140
Ŋgeu eez ighason Maaron pa ipoona pa koia
Mbouŋ to David
1 O Yoova, ugham mulin ghou ila ndiran samsamia nimadi.
Upoon ghou pa yes to tirabrab tamtoghon le naghodi siŋ. Pa vene, tiwaghamun ghou.
2 Moghon moghon, matadi ighurghur pa ŋgar samia,
ve tipapazaagh tamtoghon pa malmal.
3 Avodi poia maau.
Saveeŋ to tipipiyaava ne, iwaghamun tamtoghon kat, inimale moot samia ighan tamtoghon. Ro 3:13; Yems 3:8
4 O Yoova, uvool tiou, ve uŋgin ghou. Leso ndiran samsamia tikis ghou sob.
Yes to tirabrab tamtoghon le naghodi siŋ, tikalkaal ataam pa tigham ghou natap.
Unum sigeu payou, leso tiwaghamun ghou sob.
5 Yes to tipapait taudi ve matadi velegin ghom, tauto tighur liis itaghon ataam dige pa tiliis ghou.
Yes tiraar malum ila ataam to nalaghlaagh pani, tighaze tisavag ghou.
6 You nasaav pa Yoova naghaze: “Yom Maaron tiou.”
Ughur taliŋam pa taŋiiz tiou tonene, ve uul ghou.
7 O Yoova, Tiina tiou, yom Volaaŋa tiou ariaŋa.
Sawa to naneep ila malmal lolo, yom to unum sigeu payou.
8 Yoova, ndiran samsamia tilup di, ve tikalkaal ataam pa tiwaghamun ghou.
Upoon ataam padi, leso ŋgar todi samia tonowen ighur maau. Upul di tilib payou malep. Pa vene, tipakur di.
9 Yes tiluvut ghou, ve tipakur di tighaze tilib payou.
Saveeŋ samsamia to ivotvot ila avodi, ighamgham pataŋani payou.
Upamuul saveeŋ tonowen imuul ila pa taudi, leso iwaghamun di.
10 Ugham yab ŋgiliŋi itaptap izala poghodi ve ighan di.
Ve usuruuv di tizila saambu to mateeŋa to izila le izila kat. Leso tiza muul sob. Syg 20:15
11 Yes to tiŋgalŋgal saveeŋ pa tamtoghon, undiir di tighau pa taan tiei.
You naghaze pataŋani igham taghon yes to tighamgham malmal, ve ipasob di rikia moghon.
12 Yoova, you nawatag: Yes mbolaaŋa, ve yes to timbadbaad pataŋani ve tighur matadi payom, yom pale uyoon padi, ve uul di pa pataŋani todi. Mbo 9:18, 34:6
13 Onoon kat, ndiran deŋiadi pale lolodi poia payom ve tipait izam, ve tineep ila naghom irau sawa isob. Mt 5:8