38
Suŋuuŋ to tamtoghon to moroghooŋ tiina ighami
Mbouŋ to David
Sawa to tamtoghon tigham watooŋrau ve tighason Maaron pa mata iŋgal di, timbou mbouŋ tonene
O Yoova, uyaan ghou toman atem yabyab malep.
Ve ighaze upasaluŋgan ghou, uŋgal matag malep.
Yom uvaneg ghou pa pane tiom natu,
ve nimam itatan katin ghou.
 
Atem yabyab payou kat. Tauto tinig isob isami wa. Anoŋag, babaŋa eta ineep pooi maau.
Sosor tiou, tauto tuag tisob tiyabyab ve nasami.
 
Pataŋani to sosor tiou itatan ghou kat inimale dibom tintina tipolpol izala poghog.
Tauto igham pataŋani tiina payou le irau nambaada maau.
You nagham ŋgar to yes borouŋa ve nazoor aliŋam.
Tauto aazne, mbotmboot toman nanag to vuzi samia ne igham ghou.
 
Yabyabuuŋ tiina igham ghou, ve natudtud ve nayakyak.
Tovenen mboŋmaagh ila le rabrab izi, lolog ipataŋan ve nataŋtaŋ.
 
Tinig ituntun kat, ve anoŋag isob isami wa.
Anoŋag, babaŋa eta ineep pooi maau.
 
Moroghooŋ tonene igham katin ghou le tapirig isob kat.
Tovenen lolog ipataŋan ve nayakyak.
 
Yoova, yom uwatag: You naghaze uul ghou leso tinig poia.
You lolog ipataŋan ve nataŋtaŋ. Mbeb tonene iyooŋ payom maau.
 
10 Aazne, ateg imbumbu ve tapirig isob.
Tovenen naghog poia muul maau.
11 Nditag ve yes to ruum todi tigharau ghou ne, tighita moroghooŋ tiou tonene, le tineep saguan payou. Tigharau ghou muul maau.
Ve siŋ tiou tovene paam. Tinim tiŋgig ghou rita maau.
 
12 Koiagŋa to tizuaria di tighaze tirab ghou namaat, tighur liis katindi payou.
Mboŋmaagh ila le rabrab izi, yes tisavsaav pa ataam to tiwaghamun ghou.
Lolodi ighurghur pa ataam yoŋgaaŋ pa tiwaghamun ghou.
13 Eemoghon matag ila pa saveeŋ todi tonowen maau.
Neneeŋag moghon nanimale tamtoghon to avo maau ve taliŋa ipam, ve irau isavsaav maau, ve ilooŋ saveeŋ maau.
 
14 Onoon kat, you nanimale tamtoghon to taliŋa ipam ve ilooŋ saveeŋ maau, ve irau ipamuul saveeŋ eta maau.
15 O Yoova, Maaron tiou, you naghur matag payom ve nasaŋan ghom.
You nanumeer ghom naghaze yom pale ulooŋ suŋuuŋ tiou tonene ve uul ghou.
 
16 Maaron, upul pataŋani tonene ilib payou malep. Pa vene, natap, ve koiagŋa tinidi iza, ve tipakur di tighaze tilib payou.
 
17 Ughita. Yabyabuuŋ tonene ipul ghou rita maau.
Moroghooŋ tonene irab matin tapirig le naghaze natap.
 
18 Onoon, you nazoor aliŋam. Tauto aazne, lolog ipataŋan, ve navotia sosor tiou payom.
19 Koiagŋa, ival kat, ve tapiridi tintina.
Ŋgar to tigham payou ne, deŋia maau. Pasa, you nagham sosor eta padi maau. Yes tighur koi payou sorok.
 
20 Ŋgar popoia to muuŋ naghamgham padi, aazne tipamuula pa ŋgar samia.
Yes tighurghur koi payou pasa, you nazuaria ghou pa ŋgar poia moghon. 1Yo 3:12
21 O Yoova, upul murim payou malep.
Maaron tiou, uneep saguan payou malep.
 
22 Yoova, yom to Volaaŋa tiou.
Unum rikia, ve uul ghou!