88
Suŋuuŋ to ŋeer tau ileep ila pataŋani tiina loolo
Mbouŋ to yes Kora
Heman, tau paaghu to Ezra na itoor mbouŋ tane
1 Yoova, yo Maaron tsiau ve Uleeŋa tsiau.
Mataaz ta naol ne, nataŋtaŋ toman aliŋag tiina iŋarui ghom naghe uul ghau.
Ve mboŋ paam, nalam naleep ila naghom, ve nasuŋsuŋ payo.
2 Ulooŋ suŋuuŋ tsiau tane.
Ughur taliŋam pa taŋiiz tsiau, ve uul ghau.
3 Pa pataŋani naol itatan ghau,
ve naghita naghe naleep ila naal aavo wa.
4 Tamtamon tighit ghau tighe paita namaat ve nazila nugh to mateegha tane.
Pa tapirig isov kat wa.
5 Tamtamon tighit ghau imin namaat wa. Tauta lolozi iveegh payau, ve zigau naleep.
Yau namin zeran tau tirav zi timatmaat, ve tisuruuv patazi izila naal.
Ve namin yes mateegha tau yo lolom iveghai zi ve irau uul zi muul mako.
6 Yo ughur ghau nazila puura to mateegha tau izila le izila kat.
Naleep siiŋa kat ila ndoroom loolo.
7 Aatyavyav tsio itatan ghau kat,
imin dibom tintiina tipolpol izala pavog ve titavtav ghau.
8 Yo ugham zetagŋa timoghaagh payau.
Lolozi pa tighit ghau mako. Pasaa, ŋgar tau ugham payau ne, ene igham zi tighit ghau namin gabua saghati.
Lepoogh tsiau, ene imin naleep ila ruum to yavyavuuŋ loolo, ve leg eez to navot mako.
9 Yoova, mataaz ta naol ne, yau naitiit nimag izazaa,
ve nataŋtaŋ rarai ghom to uul ghau.
Lolog ipataŋan kat, ve nataŋ tiina le matag isarsar.
10 Laak, yo ugham gabua ŋgereeta eta pa yes mateegha leso uul zi?
Ma mateegha irau tiburig ve tipait ezam? Mako.
11 Ve yes tau tigheen ila naal loolo na, tisasavia ŋgar tsio tau lolom isaghav tamtamon tsio ve uluul zi?
Ma yes tau tileep ila nugh to saghatiiŋ na, tisavsaav pa ŋgar tsio to utataghon saveeŋ mbuaaŋ tsio? Mako.
12 Ve yes tau tileep ila ndoroom loolo na, tiwatagh gabua ŋgeretazi tau ughamgham zi ne?
Ma mateegha tau tamtamon lolozi iveghai zi na, matazi iŋgalŋgal ŋgar tsio duduuŋa? Mako kat!
13 Eemon yau, o nataŋtaŋ payo naghe uul ghau.
Yoova, mboŋoozo ta naol ne, suŋuuŋ tsiau iŋaŋarui ghom.
14 Yoova, mindai ta ughur murim payau, ve uŋgooz naghom payau?
15 Saawe tau kukuag ve ilam, nabadbaad pataŋani tiina, ve nalepleep ila naal aavo.
Yo ughurghur pataŋani payau, ve upaparoi ghau imin koiam yau.
Tauta lolog ipataŋan kat, ve naghita naghe narau gabua eta muul mako.
16 Pasaa, aatyavyav tsio itatan ghau kat.
Yo uvaghamun ghau le naroi kat.
17 Saawe isov ta mboŋoozo ila le ravrav izi, lepoogh tsiau, ene imin dibom ipol toman tapiri, ve rigmon kanaŋ izugh ghau gha nalaleg.
Pataŋani naol tilivutin ghau, ve leg eez to napaghau taug mako.
18 Yo ugham zetagŋa ve toŋvetaz tsiau timoghaagh payau.
Yes tau muuŋ yeŋa lupuuŋ tsiei eemon na, tigharau ghau muul mako.
Aazne, ndoroom tiina ikau ghau.