84
Mbouŋ to yes tau tilaagh nugh malau ve tilam Yerusalem pa suŋuuŋ tiina
Mbouŋ to yes Kora
O Yoova, yo saksakim ve uŋgin gabua naol isov.
Yau lolog pa rumei tsio kat. Pa ene paghuuna kat ve imin niam to lepoogh. *
 
Yau napasawal naghe le naleep ila sirsiir to rumei tsio loolo, o poia.
Maaron, yo uleep matam yaryaare irau saawe.
Tauvene lolog ve ŋgar tsiau isov iŋaŋarui ghom, ve lolog poia kat ve namboumbou payo. *
Yoova, yo saksakim ve uŋgin gabua naol isov.
Yo kinik tsiau ve Maaron tsiau.
Man tau tileep ila sirsiir to rumei tsio loolo na, lolozi poia kat.
Ve maetbooga tiraurau rumazi ila rumei tsio loolo, leso tileep tigharau artaal tsio, ve tipoop natuzŋa ta sewe.
Yes tau tilepleep ila rumei tsio loolo na, poia tsio izazaa toozi ve lolozi poia kat.
Tauta timboumbou ve tipapait ghom.
Yes tau tighamgham tapirizi ilat tsio na, poia tsio izazaa toozi ve lolozi poia kat.
Lolozi iyaryaaŋ tighe le titaghon eez tau ila pa loloz Zion na, leso tisuŋ payo izi ta sewe. *
 
Saawe tau tilaagh ila taan raraate tau le yaa mako na,
yaa katini bolokbolokia ila taan ve tizazaa.
Maaron igham uman izi pa taan tawe, tauta yaa ipot irau nugh.
 
Tauvene tamtamon tooni tapirizi ivotvot, ve tilaghlaagh taghon eez,
le tila tivot Maaron naagho izi loloz Zion.
O Yoova, yo Maaron saksakim ve uŋgin gabua naol isov. Ulooŋ suŋuuŋ tsiau tane.
Maaron to Yakop, ughur taliŋam payau.
 
Maaron, suŋuuŋ tsiei iŋarui ghom pa kinik tsiei tau yo taum usiigho na.
Matam pani ve ughur poia tsio izaa tooni.
Pa i ta imin sigheu payei.
10 Isaav ighe yau naleep ila sirsiir to rumei tsio loolo pa aaz eemon geeg,
ene igham ghau lolog poia iliiv saawe ndiŋndiŋ ndiŋndiŋ tau naleep izi nugh siriv.
 
Yau lolog pa naleep tomania zeran sasaghati ila ruum toozi mako.
Yau naghe le naleep ataman aavo to Maaron tsiau rumei tooni, o poia.
11 Maaron toit Yoova, ghazooŋa tooni isul ghiit imin aaz, ve i imin sigheu pait.
I ighamgham poghani ghiit, ve igham ezaan ivot imin tiina.
Yes tau laghooŋ toozi iduduuŋ ila maata na, i irau iŋguruut gabua poia eta pazi mako. *
12 O Yoova, yo saksakim ve uŋgin gabua naol isov.
Yes tau tinumeer ghom na, poia tsio izazaa toozi ve lolozi poia kat. *
* 84:1 Mbo 27:4 * 84:2 Mbo 42:1, 63:1 * 84:5 Hib 11:13+ * 84:11 Mbo 34:10 * 84:12 Mbo 2:12