32
Tavotia sosor toit
Mbouŋ to David
Tamtoghon to ighaze izoor Maaron aliŋa ve iyel pa ataam toni, ighaze Maaron ireu sosor toni ilale, ye pale tini iza pa poia to Maaron to iza toni. Mbo 103:3; Ro 4:6+
 
Onoon kat, tamtoghon to ighaze ŋgar to kaarom eta ineep ila lolo maau, ve Yoova ighita ighaze ye le sosor eta maau, ye pale tini iza pa poia to Maaron to iza toni. Syg 14:5
Sawa to naŋgooz sosor tiou, tuag tisob tiyabyab le tapirig isob.
Ve nayakyak irau mboŋ ve ndag.
 
O Yoova, onoon kat, sawa tonenen, nayamaan katin nimam irau mboŋ ve ndag.
Tauto igham tapirig isob kat nanimale ya to ndag ighaaz le imaak.
Naneep le maau, ghoro navotia sosor tiou payom.
Ŋgar tiou samia, naŋgooza muul maau.
Sawa tonenen, you naghaze: “Ŋgar tiou to zoraaŋ Yoova aliŋa, you pale navotia ila toni.”
Tovenen navotia sosor tiou payom, ve ureua ilale. Mbo 51:1+, 103:9+; 1Yo 1:9
Tovenen tamtoghon tisob to lolodi ineep tuŋia ilat tiom, ve titaghon ataam tiom, ighaze pataŋani eta igham di, yes irau tisuŋ payom.
Ighaze pataŋani tiina kat ivot padi inimale yawaaŋa to ivot toman tapiri, yom pale uul di, leso pataŋani itatan di sob.
 
Maaron, yom unum inag to yoŋgaaŋ.
Yom upoon ghou pa pataŋani, ve ugham mulin ghou.
Tauto ival tiina to tiluvut ghou ne, timbou ve tipait izam toman aliŋadi tiina.
Ve Yoova isaav payou ighaze: “You pale napaghazoŋan ŋgar tiom, ve napatooŋ ghom pa ataam to naghaze utaghoni.
You pale matag payom, ve nauul ghom pa ŋgar poia.
 
Tovenen ugham ŋgar pooi. Dabam ariaŋa inimale hos ma esele malep.
Yes ledi ŋgar maau. Tauto tamtoghon tighurghur ain suruvu toman waar ila avodi, leso tipasaluŋgan di pa laghooŋ, ve titaghon ŋgar todi.”
10 Ndiran samsamia, pataŋani naol pale igham di.
Ve yes to tinumeer Yoova, ye pale lolo ineep tuŋia ila todi, ve tineep ila poia toni lolo. Ro 2:9+
11 Yam ndiran to ataghon ŋgar deŋia, lolomim poia, ve tinimim iza pa poia to Yoova.
Yam to ŋgar poia ineep ariaŋa ila lolomim, asob lolomim poia pa Yoova ve alool ve apaiti!