139
Maaron ileep tomani ghiit irau saawe
Mbouŋ to David
Yoova, yo ugabiiz poghania lolog,
ve uwatagh katin ghau. *
 
Isaav ighe mboleg izi pa mariaoŋ, ma naburig nala pa uraat, na yo uwatagh ghau wa.
Ighe yau naleep malau payo, na yo uwatagh ŋgar tsiau isov. Pasaa, yo matam malaua. *
 
Saawe tau nalaagh nala pa nugh eta, ma naghe nazi nagheen, na yo ughitghit ghau ve ugagabiiz ghau.
Tauvene ŋgar naol tau naghamgham zi na, yo uwatagh zi tisov. *
 
Yoova, saveeŋ tau ighengheen ila lolog, ve nasavia ivot soone,
ene paam, yo uwataghi wa.
 
Yo umuŋmuuŋ payau, ve ulaghlaagh murei payau.
Ve nimam ikiskis ghau, ve ipapalot ghau.
Yau nagham ŋgar pa ŋgar tsio tana, le narao mako.
Pasaa, ŋgar tsio, ene ite. Iliiv ghau kat. *
Isaav ighe yau naghau payo, pale nala sindei?
Irau nayooŋ pa matam mako. *
 
Isaav ighe nazala pa sambam, yo ulepleep ta sewe.
Ve ighe nagheen ila nugh to mateegha, yo ulepleep ta sewe paam.
 
Isaav ighe naroov nala pa nugh tau aaz izaa pani,
ma naghur niag to lepoogh ila te ziige ite tau aaz izila pani,
 
10 ene paam, yo ulepleep tomani ghau.
Ve nimam tapir aat ikis ghau, ve ipaduduuŋ ghau pa laghooŋ.
 
11 Ve ighe naghason ndoroom to ilam ikau ghau,
ma nasaav pa ghazooŋa tau isul livutin ghau to imin ndoroom,
ene paam irau iŋgooz ghau pa matam mako.
 
12 Pasaa, ndoroom irau ipoon gabua eta pa matam mako.
Mboŋ, yo ughita gabua isov tigheen ghazooŋa raraate imin ughit zi pa mataaz.
Tauvene ndoroom ve ghazooŋa, ene raratezi mon ila yo matam.
13 Yo ta ughur gabuaŋag naol isov,
ve ulup zi timin eemon iloŋ ila tinaŋ aapo loolo. *
 
14 Yau nawatagh kat: Uraat tsio ta naol ne, popoiazi ve ite kat.
Tauta naroi payo, ve napait ghom.
 
15 Saawe tau naleep imin yoŋgaaŋ ila tinaŋ aapo loolo, yo ughita tuag titum ve tivaseŋgai zi.
Gabua tau ivot payau pa saawe tana, eta iyooŋ pa matam mako.
 
16 Tauvene saawe tau tinaŋ inaam ghi payau, yo ughit ghau wa.
Ve saawe to lepoghag izi taan, tomania saa gabua tau pale ivot payau, ene lolom ighur pani, ve tiboode ila rau tsio pataghaaŋ, ra tinaŋ ipoop ghau.
17 Aa Maaron, ŋgar tsio tiina ve paghuuna kat! Yau nazuari ghau naghe le nawatagh katin ŋgar tsio. Eemon narao mako.
Pasaa, yo matam iŋgal gabua katini kat.
 
18 Isaav ighe natoova to nanin zi, ene narao mako. Tiliiv sausau to nari.
Mboŋ, matag iŋgalŋgal ghom tauvene ila le nughizau, ra naburig ve naghilaal naghe yo ulepleep tomani ghau.
19 O Maaron, yau naghe yo urav zeran sasaghati tisov timataar, o poia!
Ve yes tau tiliŋliŋ siŋ pa tamtamon na, upaghau zi tila soghan payau.
 
20 Koiamŋa tawe, tighamgham ŋgar sasaghati naol ila yo ezam.
Tiwatwaat ezam sorok to tipariaaŋ karom toozi.
 
21 O Yoova, yes tau tighurghur koi payo na, yau paam naghurghur koi pazi.
Ve yes tau tizorzoor ghom na, lolog pazi rigta mako.
 
22 Yau naghurghur koi pazi,
ve naghit zi timin koiagŋa kat.
23 O Maaron, ugabiiz lolog ve ŋgar tsiau.
Utoov ghau, leso uwatagh katin ŋgar tau igheen ila lolog ne.
Utiir poghani ghau ve ughita: Ŋgar saghati eta igheen ila lolog, ma mako? *
 
24 Isaav ighe yau nasosor pa eez tsio, na upaduduuŋ ghau. Leso nataghon duduŋaini, ve naleep poia taghon taghon gha ila.
Eez tawe, igheen ta muuŋ ve ilam. *
* 139:1 Mbo 17:3, 44:21; Hib 4:13 * 139:2 Mbo 94:11 * 139:3 Yo 21:17 * 139:6 Ro 11:33 * 139:7 Yona 1:3 * 139:13 Mbo 119:73 * 139:23 Mbo 26:2; Syg 2:23 * 139:24 Mbo 17:3+