148
Mbeb tisob irau tipait Maaron iza
1 Aleluia, tapait Yoova!
Yam to sambam, apait Yoova!
Yam to aneep sala kat, apaiti!
2 Yam aŋela toni asob apaiti!
Ve yam ndaaba to sambam paam, asob apaiti! Lu 2:13+
3 Ndag ve kaiyo, apaiti!
Ve yam pitum to araŋ ila sambam paroŋania ne paam, apaiti.
4 Sambam to ineep sala le sala kat, upaiti!
Ve ya to ineep sala ne paam, upaiti!
5 Mbeb tonowen tisob tipait Yoova iza, ghoro poia.
Pasa, ye isaav, ve yes tivot titaghon ye aliŋa.
6 Ye ighur di tineep ila inadi inadi, leso tineep tonowe itaghoni taghoni gha ila.
Saveeŋ to ye isavia iŋarua di, ineep pataghaaŋ. Irau tizoora maau.
7 Yam mbeb to aneep izi taan, apait Yoova!
Ve yam mbeb to te lolo to tapirimim tintina ve aneep ila mazovan ne paam, apaiti!
8 Lalaav waro, toman ais, waam,
ve yaghur uti to avotvot itaghon Yoova aliŋa, yam asob apaiti!
9 Yam lolooz ve ndug mbuŋa, ve yam mbaaŋ to anoŋamim popoia, ve ai to su paam, asob apaiti!
10 Ve yam ŋgai to paanu, ve mbeb sagsag to su,
mbeb to andadarab ila taan, ve man to arovroov, apaiti!
11 Yam kinik, pooza, ve daba, toman yam tamtoghon to ndug ndug, asob apait Yoova!
12 Yam nditamoot ve ndiliva papaghu, yamŋa ndolman watwaat ve yam ndipain geegeu paam, apaiti!
13 Yam asob apait Yoova iza.
Pasa, ye moghon to iza tiina kat ilib pa mbeb tisob.
Pooz toni toman tapiri ve poia toni ilib pa mbeb tisob to sambam ve taan.
14 Ye ipalot tamtoghon toni, tauto tiyoon ariaŋa.
Tamtoghon toni to lolodi ineep tuŋia ila toni ve titaghon ataam toni, ye ipakur di, ve igham varudi inim tiina.
Pasa, ye lolo ineep kat to yes Israela.
Aleluia, tapait Yoova!