27
Yakop ium palotiiŋ to ŋeer aidaaba
1 Olman Isak imin kooŋ wa. Ve maata ikumkuum, le irau ighita nugh muul mako. Saawe ee, i ipoi naatu olman Esau ighe: “Natug!”
Esau iyok pa aliiŋa ighe: “Taug ene. Saa?”
2 Ra olman Isak isaav pani ighe: “Ulooŋ. Yau namin kooŋ wa, ve nakankaan pa mateegh tsiau.
3 Tauvene ugham paneegh tsio, ve ula pa su gha uil leg aniiŋ ziigha.
4 Leso ugharaat leg sur poia tau lolog pani kat na, ve ughamu ilam naghun. Mako naghur poia to Maaron izaa tsio. O ighe namaat, na namaat lak.”
5-6 Isak yesuru naatu Esau tisavsaav, ve olman tinazi Rebeka taliiŋa isaut saveeŋ toozi. Tauvene Esau ila pa su ighe iil aniiŋ ziigha, ve Rebeka isaav pa naatu Yakop ighe: “Ŋgarig nalooŋ tamam isaav pa togham ighe:
7 ‘Esau, ugham aniiŋ ziigha eta to su ilam ve ugharaat leg sur poia tau lolog pani kat na, ve ughamu ilam naghun. Mako naghur palotiiŋ tsiau izaa tsio ila Maaron maata. O ighe namaat, na namaat lak.’
8 Tauvene natug, ulooŋ aliŋag, ve utaghon saveeŋ tsiau tane.
9 Ula nugh tau ŋgai toit tilepleep pani we, ve ughita mekmek paghpaaghu ruta tomania tumbuŋazi, ve ugham zi tilam. Yau aat nagharaat tamam le sur poia tau i loolo pani kat.
10 Leso ughamu ila pani gha ighun. Ve ighur poia to Maaron izaa tsio le isov, o imaat.”
11 Eemon Yakop iyol tiina aliiŋa ighe: “Tinaŋ, aliŋam poia. Eemon toghag Esau, i tiini ororomai. Ve yau mako.
12 Ighe tamaŋ itut ghau rig, ene pale ighilaal ghau, ve igham ŋgar ighe yau nagham mogheraaŋ pani. Mako ighur poia to Maaron izaa tsiau mako, ve ighur pataŋani izaa tsiau.”
13 Eemon tiina isaav pani ighe: “Natug, ugham ŋgar naol sov. Ulooŋ aliŋag tane, ve utaghoni. Ighe i ighur pataŋani izaa tsio, ene pale yau nabaad pataŋani tana. Ula ugham mekmek tilam.”
14 Tauvene Yakop iburig, ve ila igham mekmek ru tilam pa tiina. Rebeka niima rekrekia pa gharatooŋ sur poia tau Isak loolo pani na.
15 Le isov, ve ila igham nonoghiiŋa poia kat to naatu olman Esau tau igheen balbaal tooni loolo na, ve ighamu ila to Yakop, leso inonogh ghi pani.
16 Ra ikau mekmek uuli ila Yakop luua ve ila niima paam.
17 Ve igham sur tomania mberet tau i igharaata na, ve ighuru ila to Yakop.
18 Yakop ila to taama, ve ipoii ighe: “Tamaŋ, nalam wa!”
Taama Isak ighe: “Natug, taug ene. Ve yo sei?”
19 Yakop isaav pani muul ighe: “Yau Esau, natum aidaaba. Sur tomania aniiŋ ziigha tau yo usaav payau pani na, tauta naghamu nalam. Uburig gha ughun, ve ughur poia to Maaron izaa tsiau.”
20 Isak ilooŋ saveeŋ tane, ve ighasoni ighe: “Wai, natug, mindai ta yo undeeŋ gabua rekia mon?”
Yakop iyol aliiŋa ighe: “Maaron tsio Yoova iuul ghau. Tauta rekia mon ve nandeeŋa.”
21 Ra Isak isaav pani muul ighe: “Natug, ulam ugharau ghau, ve nataaŋ ghom. Leso nawatagh kat: Yo natug Esau, ma mako?”
22 Tauvene Yakop ila igharauu, ve taama itaaŋo, ra isaav pani ighe: “Aliŋam imin Yakop aliiŋa. Eemon nimam imin Esau niima.”
23-24 Isak ighilaal Yakop mako. Pasaa, niima ororomai imin toogha Esau. Tauvene Isak ighe ighur poia to Maaron izaa tooni. Eemon loolo ruru soone. Tauvene ighasoni muul ighe: “Onoon, natug Esau taum tane?”
Yakop iyol aliiŋa ighe: “Vee, yau taug tane.”
25 Tauvene Isak isaav pani ighe: “Natug, ugham sur tana ilam. Lolog pa ghunuuŋ sur tau yo ugharaata tomania ziigha to su na. Naghun le isov, mako naghur poia to Maaron izaa tsio.” Tauvene Yakop igham sur ila to taama Isak gha ighun. Ve igham le yaa vaen paam ila ighun.
26 Taama Isak ighun le isov, ve isaav pani ighe: “Natug, ulam usaghav ghau.”
27 Tauvene Yakop ila isaghav taama. Isak inuŋuz Esau vaazi tau igheen ila nonoghiiŋa tooni, ve ighur poia to Maaron izaa to Yakop ighe:
“Aa, natug tane vaazi,
imin su tau poia to Maaron igheen pani na!
28 Maaron aat igham uwam tiina to sambam izi payo, ve ipabees taan tsio.
Leso ŋgoreeŋa tiina, ve aniiŋ ve vaen katini tivot payo.
29 Nugh nugh pale tibees payo.
Ve taan siriv tamtamona pale tiput aghezi payo ve tipakur ghom.
Yo pale umin tiina pa toŋvetaz tsio,
ve tinam natŋa tiput aghezi payo.
Tamtamon tisov tau tighur saveeŋ pataŋani izaa tsio, ene pale tauzi tindeeŋ pataŋani.
Ve yes tau tighason Maaron to ighur poia tooni izaa tsio, ene pale poia tooni izaa toozi paam.”
Esau itaŋ rarai taama ighe ipaloti paam
30 Isak ighur poia to Maaron izaa to Yakop le isov, ra Yakop ipuli, ve ivot gha ila. Malau mako ve toogha Esau ileep su gha ivot.
31 I paam igharaat sur poia kat, ve ighamu ila pa taama, ve isaav pani ighe: “Tamaŋ, yau nagharaat sur tsio tomania ziigha to su, tauta naghamu ilam wa! Uburig gha ughun, ve ughur poia to Maaron izaa tsiau.”
32 Isak ilooŋ saveeŋ tooni, ve ighasoni ighe: “Wai, yo sei paam?”
Esau iyol aliiŋa ighe: “Yau Esau, natum aidaaba.”
33 Isak ilooŋ saveeŋ tane le tiini irur kat, ve isaav pani ighe: “Waii, yo ulam soone, ve ŋeer ee igham sur tomania ziigha to su ilam gha naghun. Sei ne? Yau naghur poia to Maaron izaa tooni wa. Ve onoon kat, palotiiŋ tawe aat igheen tooni.”
34 Esau ilooŋ taama saveeŋ tooni, le loolo isaghat pa tauu, ve itaŋ tiina, ve itaŋ rarai taama ighe: “O tamaŋ, ughur poia to Maaron izaa tsiau paam!”
35 Eemon Isak isaav pani ighe: “Wai, palotiiŋ tau naghe nagham payo, tauta tazim ilam itombaan ghau gha ighamu ila wa!”
36 Tauvene Esau isaav ighe: “Oyais, ŋeer tawe, tiwaat eeza Yakop le iduduuŋ kat!
Pasaa, i itombaan ghau pai ru wa! Muuŋ, itombaan ghau gha igham niag imin ŋeer aidaaba. Ve aazne, ium palotiiŋ tsiau paam.” Ra Esau ighason taama muul ighe: “Tamaŋ, mindai? Lem palotiiŋ eta payau mako?”
37 Isak iyol aliiŋa ighe: “Wai, yau naghur tazim imin tiina payo, ve naghur toŋvetaz tsiam tisov timin besooŋa pani wa. Ve naghason Maaron to igham aniiŋ ve vaen anoŋazi katini tivot pani, leso ileep poi. Tauvene natug, gabua eta igheen muul to nagham payo ne mako.”
38 Eemon Esau itaŋ rarai taama muul ighe: “Tamaŋ mindai? Palotiiŋ tsio eemon geeg tawe? Ite paam mako? O tamaŋ, ughur poia to Maaron izaa tsiau paam!” Ra Esau itaŋ muul toman aliiŋa tiina.
39 Taama Isak iyol aliiŋa ighe:
“Nugh tsio to lepoogh, pale igheen malau pa taan ŋgoreeŋa,
ve uwam to sambam irau izi payo mako.
40 Yo aat uparav pa mbuzaagh, o uleep poi.
Ve yo pale umin besooŋa pa tazim.
Eemon murei pale uzoor pooz tooni,
ve irau iŋgin ghom muul mako.”
Rebeka iil eez to ipaghau Yakop pa toogha Esau
41 Esau ikis aatyavyav tooni pa Yakop ariaaŋ. Pasaa palotiiŋ tooni, tauta taama ighuru izaa to Yakop wa. Tauvene igham ŋgar ila loolo ighe: “Malau mako pale tamamai imaat. Moŋiiŋ tooni ighe isov, mako narav tazig Yakop imaat.”
42 Eemon titig Rebeka taliiŋa pa ŋgar tau Esau ighe ighamu. Tauvene ipoi Yakop ilam, ve isaav pani ighe: “Natug, ulooŋ. Togham Esau ighe irav ghom umaat, o loolo poia ve aate izi.
43 Tauvene ulooŋ aliŋag, ve uburig rekia mon, ve ughau ula pa livug Laban tau ileep izi nugh Aran we.
44 Ula uleep tomania le togham aate izi o.
45 Isaav ighe loolo iluum, ve loolo iveegh pa ŋgar tau ugham pani na, ene pale nambaaŋ ilat payo, o umuul ulam. Pasaa, yau naroi: Pale yamru aparav ve amaat pa saawe eemon.”
46 Ra Rebeka isaav pa Isak: “Oyai, rauaan livaŋa tau Hita tinazi ne, tinig imum pazi kat. Lolog pa Yakop ivai livaa eta to taan tane imin yes tane mako. Mako le mako kat. Ighe i igham tauvene, poia to namaat gha nala. Naleep pasaa?”