138
Suŋuuŋ to tamtoghon to lolo poia pa ulaaŋ to Maaron
Mbouŋ to David
O Yoova, you lolog poia payom, ve napait ghom toman lolog.
Ighaze nambou mbouŋ pa napait ghom, ve ndimaronŋa pida tighita ghou, nene poia!
 
Matag iŋarua rumai tiom patabuaŋ, ve naput agheg payom.
You napait izam pa poia tiom toman lolog poia.
Pasa, yom lolom ineep tuŋia ila to tamtoghon tiom ve uluul di, ve utaghon saveeŋ mbuaaŋ tiom irau sawa isob.
Yom upait izam toman saveeŋ tiom ilib pa mbeb tisob.
 
Sawa to nataŋ roran ghom pa ulaaŋ, yom ulooŋ suŋuuŋ tiou, ve ugham tapirig ivot muul ve nayoon ariaŋa.
O Yoova, saveeŋ to ivot ila avom, kinik to taan tilooŋa wa.
Tovenen pale tisob lolodi poia payom, ve tipait ghom.
 
Pale timbou ve tipait ghom pa ŋgar to yom ughamghami,
ve tisaav tighaze: “Yoova iza tiina kat pa tapiri ve poia toni.”
 
Nene onoon. Yoova iza tiina, ve ineep sala kat. Eemoghon yes to ledi izadi maau, ye mata padi ve iuluul di.
Ve yes to tipapait taudi ve tivelegi, yes irau tiyooŋ pani maau. Ye iwatag di wa. Pasa, ye mata mala. Mbo 113:7+; Lu 1:52, 14:11
Ighaze pataŋani naol tiluvut ghou, yom pale uul ghou naneep pooi.
Ighaze koiagŋa atedi yabyab payou kat, ve tighaze tiwaghamun ghou,
nene nimam waan pale irab di, ve ugham mulin ghou ila nimadi.
 
O Yoova, sa ŋgar to lolom ughaze ivot payou, nene pale ivot itaghon ŋgar tiom.
Pasa, lolom ineep tuŋia ila to tamtoghon tiom ve uluul di irau sawa isob.
Tovenen upul murim payou malep. Pasa you, nene yom nimam muri. Pil 1:6