45
Mbouŋ to kinik vaiuuŋ toni
Mbouŋ to yes Kora
Ŋgeu to imuŋmuuŋ pa mbouŋ irau isaav pa tamtoghon pa timboui itaghon aliŋa ‘kananaŋ ruŋgu pisosooŋa.’
Nene mbouŋ to tamoot ve liva to lolodi pa taudi
1 Lolog ipazaagh ghou pa saveeŋ popoia, tauto natoor mbouŋ tonene iŋarua kinik.
Avog raurau pa toraaŋ mbouŋ, nanimale ŋgeu to nima poia pa bodeeŋ.
2 O kinik, yom paghunam kat ulib pa tamtoghon tisob.
Ve saveeŋ popoia to ivotvot ila avom, nene igham poian tamtoghon.
Tovenen poia to Maaron pale ineep toman ghom irau sawa isob. Lu 4:22
3 Yom ariaŋam, ve uraua kat pa ghamuuŋ malmal.
Izam tiina, ve upambood taum le paghunam kat.
Ugham buza tiom, ve ugharaat ghom pa malmal. Mbo 149:6; Syg 1:16
4 Yom izam tiina kat.
Uza hos tiom, ve ula uparab toman koiamŋa le ulib padi.
Uparab ariaŋa pa saveeŋ onoon, ŋgar to tatatan tauud, ve ŋgar deŋia.
Nimam waan pale igham uraat tintina. Leso koiamŋa tighita ve timatughez. Syg 6:2, 19:11+
5 Kinik tiei, pane tiom ndinatu matadi kat.
Tauto tiŋgal koiamŋa le tiyamaan katin di.
Tovenen yes ndug ndug pale tinim ve titaptap tizi ila aghem samba.
6 Maaron, pooz tiom irau isob ne maau. Pale uneep ila inam to ghamuuŋ pooz itaghoni taghoni gha ila.
Ŋgar deŋia to ughamgham pa tamtoghon, nene inim ghilalooŋ pa pooz tiom. Yo 1:1,14; Hib 1:8
7 Pasa, yom lolom pa ŋgar deŋia, ve ughurghur koi pa ŋgar samia.
Tovenen Maaron tiom ipakur ghom le ulib pa nditam pida, ve iliŋ ŋgoreeŋ izala poghom pa ighur ghom unum kinik.
Tauto igham ghom lolom poia le poia kat. Mbo 11:5, 33:5
8 Nonogiiŋa tiom, tighur naunauŋ vuzi popoia naol ila.
Ruum tiom, tipambooda pa mbeb popoia to tigharaat di pa mbeb ndoŋadi.
Yes to rabuuŋ gita ve mbeb pida to aliŋadi popoia ne, tineep toman ghom ila ruum tiom lolo, ve mbouŋ todi igham ghom lolom poia kat.
9 Ndiliva to ledi izadi tinim tineep toman ghom ila ruum tiom paam. Ve todi pida, nene kinik ndinatudi liva.
Liva paghu to iyoon ila pa nimam waan ve ughaze uvaii, ye garawaat tidi.
Ye itiktiik tau pa mbeb popoia le paghuna kat. Mbeb tonowen, tigharaat di pa gol poia kat to inim pa taan suruvu to Opir.
10 Natug liva, yom ughaze uvai kinik. Tovenen ughur poian taliŋam, ve ulooŋ aliŋag tonene.
Ugham ŋgar pa tamtoghon tiom ve siŋ tiom muul malep.
11 Yom paghunam kat. Pale usad kinik ate.
Ye to inim tiina tiom. Tovenen yom irau ulooŋ aliŋa, ve uneep ila samba.
12 Tamtoghon to ndug Tiro pale tigham lem mbeb popoia katindi.
Yes to mbaliiŋ taudi kat, pale tigham lem mbeb popoia naol. Leso matam iŋgal di ve lolom poia padi.
13 Garawaat tidi to ighaze ivai kinik, ineep ila ruum toni lolo. Ye paghuna le paghuna kat.
Nonogiiŋa toni, tisaii pa teret to tigharaata pa gol.
14 Ye indudi pa nonogiiŋa to bodeeŋadi popoia, ve tighami ila to kinik.
Ndita ndiliva papaghu titaghoni ve yesŋa tila. Syg 19:7+
15 Tamtoghon tinidi iza, ve tighereb di toman lolodi poia, ve tilooŋ tila ruum to kinik.
16 O kinik, yom pale lem ndinatum nditamoot katindi, leso tigham nditimbudi inadi.
Ve yom pale ughur di pa tigham pooz pa ndug ndug.
17 Mbouŋ tiou tonene, tamtoghon pale timboui, ve matadi iŋgal izam itaghoni taghoni gha ila.
Tovenen ndug ndug pale tipait izam irau sawa isob.