98
Maaron, i kinik tiina tau iparav ariaaŋ le iliiv koiŋa
Ambou mbouŋ paaghu pa Yoova!
Pa gabua ŋgeretazi tau i ighamgham zi na, maata ite kat.
Niima tapir iparav ariaaŋ le iliiv koiŋa wa.
I itotoi tapiri patabuyaaŋ, ve igham mulin tamtamon tooni. *
 
Yoova ivotia uleeŋ tiina tau i igham pa tamtamon tooni.
I itotoi ŋgar tooni duduuŋa ila nughmariŋ matazi gha tighit katini wa. *
 
Saveeŋ tau i imbua tomania yes Israela na, i maata iŋgalŋgali ve itataghoni. Tauta loolo isaghav zi ariaaŋ ve iuluul zi.
Maaron toit iparav ariaaŋ gha igham mulin ghiit ila nughmariŋ matazi, ve tighita wa.
Yam nughmariŋ asov lolomim poia pa Yoova ve ayoor eeza.
Tintinmim pani, ve ait mbouŋ to apakuru.
 
Arav ambam tomania gita, ve ambou to apait Yoova!
Arav ambam tomania gita le luutu poia, ve apakuru.
 
Yoova, i kinik tiina.
Aviv tavuur tomania trampet ila naagho, ve ayoor eeza toman tintinmim.
Te tomania gabua naol isov tau aleep ila loolo na, aliŋamim izaa ve apait Yoova!
Ve taan tomania tamtamona ve gabua naol isov tau aleep ila na paam. Aliŋamim izaa ve apaiti!
 
Ve yaa paam, asov aposai nimamim pani ve apakuru.
Ve yam loloz asov alup avomim, ve ambou toman lolomim poia izi Yoova naagho, ve ayoor eeza.
 
Pa i ighe ilam. Leso igabiiz tamtamon tisov to taan ve ighur atuya pazi.
I pale igabiiz nughmariŋ to taan.
Ve gabizooŋ tooni, ene iduduuŋ mon. *
* 98:1 Igham 15:6, 12, 16; Mbo 118:15-16; Lu 1:51 * 98:2 Lu 2:30 * 98:9 Mbo 96:10; Mbaŋ 17:31