63
Suŋuuŋ to tamtoghon to ikausim pa Maaron ighaze ineep igharaui
Mbouŋ to David
Mbouŋ tonene iŋarua sawa to David ineep izi ndug balim to Yudea
O Maaron, yom Maaron tiou.
Mboŋmaagh kat, suŋuuŋ tiou iŋarua ghom naghaze unum uneep digeg.
You nakausim payom naghaze nalat nagharau ghom, ghoro poia.
Pasa aazne, naneep saguan payom.
You lolog payom kat, nanimale ŋgeu to ilaghlaagh ila ndug to le ya maau, ve murun matini. Mbo 42:2, 84:2
 
Pasa, matag iŋgal imuul ila pa sawa to naghita ghom ila rumai tiom patabuaŋ lolo,
ve naghita katin tapirim toman ŋgurubam.
Nepooŋag to taan, nene poia. Eemoghon naghita naghaze ŋgar to lolom ineep tuŋia ila to tamtoghon tiom ve uluul di, nene mbeb to poia le poia kat.
Tovenen you pale nalool, ve napait izam ve napakur ghom.
 
Pale napait izam pa poia tiom ila ila le nepooŋ tiou to taan isob.
Pale nakaak nimag iza, ve nasuŋ payom.
Pasa, yom ugham lolog poia kat inimale naneep ila ghanghaniiŋ, ve naghan aniiŋ to poia ve ŋgoreeŋa kat le isooŋ katin ghou.
Tauto lolog poia kat, ve nambou pa napait ghom. Mbo 23:5+; Mt 5:6
 
Sawa to nazi nagheen, matag iŋgalŋgal ghom.
Naghamgham ŋgar payom pa mboŋ ila ila le ndugizau.
 
Pasa, yom to Ulaaŋa tiou.
You naneep pooi ila nimam samba inimale tatareek ndinatu tiyooŋ ila tinandi bage samba. Tauto tinig iza, ve namboumbou.
 
You lolog ineep tuŋia ilat tiom,
ve nimam waan ipapalot ghou.
Yes to tizuaria di tighaze tirab ghou namaat, taudi pale timaat ve tizila ndug to mateeŋa.
 
10 Pale buza ighan di timatmaat,
ve ŋgavuun sagsag tighan patudi.
11 Eemoghon kinik tiei, Maaron pale iuuli, ve ighami lolo poia kat.
Ve tamtoghon tisob to tiwaat Maaron iza pa tipariaaŋ saveeŋ mbuaaŋ todi ve titaghoni, yes paam pale tipait Maaron iza pa tapiri ve poia toni.
Eemoghon yes to avodi kaarom, Maaron pale ipoon avodi.