37
Poia to Maaron izazaa to tamtamon duduŋazi
Mbouŋ to David
1 Zeran sasaghati tau aazne tipapakur zi na, ugham ŋgar naol pazi sov.
Ve yes to ghamuuŋ sosor na, lolom ighaar pa gabua toozi sov.
2 Pale tileep rig, mako tisaghat imin kikiliiŋ tau aaz ighaazo gha imalai.
Pale timin gabua raua tau mbitaizi, ve tigorgor gha titaptap tizizi.
3 Unumeer Yoova, ve ugham ŋgar poia mon.
Leso gabua eta ivaghamun ghom sov, ve uleep poia izi taan tau i igham pa tamtamon tooni na.
4 Lolom poia pa Yoova tauu.
I pale igham gabua ivot payo itaghon yo lolom.
5 Saa ŋgar tau yo ughe ughamu na, unumeer Yoova, ve ughur taum ila i niima.
I pale iuul ghom, ve itotoi ghom pa eez to utaghoni.
6 I pale igham ŋgar tsio duduuŋa igheen ghazooŋa kat ila tamtamon matazi, imin aaz mbonari.
Tauvene tamtamon pale tighilaal tighe yo lem sosor eta mako, ve ŋgar tsio poia mon.
7 Isaav ighe uraat to zeran sasaghati ilaan poia, ve tiyau lezi gabua naol ila eez saghati,
na ugham ŋgar naol pazi sov.
Atem izi, ve usaŋan Yoova. I tauu pale ighur atuya pazi.
8 Tauvene atem yavyav ve ugham ŋgar naol sov.
Uyai ghom ve utatan atem.
Mako pale aate yavyav tsio tana igherev ghom, ve ugham sosor.
9 Pasaa, Yoova pale ipasov zeran sasaghati gha tilalez.
Eemon yes tau tinumeer Yoova ve tighur matazi pani na, pale tileep poia ila taan tau i igham pa tamtamon tooni.
10 Malau mako pale zeran sasaghati tisov tilalez.
Isaav ighe uil naghozi, ene pale irau ughit zi muul mako.
11 Eemon yes tau titatan tauzi ezazi ve tinumeer Yoova, yes pale tileep poia ila taan tau i igham pa tamtamon tooni.
I pale igham zi tileep poia kat toman tintinizi.
12 Zeran sasaghati tilup zi ve tiil eez to tivaghamunia tamtamon duduŋazi.
Atezi yavyav kat ve tiŋaaŋ maripazi ila pazi.
13 Eemon Yoova, i iŋiŋ pazi.
Pasaa, i iwatagh: Malau mako pale saawe toozi ivot gha tilalez.
14 Zeran sasaghati tipas mbuzaagh toozi to tirav yes mbolaaŋa tau tirau gabua eta mako na.
Ve tidaad paneegh toozi to tivanegh zi.
Tighe tirav yes tau titaghon eez duduuŋa na.
15 Eemon Yoova pale ipamuul mbuzaagh toozi imuul pa tauzi.
Ve paneegh toozi pale ipolpol.
16 Isaav ighe tamtamon duduuŋa eta le gabua ŋgiira mon, ene irau.
Lepoogh tooni pale poia iliiv zeran sasaghati naol tau lezi gabua katini.
17 Pasaa, Yoova pale ipasov zeran sasaghati tapirizi.
Eemon i ipapalot tamtamon duduŋazi, ve iŋgin zi tileep poi.
18 Yes tau lezi sosor ila Maaron maata mako na, Yoova iwatagh lepoogh toozi, ve maata pazi.
Ve gabua tau i igham pazi motot na, ene pale igheen toozi taghon taghon gha ila.
19 Saawe tau ighe pataŋani ivot, yes pale tileep poi.
Isaav ighe pitool ivot, ene pale tirau kat pa aniiŋ.
20 Eemon zeran sasaghati pale tisov tilalez.
Yoova koiŋa pale timatmaat imin manman ruuŋgu tau timalai ve timburur tizi.
Pale tisov imin yav mbuasa tau imbuŋ izaa, ve imbiriis gha ilale.
21 Zeran sasaghati tighamgham bun, ve tiyatu mako.
Eemon tamtamon duduŋazi, yes tireirei gabua toozi pa yes mbolaaŋa.
22 Yes tau poia to Yoova izazaa toozi na, pale tileep poia ila taan tau i igham pa tamtamon tooni.
Eemon yes tau aatyavyav tooni igheen toozi na, i pale ipasov zi gha tilalez.
23 Yes tau titaghon eez to Yoova na, tighamu loolo poia kat.
Ve i pale itotoi eez pazi, ve ipalot zi pa laghooŋ toozi.
24 Tamtamon tauvene, isaav ighe aaghe ilot pa gabua eta, ene irau itap mako.
Pasaa, Yoova ikiskis niima ve ipapaloti.
25 Saawe tau yau kukuag gha ilam aazne namin kooŋ ne, yau naghita Yoova ighur muuri pa tamtamon duduŋazi pai eta soone.
Ve naghita toozi eta naatu pitoola, ve isuŋsuŋ tamtamon pa le aniiŋ soone.
26 Tamtamon duduŋazi matazi reiŋ gabua, ve tiyokyok pa tamtamon to tigham bun ila toozi.
Ve natuzŋa paam timin eez to tamazŋa tighita poia to Yoova izaa to tamtamon.
27 Ughur murim pa ŋgar saghati, ve ugham ŋgar poia mon.
Leso uleep poi ila taan tau Yoova igham payo na taghon taghon gha ila.
28 Pasaa, Yoova loolo pa ŋgar duduuŋa.
Tauvene tamtamon tooni tau lolozi isaghavu ariaaŋ ve titaghon eez tooni na, i irau ighur muuri pazi mako.
I pale iŋgin poghani zi taghon taghon gha ila.
Eemon zeran sasaghati natuzŋa, i pale ipasov zi gha tilalez.
29 Zeran duduŋazi pale tigham taan tau Yoova igham pa tamtamon tooni na,
ve tileep poia ta sewe irau saawe.
30 Saveeŋ tau ivotvot ila tamtamon duduŋazi avozi, ene ŋgar poia igheen ila.
Yes tisasavia ŋgar duduuŋa mon.
31 Tutuuŋ to Maaron toozi igheen ariaaŋ ila lolozi ve ŋgar toozi.
Tauta irau titap mako.
32 Zeran sasaghati tighamgham lilin tamtamon duduŋazi.
Tizuari zi tighe le tirav zi timaat.
33 Eemon Yoova ivolvool to tamtamon tooni. Irau ipul zi tileep ila koiazŋa nimazi ne mako.
Ve isaav ighe tamtamon tipayooz zi pa savsaveeŋ, ene pale Yoova tauu iyooz ila murizi, ve ipaghazoŋai zi ighe lezi sosor mako.
34 Tauvene atem izi, ughur matam pa Yoova, ve utaghon duduŋai eez tooni.
Leso ipakur ghom, ve ezam pa taan tau i igham pa tamtamon tooni na.
Ve yo pale ughita Yoova ivaghamunia zeran sasaghati gha tilalez.
35-36 Muuŋ, yau nawatagh ŋeer saghati ee.
Saawe isov, i ipaparoi tamtamon, ve itatan zi le tileep saghat.
Ŋeer tawe tapiri tiina kat. I imin ai mezepur tiina to Lebanon.
Eemon murei, nalaagh izi nugh tooni, ve naghita ŋeer tana ileep muul mako.
Nail naagho le mako. Aat ila mindai?
37 Matam ila pa yes tau lezi sosor mako, ve ugham ŋgar pa yes tau ŋgar toozi popoia mon na, ve ughita saa ŋgar ta ivotvot pazi.
Ŋeer marowa tau ilup tamtamon timin eemon ve iuluul zi to tileep poia, i tomania paaghu tooni pale tileep poia taghon taghon gha ila.
38 Eemon yes to zoraaŋ Maaron aliiŋa, Yoova pale irav zi tisov timatmaat.
Ve paaghu toozi paam. I pale ipasov zi le tisov.
39 Yoova, i Uleeŋa to tamtamon duduŋazi.
Isaav ighe pataŋani ivot pazi, i pale imin lezi niazi to yoŋgaaŋ.
40 I iuluul zi, ve ipaspas zi pa pataŋani toozi.
I ighamgham mulin zi ila zeran sasaghati nimazi, ve tileep poi.
Pasaa, yes tiŋaruini tila, leso tiyooŋ ila tooni.