14
Ndiran kankanooŋa to lolodi imaagh pa Maaron
Mbouŋ to David
1 Yes kankanooŋa to lolodi imaagh pa Maaron, tigham ŋgar ila lolodi tighaze: “Maaron eta ineep maau.”
Ndiran tovene, Maaron lolo padi maau kat. Pasa, ŋgar todi isami wa. Tauto tighamgham ŋgar samsamia naol.
Eta igham ŋgar poia maau. Mbo 10:4, 53:1+; Ro 3:10+
2 Yoova ineep izi sambam, ve mata izizi pa tamtoghon to taan, ve iŋgagabiiz di.
Ye ighaze ighita: Todi eta pale ighilaala, ma maau? Ve eta izuaria tau leso iwatag Maaron? Maau. Mbnp 18:21
3 Tisob tipul ataam toni ve tisami wa.
Eta igham ŋgar poia maau. Maau le maau kat. Mbnp 6:5; Ep 2:3
4 Tovenen Yoova igham ŋgar naol ighaze: “Yes to tinoknok ghamuuŋ ŋgar samsamia ne, ledi ghilalooŋ, ma maau? Ŋeez o ŋgar todi ivot?
Sawa isob, yes titombaan tamtoghon tiou, ve tipasob mbeb todi le isob kat, tinimale yes to tighan aniiŋ popoia le tipasobi.
Matadi iŋgal ghou ve tisuŋ payou maau.” Yems 5:4+
5 Eemoghon muri, matughezaaŋ tiina kat pale igham di.
Pasa, Maaron pale ivool to tamtoghon deŋiadi to titaghon ataam toni.
6 Yes mbolaaŋa to tirau mbeb eta maau, yam ndiran samsamia aponpoon ataam padi. Tauto ŋgar todi le anoŋa maau.
Eemoghon Yoova tau pale inim ledi inadi to yoŋgaaŋ.
7 Oyai, Maaron to ineep izi ndug Zion iuul yes Israela, ve ipas di tivot pa pataŋani todi, ghoro poia!
Ighaze Yoova iuul tamtoghon toni ve tineep poia muul, nene pale tinidi iza.
Onoon kat, Yakop papaghu toni pale lolodi poia le poia kat. Mbo 53:6, 126:1