŋia ila to tamtoghon tiom ve uluul di. Tovenen uŋgin ghou naneep pooi.
Leso matag kisin ataam to yom ughuri payei, ve nataghoni irau sawa isob. Ataam tonenen, taum avom isavia.
Maaron aliŋa pale inepneep tovene itaghoni taghoni gha ila
 
89 O Yoova, saveeŋ tiom pale iyaryaaŋ izi sambam, ve inepneep tovene itaghoni taghoni gha ila. Mt 5:18; Lu 16:17, 21:33; 1Pe 1:25
 
90 Tamtoghon tipopoop, ve papaghu todi tivotvot itaghoni taghoni gha ila.
Ve gabuam to avom onoon ve utataghon saveeŋ tiom ne paam. Inepneep tovene itaghoni taghoni gha ila.
Yom to ughur taan ineep tuŋia ila ina. Irau induur maau.
 
91 Muuŋ ve inim aazne, mbeb tisob tineep tuŋia ila inadi inadi itaghon saveeŋ to yom usavia.
Ve mbeb tisob tinim mbesooŋa tiom.
 
92 Saveeŋ tiom igham lolog poia le poia kat.
Inimale maau, tone pataŋani tiou igham ghou nalaleg.
 
93 Tutuuŋ to yom ughur di, you irau lolog imaagh pa eta maau. Maau le maau kat.
Pasa, saveeŋ tiom, tauto igham ghou avuvug ila, ve naneep matag iyaryaar.
 
94 You nanim lem wa. Tovenen ugham mulin ghou lak!
Pasa, you nazuaria ghou naghaze le nataghon katin tutuuŋ tisob to yom ughur di.
 
95 Aazne, ndiran samsamiadi tighamgham lilin ghou tighaze tirab ghou namaat.
Eemoghon matag iŋgalŋgal ataam to yom ughuri payei.
 
96 You naghita mbeb eta to ivot kat ne maau. Mbeb to naol ne, tisob timuul moghon.
Eemoghon tutuuŋ tiom, ghoro iraua kat. Nene pughu tiina, ve poia le poia kat.
Saveeŋ to Maaron inim pughu pa ŋgar poia
 
97 You lolog pa saveeŋ tiom kat!
Tovenen sawa to naol ne, mboŋmaagh ila le rabrab izi, matag itaghoni ve naghamgham ŋgar pani.
 
98 Tutuuŋ tiom ineep ila ŋgar tiou irau sawa isob.
Tauto ŋgar tiou ilib pa koiagŋa ŋgar todi.
 
99 Ŋgar tiou ilib pa yes ŋgara to tipatoot ghou ne paam.
Pasa, matag itaghon ataam to yom ughuri payei, ve naghamgham ŋgar pani.
 
100 Ve ŋgar tiou ilib pa ndolmana ŋgar todi paam.
Pasa, tutuuŋ to yom ughur di, matag kisin di, ve nataghon di irau sawa isob.
 
101 You napaghau taug pa ataam samsamia to naol ne, leso nataghon aliŋam.
 
102 You napul murig pa tutuuŋ tiom deŋiadi maau.
Pasa, yom taum to upatooŋ ghou pa tutuuŋ tonenen.
 
103 Bagil suru, nene poia pa taghuni. Eemoghon saveeŋ tiom, nene poia le poia kat. Ilib pa bagil suru.
 
104 Tutuuŋ to yom ughur di, nene tiuul ghou pa naghilaal ŋgar poia.
Tauto naghur koi pa ŋgar kaarom to naol ne. Pa vene, tiweu ghou ve napul ataam tiom.
Saveeŋ to Maaron ighur ghazooŋa pait
105 Saveeŋ tiom, nene inimale lam to isul ataam ve nalaagh.
Ve inim ghazooŋa payou, leso nalaagh taghon ataam tiom. Mbo 119:130; 2Pe 1:19
 
106 Gabizooŋ tiom, nene deŋia moghon. Tauto nambua saveeŋ toman ghom, ve napariaaŋa le iyaryaaŋ kat naghaze you pale nataghon ataam tiom to gabizooŋ mbeb.
 
107 O Yoova, pataŋani tiina kat igham ghou le naneep sami.
Uul ghou naneep pooi muul itaghon saveeŋ mbuaaŋ tiom.
 
108 You lolog poia payom, ve napait ghom pa poia tiom.
Naghaze paitooŋ tiou tonene inim watooŋrau poia ila matam.
Upatooŋ ghou pa ataam tiom to gabizooŋ mbeb.
 
109 Moghon moghon you nanepneep ila naal avo.
Eemoghon lolog imaagh pa saveeŋ tiom maau.
 
110 Onoon, ndiran samsamia tighur liis payou.
Eemoghon tutuuŋ to yom ughur di, you nayel padi maau.
 
111 Ataam to yom ughuri payei, nene mbeb poia to yom ugham payou. You pale nakiskisi tovene itaghoni taghoni gha ila. Pasa, igham ghou lolog poia le poia kat.
 
112 Tutuuŋ tiom to tineep pataghaaŋ, ŋgar tiou iyaryaaŋ naghaze you pale nataghon di le irau sawa tiou isob.
Taghur lolood pa Maaron ve saveeŋ toni
 
113 Yes to timbees payom toman lolodi ee moghon maau, ve ŋgar todi ru, you lolog padi maau.
Eemoghon saveeŋ tiom, you lolog pani kat. Yems 1:7-8, 4:8
 
114 Yom unum inag to yoŋgaaŋ, ve unum sigeu payou.
Tovenen naghur ila saveeŋ tiom, ve naghur matag naghaze naghita anoŋa ivot.
 
115 Yam ndiran to ghamuuŋ ŋgar samia, aghau payou!
Pasa, you naghaze nataghon tutuuŋ to Maaron tiou.
 
116 O Yoova, upalot ghou itaghon saveeŋ mbuaaŋ tiom. Leso nayoon ariaŋa ve naneep pooi.
Ighaze naghur matag payom sorok, nene pale mayag. Ro 5:4+
 
117 Ukis ghou tuŋia.
Leso naneep pooi, ve matag kisin tutuuŋ tiom to tineep pataghaaŋ, ve nataghon di irau sawa isob.
 
118 Tamtoghon tisob to tiyel pa tutuuŋ tiom, yom upul murim padi.
Ŋgar todi kaarom, nene ipatooŋ di ighaze yes tipul ataam tiom wa.
 
119 Ndiran samsamia to tineep izi taan, yom ughita di tinimale buzbuz, ve upiyaav di tilaledi.
Tauto lolog pa ataam to yom ughuri pa tamtoghon tiom.
 
120 You nagham ŋgar payom, le matughezaaŋ tiina igham ghou ve tinig irur.
Ve ŋgar tiom to uŋgabiiz tamtoghon ve ughur atia padi, nene paam igham ghou namatughez.
Suŋuuŋ to tamtoghon to imbesmbees pa Maaron
 
121 You nagham ŋgar popoia ve ŋgar deŋia moghon.
Tovenen upul ghou nala koiagŋa nimadi malep.
 
122 You mbesooŋa tiom. Tovenen uyoon payou ve uul ghou. Leso naneep pooi.
Yes to tipapait taudi ve tiveleg ghom, upul di tigham samin ghou malep.
 
123 You naghur matag pa ulaaŋ tiom, ve nakaria saŋaniiŋ wa.
Pale ŋeez o uul ghou itaghon saveeŋ mbuaaŋ tiom?
 
124 Yom lolom ineep tuŋia ila to tamtoghon tiom ve uluul di. Upatooŋ ŋgar tovene payou paam. Pasa, you mbesooŋa tiom.
Ve upatoot ghou pa tutuuŋ tiom to tineep pataghaaŋ.
 
125 You mbesooŋa tiom. Tovenen upaghazoŋan ghou, leso naghilaal ŋgar poia, ve nawatag katin ataam to yom ughuri payei.
 
126 O Yoova, aazne tamtoghon tizorzoor saveeŋ tiom.
Umundig ve ugham ŋgar eta padi lak!
 
127 Onoon kat, you lolog pa tutuuŋ tiom to naol ne ilib pa gol.
Gol to ŋgalaaŋa ve poia kat ne paam, naghita naghaze tutuuŋ tiom ilib pani.
 
128 Tovenen tutuuŋ to yom ughur di, tauto tipasaluŋgan ghou pa laghooŋ tiou.
Ve naghur koi pa ataam naol to tiweu ghou pa napul murig payom.
Taghur lolood pa Maaron aliŋa
129 Ataam to yom ughuri payei, nene poia le poia kat.
Tovenen matag kisini ve nataghoni irau sawa isob.
 
130 Ighaze tipaghazoŋan saveeŋ tiom pughu pa tamtoghon, nene inim ghazooŋa padi.
Ve yes to ŋgar todi tiina maau, saveeŋ tiom igham ŋgar todi ivot, leso tighilaal ŋgar poia. Mbo 19:7; 2Tim 3:15+
 
131 You lolog pa tutuuŋ tiom kat,
nanimale tamtoghon to muruni le isami kat.
 
132 Matam inim payou, ve ugham poian ghou.
Pasa, yes to lolodi ineep tiom ve tipapait izam, yom ughamgham tovene padi.
 
133 Upasaluŋgan ghou, leso laghooŋ tiou deŋia itaghon saveeŋ tiom.
Ve upul ŋgar samia eta ilib payou malep.
 
134 Yes to tighamgham pataŋani payou pa titatan ghou, ugham mulin ghou ila nimadi.
Leso nataghon tutuuŋ to yom ughur di.
 
135 O Yoova, you mbesooŋa tiom. Naghaze lolom poia payou, ve ugham poian ghou.
Ve upatoot ghou pa tutuuŋ tiom to tineep pataghaaŋ.
 
136 You nataŋ, ve matag suru irereer izi inimale ya.
Pasa, tamtoghon titaghon saveeŋ tiom iraua sone.
Ŋgar deŋia to Maaron
 
137 Yoova, yom deŋiam kat.
Ve gabizooŋ tiom paam, nene deŋia moghon.
 
138 Ataam to yom ughuri payei, nene deŋia moghon.
Tovenen yei irau ninumeera pa ipasaluŋgan ghei.
 
139 Ŋgar tiou iyaryaaŋ kat naghaze tamtoghon tisob titaghon aliŋam.
Eemoghon koiagŋa lolodi imaagh pani. Tauto tigham ghou ateg yabyab kat.
 
140 You mbesooŋa tiom. Lolog pa saveeŋ tiom, ve nanumeera kat. Pasa, natoova le naghita naghaze nene onoon.
 
141 Onoon, you ŋgeu sorok, ve tamtoghon matadi izi payou.
Eemoghon tutuuŋ to yom ughur di, lolog imaagh padi maau.
 
142 Ŋgar tiom deŋia pale inepneep tovene itaghoni taghoni gha ila.
Ve saveeŋ tiom, nene onoon moghon. Tovenen irau naghur ila, ve nanumeera kat.
 
143 Onoon, pataŋani naol titatan ghou, ve tigham ghou lolog ipataŋan kat.
Eemoghon tutuuŋ tiom, nene igham lolog poia le poia kat.
 
144 Ataam to yom ughuri payei, nene deŋia moghon, ve inepneep tovene irau sawa isob.
Upaghazoŋan ghou pani, leso naneep pooi.
Ighaze lolood ipataŋan, mataad iŋgal Maaron
 
145 O Yoova, you nataŋ roran ghom toman lolog. Ulooŋ suŋuuŋ tiou, ve uul ghou.
Leso matag kisin tutuuŋ tiom to tineep pataghaaŋ, ve nataghon di.
 
146 Taŋiiz tiou iŋarua ghom. Upas ghou navot pa pataŋani tiou tonene.
Leso matag kisin ataam to yom ughuri payei, ve nataghoni irau sawa isob.
 
147 You naghur ila saveeŋ mbuaaŋ tiom, ve naghur matag naghaze naghita anoŋa ivot. Tovenen ndag iza sone, ve you namundig nataŋ roran ghom pa ulaaŋ.
 
148 Ve mboŋ to naol ne paam, you napamaat.
Leso matag itaghon saveeŋ tiom, ve nagham ŋgar pani pooi.
 
149 O Yoova, lolom ineep tuŋia ila to tamtoghon tiom ve uluul di. Ve gabizooŋ tiom, nene deŋia moghon. Tovenen ulooŋ suŋuuŋ tiou tonene, ve uul ghou naneep pooi.
 
150 Aazne, ndiran samsamia tinim tigharau ghou tighaze tiwaghamun ghou.
Ŋgar todi ineep saguan kat pa saveeŋ tiom.
 
151 Eemoghon Yoova, yom uneep digeg.
Ve tutuuŋ tiom to naol ne, nene irau nanumeer di pa tipasaluŋgan ghou.
 
152 To muuŋ ve inim, you naghilaal naghaze ataam to yom ughuri pa tamtoghon tiom, yom ughaze ineep tovene itaghoni taghoni gha ila.
Ŋgeu eez itaŋ roran Maaron pa igham mulini ila koia nimadi
 
153 Yoova, lolog imaagh pa saveeŋ tiom maau.
Tovenen ughita pataŋani tiou tonene, ve upaghau ghou pani.
 
154 Aazne, tamtoghon tipayoon ghou sorok pa savsaveeŋ. Tovenen uyoon payou, ve uul ghou naneep pooi itaghon saveeŋ mbuaaŋ tiom.
 
155 Ndiran samsamia, yom uluul di maau.
Pasa, tutuuŋ tiom to tineep pataghaaŋ, yes tigham ŋgar pa titaghon di maau.
 
156 O Yoova, yes to tinepneep ila pataŋani lolo, yom lolom isamin di kat.
Tovenen uul ghou naneep pooi itaghon ŋgar tiom deŋia.
 
157 Pasa, koiagŋa to tigham pataŋani payou ne, yes ival kat.
Eemoghon ataam to yom ughuri payei, you nayel pani maau.
 
158 You naghita yes to tipul muridi payom, le irau lolog maau kat.
Pasa, yes titaghon tutuuŋ tiom maau.
 
159 O Yoova, ughita. Tutuuŋ to yom ughur di, you lolog padi kat.
Uul ghou naneep pooi. Pasa, lolom ineep tuŋia ila to tamtoghon tiom ve uluul di.
 
160 Saveeŋ tiom pughu tovene: Yom avom onoon, ve utaghon saveeŋ mbuaaŋ tiom irau sawa isob.
Ve tutuuŋ tiom to naol, nene deŋiadi moghon, ve tinepneep tovene itaghoni taghoni gha ila.
Poia to Maaron pale iza to yes to titaghon ataam toni
 
161 Yes daba to taan tighurghur pataŋani payou sorok. Eemoghon you namatughez padi maau.
Saveeŋ tiom moghon to namatughez pani.
 
162 Saveeŋ tiom igham lolog poia kat,
nanimale tamtoghon to ilaagh ila le indeeŋ le mbeb poia eez.
 
163 Ŋgar kaarom to naol, you lolog padi maau kat, ve naghur koi padi.
Eemoghon saveeŋ tiom, ghoro lolog pani kat.
 
164 Ndag to naol ne, napait ghom pa liim ve ru.
Pasa, gabizooŋ tiom, nene deŋia moghon.
 
165 Yes to lolodi pa saveeŋ tiom kat, nene pale tineep poia kat.
Ve mbeb eta irau igham di titap ne maau.
 
166 O Yoova, you nataghon tutuuŋ tiom to naol ne,
ve naghur matag pa ulaaŋ tiom.
 
167 ataam to yom ughuri payei, you lolog pani kat.
Tauto matag kisini, ve nataghoni irau sawa isob.
 
168 You nataghon ataam tonenen toman tutuuŋ tisob to yom ughur di.
Pasa, sa ŋgar to you naghamghami, yom ughita.
Mataad iŋgal Maaron aliŋa ve tapaiti
 
169 O Yoova, ulooŋ taŋiiz tiou tonene.
Ugham ghou naghilaal ŋgar poia itaghon saveeŋ tiom.
 
170 Ughur taliŋam pa suŋuuŋ tiou, ve upas ghou navot pa pataŋani tiou itaghon saveeŋ mbuaaŋ tiom.
 
171 Yom upatoot ghou pa tutuuŋ tiom to tineep pataghaaŋ.
Tovenen avog ipait ghom kat.
 
172 You pale nambou mbouŋ to iŋarua saveeŋ tiom.
Pasa, tutuuŋ tiom to naol, nene deŋiadi moghon.
 
173 Nimam isaŋan pa ulaaŋ ghou.
Pasa, ŋgar tiou iyaryaaŋ naghaze nataghon tutuuŋ to yom ughur di.
 
174 O Yoova, you nakausim pa ulaaŋ tiom.
Ve saveeŋ tiom, to igham lolog poia le poia kat.
 
175 Upul ghou naneep matag iyaryaar, leso napait ghom.
Tutuuŋ tiom pale iuul ghou naneep pooi.
 
176 You mbesooŋa tiom. Eemoghon aazne nayel pa ataam tiom ve nawalaghlaagh nanimale sipsip to ighau ila le ilale.
Tovenen ukaal ghou, ve ugham ghou namuul nanim. Pasa, you lolog imaagh pa tutuuŋ tiom maau. Lu 15:4