77
Suŋuuŋ to ŋeer tau ighita ighe Maaron ighur muuri pa yes Israela
Mbouŋ to Asap
Ŋeer tau imuuŋ pa mbouŋ na, aat isaav pa tamtamon to timbou mbouŋ tane itaghon aliiŋa ‘Yedutun’
Yau nataŋ rarai Maaron.
Taŋiiz tsiau iŋaruini naghe ighur taliiŋa pa suŋuuŋ tsiau tane, ve iuul ghau.
 
Saawe tau naleep ila pataŋani tiina loolo, yau nazuari ghau naghe le nagham uleeŋ ila to Maaron.
Mboŋ ve mataaz, naitiit nimag izaa, ve nasuŋsuŋ pani. Irau namariau mako.
Eemon gabua eta irau irav ateg mako.
 
Yau matag iŋgalŋgal Maaron, ve lolog isaghat ve nataŋ.
Naghamgham ŋgar naol. Tauta lolog ipataŋan ve tapirig isov.
 
Mboŋ ta naol ne, Maaron ipul ghau nagheen poi mako.
Lolog ipataŋan kat le irau nasavia saveeŋ eta mako. Naneneeŋ mon.
 
Pasaa, matag iŋgal imuul ila pa ndaman katini tau ila wa.
Ve naŋuzuuv ŋgar tau muuŋ Maaron ighamgham pa tamtamon tooni.
 
Tauvene mboŋ ta naol ne, nagham ŋgar tiina ila lolog,
ve matag iŋgalŋgal naghe:
 
“Mindai, pale Maaron ighur muuri payei, ve ipul ghei nileep saghat taghon taghon gha ila?
Irau loolo poia payei muul mako?
 
Ŋgar to loolo isaghav tamtamon tooni ve iuluul zi, ene isov wa?
Ve saveeŋ katini tau i imbua tomani ghei na, pale izi imin kaut sorok taghon taghon gha ila?
 
Ma Maaron aate yavyav kat, le ighamu loolo iveghai poia tooni?
Tauta loolo isaghatin ghei muul mako ne?”
10 Nagham ŋgar tauvene, tauta nasaav pa taug naghe: “Lolog ipataŋan kat pasaa, Maaron tau ileep saaŋa le saaŋa kat na, itoor ŋgar tooni wa.
Taghita tapiri ilam ilam le aazne, taghita muul mako.”
11 Yoova, yau aat matag iŋgal imuul ila pa uraat tsio tintiina, ve gabua ŋgeretazi tau muuŋ ughamgham zi na.
 
12 Yau aat matag iŋgal uraat tsio ariaŋazi ta naol ne,
ve nagham ŋgar pazi poi.
 
13 O Maaron, yo ughamgham ŋgar patabuyaaŋ mon. Ŋgar tsio ve gabuam, ene maata ite kat.
Maaron ite paam eeza tiina imin yo ne mako. *
 
14 Yo Maaron tau ughamgham gabua ŋgeretazi tintiina.
Utotoi tapirim ivot ighazooŋ ila nugh nugh matazi gha tighit katini wa.
 
15 Yakop ve Yosep paaghu toozi, ene tamtamon tsio.
Muuŋ, ila taum tapirim, yo upas yes Israela tivot pa pataŋani toozi wa. *
 
16 O Maaron, saawe tau yaa tintiina tighit ghom, roiŋ tiina igham zi.
Ve te tau igheen izila siiŋa we, iroi paam, ve imbelmbeluut ghi ilala ilamlam. *
 
17 Saawe tana, taitai gabgabuuŋ ve uman tiina izi.
Ve lalaav lutluutu tiina, ve ighani milmilia ilala ilamlam.
 
18 Yo ugham yaghur tiini ililiit, ve lalaav lutluutu tiina kat.
Ve nugh ighani milia, ve mbonari isul nugh.
Ve yogyoog itok taan gha ilala ilamlam.
 
19 Eez tsio imbut te ve ila pa ziige ite.
Yo uvalagh mazavan, le sirivu ila pa ŋas, ve sirivu ila pa tapir, ve ulaagh ila bodbodaaŋ.
Eemon tighita aghem niia mako. *
 
20 Yo umuuŋ pa tamtamon tsio imin ŋginiiŋ to sipsip.
Ve ughur Mose yesuru Aron tigham naghom, ve tigherev zi gha tila.
* 77:13 Igham 15:11 * 77:15 Igham 6:6 * 77:16 Igham 14:21 * 77:19 Igham 14:22