89
Yes Israela tigham ŋgar naol tighaze saveeŋ to Maaron imbua toman David, pughu vena to Maaron itaghoni maau?
Mbouŋ tonene to Etan, ye Ezra paghu toni
O Yoova, you pale nambou ve napait ghom irau sawa isob. Pasa, lolom ineep tuŋia ila to tamtoghon tiom ve uluul di.
Ve ŋgar tiom to utataghon saveeŋ mbuaaŋ tiom tovene paam, avog pale ivovotia pa tamtoghon to aazne, ve iseeŋga itaghoni taghoni gha ila.
 
Pale navotia ghom pa tamtoghon naghaze: Ŋgar to lolom ineep tuŋia ila to tamtoghon tiom ve uluul di, nene pale inepneep tovene itaghoni gha ila.
Ve ŋgar to taghoniiŋ saveeŋ mbuaaŋ tiom paam, nene ineep tuŋia irau sawa isob, inimale sambam paroŋania.
3-4 Muuŋ, yom usaav ughaze: “You nasia mbesooŋa tiou David ve nambua saveeŋ tomani.
Saveeŋ tonene, napariaaŋa le iyaryaaŋ kat naghaze:
‘You pale napalot papaghu tiom, ve naghur di tinim kinik irau sawa isob. Yes pale tineep ila inam to ghamuuŋ pooz, ve tiŋgin yes Israela itaghoni taghoni gha ila.’ ”
Yoova, yes aŋela patabuaŋa tiluplup di izi sambam, ve tipapait izam pa mbeb gharatooŋadi to ughamgham di.
Yes tipapakur ghom pasa, yom utataghon saveeŋ mbuaaŋ tiom. Syg 4:8
 
Yoova, sei to irau ghom?
Yes to tineep izi sambam, yom ulib padi tisob.
Aŋela eta irau ghom maau.
 
Sawa to yes daba to aŋela patabuaŋa tilup di pa savsaveeŋ izi ndug sambam, yes tiyoon luvutin ghom, ve timatughez ve tapait ghom.
Pasa, tapirim tiina, ve ulib padi kat.
Yoova, yom Maaron ariaŋam kat, ve uŋgin mbeb tisob. Sei tapiri tiina kat inimale yom? Eta maau.
Ve yom utortoor ŋgar tiom maau. Moghon moghon, utataghon saveeŋ mbuaaŋ tiom.
Yom to uŋgin te.
Ighaze yaghur tiina imundig, ve ipei dibom tintina, yom irau ugham dibom imaat, ve taun izi.
 
10 Muuŋ kat, yom urab balagin Rahab daba ve imaat. *
Nimam pataŋani. Tauto urab matin koiamŋa, ve ureu mbirisan di tighau.
11 Sambam ve taan, nene tiom.
Pasa, yom to ughur di toman mbeb tisob to tineep ila. Mbo 24:1
 
12 Yom ughur taan to ineep ila pa rag, ve ila imuul yavaar pughu.
Lolooz Tabor ve lolooz Hermon lolodi poia, ve timboumbou ve tipait izam.
13 Yom ariaŋam ve tapirim tiina.
Nimam waan, nene ariaŋa ve ŋguruba kat. Tauto urab koiamŋa ve ulib padi.
 
14 Ŋgar deŋia toman ŋgar to gabizooŋ tamtoghon itaghon ŋgar deŋia, tauto inim pughu pa pooz tiom.
Ve ŋgar tisob to ughamgham di, nene tipatooŋ ghom tighaze: Lolom ineep tuŋia ila to tamtoghon tiom ve uluul di, ve utataghon saveeŋ mbuaaŋ tiom.
15 Yes to tilup di pa suŋuuŋ, ve tilolool ve tipait izam,
tilaghlaagh ila ghazooŋa tiom, ve poia tiom izaza todi.
Yo 8:12; 1Yo 1:7
 
16 Yes tiwatag ghom toman ŋgar tiom.
Tovenen ndag to naol ne, mboŋmaagh ila le rabrab izi, lolodi poia kat, ve tipapait izam pa ŋgar tiom deŋia.
17 Yei nigham tapirimai ilat tiom, tauto tinimai iza, ve izamai ivot inim tiina.
Poia tiom, tauto igham tapirimai ivot le nilib pa koiamai.
 
18 Yoova, yom usia ŋgeu to inim sigeu payei. Ye to iponpoon koiamai.
Maaron patabuaŋ to yei Israela, yom ughur lemai kinik pa igham pooz payei.
Saveeŋ mbuaaŋ to muuŋ Maaron igham pa David
 
19 Yes to lolodi ineep tuŋia ilat tiom ve titaghon ataam tiom, muuŋ kat, yom upaghazoŋan di pa ŋgar to ughaze ughami. Yom usaav padi ila tandagiiŋ ughaze:
“Ndaaba ariaŋa eez inepneep ila lolomim.
You taug nasia ve naghuri inim kinik. Tauto nauuli ve nagham iza ivot inim tiina.
 
20 You naghita mbesooŋa tiou David, ye iraua.
Tauto naliŋ ŋgoreeŋ tiou patabuaŋ izala daba, ve naghuri pa uraat. Mbaŋ 13:22
 
21 Ye pale inepneep ila nimag,
ve napaloti irau sawa isob.
 
22 Tovenen koiŋa irau tilib pani maau, ve ndiran samsamia irau titatani maau.
 
23 Pasa, you taug pale namuuŋ pani, ve natatan koia le tapiridi isob.
Yes to tighur koi pani, you pale narab di tisob timatmaat.
 
24 You pale nataghon saveeŋ mbuaaŋ to nagham pani, ve lolog ineep tuŋia ila toni, ve naghur poia tiou izaza toni.
Pale naneep tomani ve napaloti, leso tapiri ivot inim tiina, ve ilib pa koia. Tovenen iza pale inim tiina kat.
 
25 You pale nagham ival tiina tineep ila samba.
Yes to tineep izi naari to Te Mediterenian, ve ila imuul ya Euprates dige.
26 Ye pale isaav payou ighaze: ‘You Tamaŋ yom.
Yom to Maaron tiou, ve Volaaŋa tiou ariaŋa. Yom uponpoon ghou pa koiagŋa unumale yaam tiina.’
 
27 Ve you pale naghami inim natug aidaba.
Tovenen ye pale iza tiina kat, ve ilib pa kinik tisob. Ep 1:20+; Kol 1:18; Syg 1:5
 
28 Pale lolog ineep tuŋia ila toni ve nauuli irau sawa isob.
Ve saveeŋ to nambua pani, tovene paam. Pale ineep tuŋia tovene itaghoni taghoni gha ila.
Saveeŋ to Maaron imbua pa David papaghu toni
 
29 Siŋ toni irau isob maau. Pale naŋgin papaghu toni, ve tineep pooi itaghoni taghoni gha ila tinimale sambam paroŋania.
Pale tineep ila David ina to ghamuuŋ pooz, ve tiŋgin yes Israela irau sawa isob. Lu 1:33; Hib 1:8
30 Eemoghon ighaze papaghu toni tipul muridi pa saveeŋ tiou,
ve laghooŋ todi, tisosor pa tutuuŋ to naghuri,
 
31 ma tiveleg tutuuŋ tiou to ineep pataghaaŋ inimale mbeb sorok, ve timalaaŋ pa tutuuŋ tiou ŋgara,
 
32 nene pale naŋgal matadi pa ŋgar todi to zoraaŋ saveeŋ,
ve nalos matin di pa sosor todi.
33-34 Eemoghon ŋgar to lolog ineep tuŋia ila to David ve papaghu toni, ve nauluul di, nene irau napuli maau. Pale inepneep tovene itaghoni taghoni gha ila.
Ŋgar tiou to natataghon saveeŋ tiou, nene irau napuli maau.
Tovenen saveeŋ to nambua toman David, irau nareua maau.
Saveeŋ to ivot ila taug avog, irau natoora maau.
 
35 Pasa, you Maaron patabuaŋ. Tovenen saveeŋ mbuaaŋ tiou to napariaaŋa le iyaryaaŋ kat, nene pale inepneep tovene itaghoni taghoni gha ila.
Irau natombaan David maau.
 
36 Tovenen siŋ toni irau isob maau. Pale iseŋseeŋga itaghoni taghoni gha ila.
Pale matag padi, ve pooz todi iyaryaaŋ inimale ndag, ve inepneep tovene.
 
37 Pooz todi pale tuŋia irau sawa isob inimale kaiyo.
Kaiyo to ineep ila sambam paroŋania, nene ipatooŋ saveeŋ mbuaaŋ tiou tonene ighaze, nene onoon.”
Taŋiiz to yes Israela iŋarua Maaron pa kinik todi
 
38 Yoova, muuŋ yom umbua saveeŋ ariaŋa tovene pa David ve papaghu toni.
Eemoghon aazne, atem yabyab kat pa kinik tiei to taum usia ve ughuri pa uraat.
Yom lolom pani muul maau, ve upul murim pani kat.
 
39 Saveeŋ mbuaaŋ to muuŋ ugham pa mbesooŋa tiom, aazne ureua wa.
Ve uzugua moghar toni izi pa daba, ve upiyaava izila ghavuur.
 
40 Didiiŋ ariaŋa to iluvut ndug toni, yom ureu mbirisani izi.
Ve uwaghamun ruum toni ariaŋadi paam, le tisob timbiriis.
 
41 Tovenen tamtoghon tisob to tilala tinimnim, tiyubyub mbeb toni.
Ve yes ndug ndug to tineep tigharaui, tivelegi ve tighamgham ŋalalaŋ pani.
 
42 Yoova, yom taum upalot kinik tiei koia, ve tiparab ariaŋa le tilib pani.
Tauto tisob lolodi poia, ve tipakur taudi.
 
43 Sawa to kinik tiei igham malmal, yom upaloti maau,
ve upamuul buza toni mata imuul pa tau.
 
44 Tovenen mbeb toni popoia to ye iza tiina pani, yom uŋguaaz di pani,
ve ureu ina to ghamuuŋ pooz izi taan.
 
45 Ye ŋgeu paghu. Eemoghon ugham koia tilib pani, tauto igharaat tau maau, ve ipul tau. Taghita inim olman waat.
Yes Israela tighason Maaron pa igham mulin di pa pataŋani todi
 
46 O Yoova, pale ŋeez o matam inim payei muul?
Vena, pale uŋgooz matam payei, ve mbalmbali tiom izaza tiei itaghoni taghoni gha ila?
 
47 Yoova, matam iŋgal: Yei tamtoghon to taan nineep mala maau.
Onoon, yom taum ughur ghei. Eemoghon, pale nisob nimatmaat ninim mbeb sorok. Mbo 39:5
 
48 Sei irau imaat maau, ve ineep mata iyaryaar itaghoni taghoni gha ila?
Ma sei irau ipaghau tau pa mateeŋ? Eta maau. Mbo 49:7+
49 Yoova, muuŋ yom umbua saveeŋ toman David, ve upariaaŋa le iyaryaaŋ kat ughaze pale lolom ineep tuŋia ila toni, ve uuli irau sawa isob.
Eemoghon aazne, poia tiom tonanan ineep sine? Vena to utaghon saveeŋ mbuaaŋ tiom muul maau?
50 O Yoova, you mbesooŋa tiom. Matam iŋgal ghou ve uul ghou lak!
Pasa aazne, ndug ndug tipamayaŋin ghou,
ve tiveleg ghou le lolog isami kat.
 
51 Yoova, yom taum usia ghou, ve ughur ghou nanim kinik.
Ughita. Ndug sine to nala pani, nene koiamŋa tiwamogheran di payou,
ve tipiyaav saveeŋ velegiiŋ payou.
52 Tapait Yoova pa poia toni irau sawa isob.
Onoon le onoon kat!
* 89:10 Muuŋ tighur ila tighaze mbeb samia tiina eez ineep ila te lolo, iza Rahab. Nagho inimale moot ma poghai, ma venen. Sawa isob, ye izuzuaria tau ighaze iwaghamun mbeb. Ve tighaze muuŋ kat, Maaron yesuru Rahab tiparab, ve Maaron ilib pani. Tauto aazne, Rahab iwaghamun mbeb muul maau.