60
Ŋeer ee ighason Maaron ighe maata imuul ila pa tamtamon tooni
Mbouŋ to David
Timbou mbouŋ tane to tipaduduuŋ tamtamon. Mbouŋ tane iŋarui saawe tau David yesŋa yes Aramea, ve Mesopotamia, ve yes Soba tigham malmal, ve Yoab imuul ila ve irav yes Edoma 12,000 izi nugh duduuŋa tau sol igheen ila.
Maaron, yo atem yavyav payei, ve ughur murim payei.
Tauta koiamaiŋa tireu mbirisai didiiŋ ariaaŋa tau ilivut nugh tsiei ne, ve tiloŋ tilam.
Tiina tsiei, matam imuul ilam payei, ve ugham lepoogh tsiei poia muul.
 
Malmal tau ivot ne, ene imin ugham taan tsiei irur le ivavaal, ve aavo ikaak.
Nugh tsiei isaghat wa.
Tauvene nitaŋ rarai ghom nighe ugharaat mulin nugh tsiei. Mako pale nisaghat le nisaghat kat.
 
Yei tamtamon tsio. Eemon yo ugham pataŋani tiina kat ivot payei. Nighita saawe tane saghati kat.
Aatyavyav tsio izaa tsiei, le igham ghei nivaghamgham imin upaghun ghei pa yaa ariaaŋa.
Saawe tau saghatiiŋ tane ighe ivot payei, yo utotoi pilak tsio pa yei tau niroi payo ve nitaghon ŋgar tsio.
Leso niŋarui ghom nilat, ve upoon ghei pa koiamaiŋa.
 
Maaron, yei niwatagh: Yo lolom igheen tsiei kat.
Ulooŋ suŋuuŋ tsiei tane, ve utotoi tapirim ve uul ghei.
Ugham mulin ghei pa pataŋani tane.
Muuŋ, Maaron ileep nugh tooni patabuyaaŋ, ve isaav ighe:
“Yau naparav le naliiv koiagŋa wa.
Tauta tintinig ve navalagh taan Sekem ve nugh duduuŋa to Sukot, ve nareii irau tamtamon tsiau.
Taan sirivu to Gileat, ve taan to yes Manase paam, ene yau tsiau.
Rumei to yes Epraima timin hat ariaaŋa to napoon dabag pa malmal.
Ve rumei to yes Yuda timin titi tau nakisi imin ilaal pa pooz tsiau.
 
Taan sirivu to yes Moapa, ene imin oon tsiau to ririwaaŋ.
Ve taan sirivu to yes Edoma, ene nugh tau nasik zuzuuŋa to agheg izala.
Ve yes Pilistia, yau naparav tomani zi le naliiv zi. Tauta tintinig ve nasir.”
Sei irau igham ghau naliiv koiagŋa ve naloŋ nala nugh toozi tau didiiŋ ariaaŋa ilivuti na?
Sei pale imuuŋ payau, ve igherev ghau nala navot taan sirivu to yes Edoma?
Ite paam mako. Yo mon.
 
10 Eemon Maaron, aazne yo ughur murim payei,
ve upaak zaaba tsiei muul mako.
11 Maaron, uul ghei, leso niliiv koiamaiŋa.
Pa uleeŋ tau nighamghamu ila to tamtamon, ene irao mako. Ene kaut sorok.
12 Eemon isaav ighe Maaron ilam tomani ghei, ene aat niliiv zi.
I irau itatan zi le tapirizi isov kat.