31
Suŋuuŋ to ŋeer ee tau inumeer Maaron ve ighur tauu ila Maaron niima
Mbouŋ to David
1 O Yoova, yau nanumeer ghom ve nayooŋ ilat tsio.
Upul koiagŋa titatan ghau sov. Pa ighe tiliiv ghau, ene pale mayag.
Ŋgar tsio iduduuŋ. Tauvene ugham mulin ghau.
2 Ughur taliŋam pa suŋuuŋ tsiau, ve rekia uul ghau!
Yo Uleeŋa tsiau ariaaŋa. Yo uponpoon ghau imin maetaaz tau izala kat.
Ve umin ruum ariaaŋa to nayooŋ ila loolo. Leso gabua eta ivaghamun ghau sov, ve naleep poi.
3 Onoon kat. Yo Uleeŋa tsiau ariaaŋa. Yo uponpoon ghau imin maetaaz tau izala kat. Ve umin ruum ariaaŋa to nayooŋ ila loolo.
Umuuŋ payau ve utotoi eez payau, leso upaghazoŋai ezam tiina ivot ighazooŋ.
4 Ughita liis tau koiagŋa tighuru payau na, ve upasali ghau pani.
Pa yo ta umin niag to yoŋgaaŋ.
5 Yoova, yo Maaron tau utataghon saveeŋ mbuaaŋ tsio.
Aazne, yau naghur taug ila nimam.
Ugham mulin ghau pa pataŋani tane.
6 Yau nanumeer Yoova mon.
Tauvene yes tau tighurghur gabua soroksorok imin maaron pazi ve tibesbees pazi, na yau naghurghur koi pazi.
7 Yau tintinig ve lolog poia payo. Pasaa, yo lolom isaghav tamtamon tsio ariaaŋ ve uluul zi.
Saawe tau lolog ipataŋan kat, ve ateg ipaparav, yo ughita pataŋani tsiau ve uul ghau.
8 Yo upul ghau nala koiagŋa nimazi mako.
Yo upas ghau navot pa pataŋani tsiau, ve ughur ghau naleep poia ila nugh ghazooŋa.
9 Yoova, yau besooŋa tsio. Lolom isaghatin ghau ve uul ghau lak! Pa aazne, pataŋani tiina igham ghau le lolog ipataŋan.
Yau nataŋ tiina le matag isarsar, ve tapirig isov kat.
10 Lolog ipataŋan kat ve nayakyak irau saawe.
Pataŋani tane aat iŋgoor saawe tsiau ilam tuuku.
Igham ghau nayamaan taug naghe tapirig isov.
Yau nakoŋkoŋ kat le tuag isov peria.
11 Koiagŋa tisov tigham ŋalalaŋ payau.
Ve yes tau tileep tigharau ghau ne paam, tipaŋiŋizai ghau.
Zetagŋa lolozi pa tilam tigharau ghau mako.
Ve yes tau tighit ghau izi eeze na, tiroi ve tilaagh eez ziige ite.
12 Tamtamon matazi iŋgal ghau muul mako. Tighit ghau imin ta namaat wa.
Yau namin uur tau ivavaal ve tisiki ilale.
13 Yau nalooŋ eval tiina tivakamunai zi payau.
Koiagŋa tilup zi ve tiil eez to tirav ghau namaat.
Tauvene pataŋani naol ilivutin ghau le roiŋ tiina igham ghau.
14 Eemon Yoova, yau nanumeer ghom.
Tauta nasaav payo naghe: “Yo mon ta Maaron tsiau.”
15 Saawe tau naleep izi taan, saa gabua ma ŋgar tau ighe ivot payau, ene yau naleep ila yo nimam.
Upas ghau ila koiagŋa nimazi,
ve upoon ghau pa yes tau tighamgham lilin ghau ne.
16 Yau besooŋa tsio. Lolom poia payau ve ugham poghani ghau.
Yo lolom isaghav tamtamon tsio ariaaŋ ve uluul zi. Tauvene ugham mulin ghau pa pataŋani tane.
17 Yoova, yau nataŋ rarai ghom to uul ghau.
Upul koiagŋa tiliiv ghau ve tipamayaŋin ghau sov.
Utatan zeran sasaghati tawe tapirizi, leso mayazi.
Ve usik zi tizila mateegha niazi, leso tineneeŋ.
18 Upoon avozi. Pa yes zeran to karom.
Tipapait tauzi, ve tivevelegh tamtamon duduŋazi, ve tisiksik saveeŋ sasaghati naol pazi.
19 O Yoova, poia tsio, ene tiina le tiina kat.
Yes tau tiroi payo ve titaghon eez tsio na, yo ughur lezi gabua popoia katini isasaŋan zi.
Yes tau tinumeer ghom ve tiyoŋyooŋ ilat tsio na, yo pale ugham poghani zi ila eval tiina matazi.
20 Yo uŋgooz zi ila zigem.
Tauvene koiazŋa tau tiliil eez pa ravuuŋ zi timaat na, irau tigham gabua eta pazi mako.
Yo uŋgin zi tileep poi ila nimam saamba.
Tauvene saveeŋ sasaghati tau koiazŋa tisiksiki pazi na, irau ivaghamun zi mako.
21 Yau napait Yoova pa poia tooni.
Pasaa, loolo isaghav ghau ariaaŋ, ve igham ŋgar poia kat payau.
Saawe tau koiagŋa tilivutin ghau to tigham malmal payau, i iuul ghau.
22 Imin maata yau naroi naghe Yoova aat iziir ghau naghau pa maata wa.
Eemon mako. Yau nataŋ raraini to iuul ghau, ve i ilooŋ taŋiiz tsiau, ve igham mulin ghau pa pataŋani tsiau.
23 Yam tamtamon to Yoova tau lolomim isaghavu ariaaŋ ve ataghon eez tooni na, aghur lolomim pani kat.
Yes tau titaghon i aliiŋa na, i pale iŋgin zi tileep poi.
Eemon yes tau tiveleghi ve tipapait tauzi na, i pale ighur atuya pazi, ve iyat katin ŋgar toozi tawe.
24 Tauvene yam tau anumeer Yoova ve aghurghur matamim pani na, aroi sov.
Apariaaŋ taumim, ve ayooz ariaaŋ!