51
Suŋuuŋ to tavotia sosor toit
Mbouŋ to David
Mbouŋ tane iŋarui saawe tau David igham sosor tiina ve propet Natan ila iyaoni [2Sam 12:1+]
O Maaron, yo lolom isaghav tamtamon tsio ariaaŋ ve uluul zi.
Tauvene lolom isaghatin ghau ve upul sosor tsiau.
Yau nazoor aliŋam. Eemon poia tsio, ene tiina kat, ve lolom isaghatin tamtamon tsio kat.
Tauvene ureu sosor tsiau isov ilale. *
 
Yau nasosor pa eez tsio, ve nagham ŋgar saghati ila yo matam.
Urughuuz ghau, ve ugham ghau naŋgalaaŋ ila yo matam muul.
Ureu sosor tsiau isov ilale. *
Pa yau naghilaal sosor tsiau wa. Yau nazoor aliŋam ve nasosor pa eez tsio.
Saawe isov, sosor tsiau ighengheen tomani ghau, ve matag iŋgalŋgali.
 
Sosor tau naghamu ne, ene iŋarui ghom mon.
Yau nagham ŋgar saghati ila yo matam.
Tauvene isaav ighe uvotia sosor tsiau ivot ighazooŋ, ene iduduuŋ.
Onoon kat, isaav ighe ugabiiz ghau ve ughur atuya payau, ene sosor mako. *
 
Saawe tau tinaŋ ipoop ghau ve ilam, yau nasosor pa eez tsio.
Saawe tau tinaŋ inaam ghi payau, saghati ikis ghau pataghaaŋ wa. *
Maaron, yo ughe yau nataghon saveeŋ onoon toman lolog.
Tauvene taum upaghazoŋai ghau pa ŋgar popoia.
Leso nakisi tuŋia ila lolog. *
 
Ureu sosor tsiau isov ilale. Leso naŋgalaaŋ ila yo matam.
Urughuuz ghau le naŋgalaaŋ kat imin taitai pisosooŋa. *
 
Yau naghe nalooŋ ghom usaav ughe yo ureu sosor tsiau wa.
Leso tintinig ve lolog poia muul.
Yo ughur pataŋani tiina kat iŋarui ghau pa sosor tsiau. Uul ghau, leso tintinig muul.
 
Ŋgar tsiau naol tau isosor pa eez tsio na, matam ila pani muul sov.
Ureu sosor tsiau isov ilale.
10 Maaron, ugham ŋgar ŋgalaaŋa ivot ila lolog, ve upalot ghau.
Leso nayooz tuŋia muul ve nataghon duduŋai ŋgar tsio. *
 
11 Uziir ghau pa naghom sov.
Ve usan Avuvum Patabuyaaŋ ighau payau sov.
 
12 Muuŋ, yo ugham mulin ghau le lolog poia kat.
Aazne, naghe ugham tauvene payau muul.
Upaburigin ghau, leso matag loŋloŋai payo irau saawe.
13 Ighe ugham tauvene, yau aat napaduduuŋ yes tau tizorzoor aliŋam,
ve yes tau tighamgham sosor na, pale titoor ŋgar toozi imuul ilat payo.
14 Maaron, sosor tsiau to naliŋ siŋ, ene tiina kat. Irau to namaat pani.
Eemon yo Maaron tsiau ve Uleeŋa tsiau.
Tauvene ugham mulin ghau, ve ureu sosor tsiau ilale.
Leso lolog poia kat, ve nambou toman aliŋag tiina, ve napait ezam pa ŋgar tsio duduuŋa. *
 
15 Yau mayag pa sosor tsiau, ve naneneeŋ mon.
Tauvene ureu sosor tsiau ilale. Leso avog pakia, ve napait ezam.
16 Maaron, yo lolom pa nagham ŋgai imin watooŋrau payo mako.
Watooŋrau tau yav ighan dodolini na paam. Imin ta igham ghom lolom poia, kanaŋ naghamu.
Eemon yo lolom pa ŋgar tauvene kat mako.
 
17 Watooŋrau tau yo lolom pani na, ene tauvene: Yau aat natatan taug, ve lolog ipataŋan pa sosor tsiau.
Ene watooŋrau tauu.
Tamtamon tau ighe itatan tauu, ve loolo ipataŋan pa sosor tooni, ene yo irau ughur murim pani mako. *
18 Maaron, ugham poghania nugh Zion itaghon taum lolom.
Ugharaat mulin didiiŋ ariaaŋa tau ilivut Yerusalem na, le izaa iyooz muul.
 
19 Leso nigham watooŋrau tau iduduuŋ ila yo matam.
Pale niyau makau tilam, ve nighur zi izala artaal tsio ve yav ighan dodolin zi.
Leso ughita ve lolom poia kat.
* 51:1 Lu 18:13 * 51:2 Mbaŋ 22:16; Hib 9:14; 1Yo 1:9 * 51:4 Lu 15:21; Ro 3:4 * 51:5 Gnp 8:21; Ep 2:3 * 51:6 Mbo 119:66; Yo 4:23 * 51:7 Is 1:18; Syg 7:14 * 51:10 Ezek 36:26; Yo 3:3+; 2Kor 5:17 * 51:14 Ro 6:23 * 51:17 Mbo 34:18