145
Tapait Maaron pa poia toni
Mbouŋ to tapait Maaron
Mbouŋ to David
1 O Maaron, yom kinik tiou. You pale napakur ghom, ve napait izam pa poia tiom. To aazne, ve itaghoni taghoni gha ila.
2 Onoon kat, moghon moghon, you pale napait ghom pa poia tiom.
Pale napait izam to aazne, ve itaghoni taghoni gha ila.
3 Yoova iza tiina kat. Ighaze tapaiti, nene deŋia.
Tapiri toman ŋgar ve poia toni, nene tiina le tiina kat.
Ighaze tagham ŋgar pani, nene pale taraua maau. Ro 11:33
4 Uraat ariaŋadi ve ŋgar popoia to ughamgham di, tamtoghon pale tisavia varu pa ndinatudi, ve ndinatudi pale anadi tisavia pa papaghu todi, ve iseeŋga tovene gha ila.
5 Pale tipait izam, ve tisavia ŋgurubam tiina to ipambood ghom.
Ve uraat tiom gharatooŋadi to mata ite kat ne paam, you moghon moghon naghamgam ŋgar padi.
6 Yom upatooŋ tapirim ila uraat tiom ariaŋadi to tigham tamtoghon timatughez. Tauto pale tisavia varu.
Ve uraat tiom tintina, you pale nanim kamos padi.
7 Poia tiom, nene tiina kat.
Tovenen tamtoghon pale matadi iŋgalŋgali, ve tivovotia varu.
Pale timbou toman lolodi poia, ve tipait ghom pa ŋgar tiom deŋia.
8 Yoova ighamgham poian ghiit, ve lolo isasamin ghiit.
Ye ate yabyab rikrikia maau.
Poia toni, nene tiina kat. Ye lolo ineep tuŋia inim toit, ve iuluul ghiit irau sawa isob. Igham 34:6
9 Yoova ighamgham ŋgar poia pa tamtoghon tisob.
Ve lolo isasamin mbeb tisob to ye ighur di. Mbo 103:13+, 136:1
10 O Yoova, mbeb to yom ughur di, pale tisob lolodi poia payom ve tipait ghom.
Ve tamtoghon tiom to lolodi ineep tuŋia ilat tiom ne paam, pale tipait ghom pa poia tiom.
11 Pale tisavia pooz tiom tighaze nene mbeb tiina ve poia.
Ve tivotia varum tighaze tapirim tiina le tiina kat.
12 Leso tamtoghon tisob tiwatag uraat tiom tintina to tipatooŋ tapirim.
Ve tighilaal tighaze pooz tiom, nene mbeb tiina ve poiawaat kat.
13 Pooz tiom inepneep tovene irau sawa isob.
Mbeb tisob pale tineep ila sambam, ve uŋgin di itaghoni taghoni gha ila.
Yoova itataghon saveeŋ toni isob.
Uraat toni to naol ne tipatooŋa tighaze ye lolo ineep tuŋia ila to tamtoghon toni ve iuluul di. 1Tim 1:17; Hib 10:23; Syg 11:15
14 Yes to aghedi kirikia ve tighaze titap, ye ipalot di tuŋia.
Ve tamtoghon tisob to pataŋani itatan di, ye iuul di, ve iit di tiza. Mbo 37:17
15-16 Mbeb tisob to matadi iyaryaar ne, matadi ilatlat payom.
Sawa to pitool di, yom ugham adi aniiŋ.
Yom ukaak nimam ve upan di,
ve tisob tighan le apodi isuŋ. Mbo 104:28; Mt 6:26
17 Ŋgar tisob to Yoova ighamgham di, nene deŋiadi moghon,
ve tipatooŋa tighaze lolo ineep tuŋia ila to tamtoghon toni ve iuluul di.
18 Tamtoghon tisob to titaŋ rorani pa ulaaŋ toman lolodi, ye ineep igharau di ve iuluul di.
19 Yes to timatughez pani ve titaghon ŋgar toni, ighaze lolodi pa mbeb eta ve tighasoni pani, nene pale ilooŋ di, ve igham mbeb tonenen padi.
Ye ilooŋ taŋiiz todi, ve iuluul di. Yo 15:7
20 Tovenen yes to lolodi pani, ye mata padi ve inim sigeu padi.
Eemoghon ndiran samsamia, ye pale iwaghamun di tisob tilaledi.
21 Avog pale ipait Yoova.
Ve mbeb tisob to ye ighur di ne paam, pale tisob tipait iza patabuaŋ. To aazne, ve itaghoni taghoni gha ila.