127
Poia to Maaron, tauta igham uraat toit ighur anooŋa
Mbouŋ to yes tau tizala Yerusalem pa suŋuuŋ
Mbouŋ to Solomon
1 Yes to raoŋ ruum, isaav ighe Yoova ileep tomani zi pa uraat toozi mako, ene pale tirav tauzi sorok.
Ve yes tau timamaat ve tiŋgin nugh pa mboŋ na paam.
Isaav ighe Yoova iŋgin nugh toozi tawe mako, ene pale timamaat sorok.
2 Isaav ighe monmon ugham ŋgar naol ughe: “Pale leg aniiŋ ma gabua irao, ma mako?” Ve upaburigin uraat pa mboŋoozo geeg, ve ukiskisi ila ila le mboŋ anooŋa, ene urav taum sorok.
Pa poia tooni, tauta igham uraat toit ighurghur anooŋa ivotvot.
Tauvene yes tau Maaron loolo igheen toozi na, lolozi bubu mako, ve tigheen poi pa mboŋ.
3 Ve natuunŋa tau tapoop zi na paam, Yoova ighe igham poghani ghiit, tauta igham zi pait itaghon tauu poia tooni.
4 Isaav ighe ŋeer paaghu eta azaawa ipoop le zitamoot siriv,
ene natŋa tawe pale tiyooz pani imin paneegh natŋa to yes zaaba.
5 Tauvene tamtamon tau le natŋa zitamoot katini, ene pale tintini pa poia to Yoova tau izaa tooni na.
Ve murei, isaav ighe yesŋa koiŋa tivazorai zi pa savsaveeŋ izi maaran, ene koiŋa irau titatani ve tipamayaŋini mako. Pa natŋa tawe pale tiyooz pani, ve tiuule pa savsaveeŋ.