60
Tamtoghon to Maaron tighasoni tighaze mata imuul padi
Mbouŋ to David
Timbou mbouŋ tonene pa tipatoot tamtoghon. Mbouŋ tonene iŋarua sawa to David yesŋa yes Aramea, ve Mesopotamia, ve yes Soba tigham malmal, ve Yoab imuul ila ve irab yes Edoma 12,000 izi taan raapa to sol inepneep pani.
1 Maaron, atem yabyab payei, ve upul murim payei.
Tauto koiamai tireu mbirisan didiiŋ ariaŋa to iluvut ndug tiei, ve tilooŋ tinim.
Tiina tiei, matam imuul inim payei, ve ugham nepooŋ tiei poia muul.
2 Ndug tiei isami wa. Malmal to ivot ne, nene inimale ugham taan tiei irur le ivavaal, ve avo ikaak.
Tovenen nitaŋ roran ghom nighaze ugharaat mulin ndug tiei. Pa vene, nisami kat.
3 Yei tamtoghon tiom. Eemoghon ugham pataŋani tiina kat ivot payei. Nighita sawa tonene samia kat.
Mbalmbali tiom iza tiei, le igham ghei niwaghamgham inimale upaghun ghei pa ya ariaŋa.
4 Sawa to pataŋani tonene ighaze ivot payei, yom upatooŋ pilak tiom pa yei to nimatughez payom ve nitaghon ŋgar tiom.
Leso niŋarua ghom nilat, ve upoon ghei pa koiamai.
5 Maaron, yei niwatag: Lolom ineep tiei kat.
Ulooŋ suŋuuŋ tiei tonene, ve upatooŋ tapirim ve uul ghei.
Ugham mulin ghei pa pataŋani tonene.
6 Muuŋ, Maaron ineep izi ndug toni patabuaŋ, ve isaav ighaze:
“You naparab le nalib pa koiagŋa wa.
Tauto tinig iza, ve navalag taan Sekem ve taan raapa to Sukot, ve nareii irau tamtoghon tiou.
7 Taan suruvu to Gileat, ve taan to yes Manase paam, nene you tiou.
Rumai to yes Epraima tinimale hat ariaŋa to napoon dabag pa malmal.
Ve rumai to yes Yuda tinimale titi to nakisi inim ghilalooŋ pa pooz tiou.
8 Taan suruvu to yes Moapa, nene inimale oon tiou to ririwaaŋ.
Ve taan suruvu to yes Edoma, nene ndug to napiyaav duduuŋa to agheg izala.
Ve yes Pilistia, you naparab toman di le nalib padi. Tauto tinig iza ve nalool.”
9 Sei irau igham ghou nalib pa koiagŋa ve nalooŋ nala ndug todi to didiiŋ ariaŋa iluvuti we?
Sei pale imuuŋ payou, ve ighereb ghou nala navot taan suruvu to yes Edoma?
Ite paam maau. Yom moghon.
10 Eemoghon Maaron, aazne yom upul murim payei, ve unum toman ndaaba tiei muul maau.
11 Maaron, uul ghei nilib pa koiamai.
Pasa ulaaŋ to nighamghami ila to tamtoghon, nene iraua maau. Nene mbeb sorok.
12 Eemoghon ighaze Maaron inim toman ghei, nene pale nilib padi.
Ye irau itatan di le tapiridi isob kat.