26
Ŋgeu eez ighason Maaron pa ipaghazoŋani tovene: Ye ŋgeu deŋia. Igham sosor eta maau
Mbouŋ to David
O Yoova, you naghaze yom upaghazoŋan ghou ila tamtoghon matadi ughaze you ŋgeu deŋiag.
Pasa, laghooŋ tiou, you nataghon ŋgar deŋia moghon.
Ve naghur ilat tiom ariaŋa. Lolog ru payom maau. Mbo 7:8+
 
Yoova, uŋgabiiz ghou, ve utoov ghou.
Utiir poian lolog ve ŋgar tiou, ve ughita: You naneep deŋiag ila matam, ma maau? Mbo 139:1,23+
 
Moghon moghon, matag iŋgalŋgal ŋgar tiom to lolom ineep tuŋia ila to tamtoghon tiom ve uluul di.
Yom utaghon saveeŋ tiom irau sawa isob. Gabuam tonanan ipapalot ghou pa laghooŋ tiou, tauto nataghon ataam tiom. Mbo 119:30
Yeiŋa ndiran kaaromŋa niluplup ghei maau.
Yes to tiparim taudi pa ghurla todi, you nala toman di maau. Mbo 1:1; 2Kor 6:14
 
You naghur koi pa yes to tighamgham ŋgar samsamia, ve naneep saguan padi.
Ighaze ndiran samsamia tilup di, irau naneep toman di maau.
O Yoova, you nataghon ŋgar deŋia moghon. Tauto namen nimag inim ghilalooŋ payou ighaze leg sosor eta maau.
Ve nalaagh luvutin artaal to tighamgham watooŋrau payom izala, ve nasuŋ payom. Mbo 15:1+, 24:3+
 
You pale nambou mbouŋ toman lolog poia ve napait ghom,
ve navotia uraat tiom gharatooŋadi to ite kat.
Yoova, you lolog pa rumai tiom kat. Pasa, nene inam to nepooŋ.
Yom upatooŋ tapirim ve ŋgurubam toman poia tiom ivotvot tonowe. Igham 40:35
 
Yes to tiyel pa ataam tiom, upasob ghou toman di malep.
Ve yes to tirabrab tamtoghon le naghodi siŋ, urab ghou namaat toman di malep.
 
10 Ndiran tovene, nimadi igharghaar pa ghamuuŋ ŋgar samsamia naol.
Ve ighaze tighol di pa tigham ŋgar samia eta, nene tiyok moghon ve tighami.
11 Eemoghon laghooŋ tiou, you nataghon ŋgar deŋia moghon.
O Yoova, you mbesooŋa tiom. Lolom isamin ghou ve ugham mulin ghou.
12 You nayoon tuŋia ila taan raapa. Irau natap maau.
Tovenen sawa to tamtoghon tiom tilup di pa suŋuuŋ, you pale nala toman di, ve napait ghom pa poia tiom.