8
Marĩ cʉoro ejatuaro ãpẽrãrẽ oꞌodutise niꞌi
1 Acawererã, ʉ̃sã aꞌtiro mʉsãrẽ weresĩꞌrĩsaꞌa. Õꞌacʉ̃ Jesucristore ẽjõpeorã Macedoniapʉ nirãrẽ añurõ weewĩ. Cʉ̃ ãpẽrãrẽ weetamucã weewĩ. Tere mʉsãrẽ masĩcã ʉaꞌa.
2 Aꞌtiro niꞌi. Na ʉpʉtʉ piꞌetirã, queoro weecãrã niwã. Tojo piꞌetimirã, pũrõ eꞌcatiwã. Na pajasecʉorã waro nimirã, peje cʉorã weronojõ ãpẽrãrẽ añurõ weetamuwã.
3 Na cʉoro põtẽorõ na cʉosere oꞌowã. Na cʉose nemorõ oꞌoyʉꞌrʉomʉjãwã. Yʉꞌʉ narẽ tojo weecã ĩꞌawʉ̃. Na ʉaro oꞌowã.
4 Ʉ̃sãrẽ pejetiri aꞌtiro niwã: “Õꞌacʉ̃ yarã pajasecʉorãrẽ niyeru oꞌosĩꞌrĩsaꞌa”, niwã.
5 Ʉ̃sã wãcũꞌcaro nemorõ weewã. Ne warore na Õꞌacʉ̃rẽ ẽjõpeorã “Mʉꞌʉ yarã niꞌi”, niwã. Beꞌrore ʉ̃sãrẽ “Mʉsã dutisere weerãti Õꞌacʉ̃ ʉaronojõta”, niwã.
6 Na Macedoniacjãrã tojo weecã ĩꞌarã, ʉ̃sã Titore mʉsã tiropʉ waꞌadutiꞌi. Cʉ̃ todʉporopʉ mʉsã tiro Corintopʉ nígʉ̃, niyerure sẽrĩneocʉ niwĩ. Tere sẽrĩtuꞌajanʉꞌcõdutirã cʉ̃rẽ oꞌórã weeꞌe. Tojo weerã mʉsã añurõ nʉꞌcãꞌquere queoro tuꞌajanʉꞌcõrãsaꞌa.
7 Mʉsã nipeꞌtisere añurõ weeꞌe. Añurõ ẽjõpeosetiꞌi. Õꞌacʉ̃ ye cjasere añurõ masĩꞌi. Añurõ buꞌesetiꞌi. Eꞌcatise meꞌrã añurõ weesĩꞌrĩꞌi. Ʉ̃sãrẽ añurõ maꞌiꞌi. Mʉsã te nipeꞌtisere añurõ weronojõta niyeru oꞌose quẽꞌrãrẽ mejãrõta weeya.
8 Mʉsãrẽ dutibutiagʉ mejẽta weeꞌe, weegʉpʉa. Mʉsã ãpẽrã weesere ĩꞌasaꞌa. Na añurõ maꞌima. Mʉsã quẽꞌrã na tojo weesere ĩꞌarã, “Ʉ̃sã quẽꞌrã ¿diacjʉ̃ta maꞌimiti ʉ̃sã?” nidutigʉ tojo niꞌi.
9 Aꞌtiro niꞌi. Mʉsã masĩsaꞌa, marĩ wiogʉ Jesucristo marĩrẽ añurõ weecʉ niwĩ. Cʉ̃ peje cʉogʉ nimigʉ̃, marĩ ye niatjere pajañaꞌgʉ̃ aꞌti diꞌtapʉ aꞌtigʉ, pajasecʉogʉ weronojõ waꞌacʉ niwĩ. Marĩrẽ añurõ weesĩꞌrĩgʉ̃, tojo weecʉ niwĩ.
10 Mʉsã aꞌtiro weecã, añu nibosaꞌa nígʉ̃, yʉꞌʉ wãcũsere mʉsãrẽ nigʉ̃ti. Aꞌtiro niꞌi. Si cʉ̃ꞌma meꞌrã mʉsã ape macãcjãrã dʉporo niyeru oꞌosere nʉꞌcãcãrã niwʉ̃. Tere oꞌorã, eꞌcatise meꞌrã oꞌocãrã niwʉ̃.
11 Tojo weerã mʉsã ne waro weewãꞌcõꞌcaronojõta weetuꞌajaya. Mʉsã cʉoro ejatuaro oꞌoya.
12 Aꞌtiro niꞌi. Marĩ diacjʉ̃ta marĩ cʉoro ejatuaro oꞌosĩꞌrĩcã, Õꞌacʉ̃ eꞌcatisami. Marĩ moocã, oꞌodutitisami.
13 Mʉsã ãpẽrãrẽ peje cʉodutirã oꞌoyʉꞌrʉobosaꞌa. Tojo weerã moorã tojabosaꞌa. Tojo waꞌacã ʉaweꞌe.
14 Mejõ niꞌcãrõnojõ cʉodutigʉ tojo niꞌi. Niꞌcãrõacã mʉsã cʉose meꞌrã narẽ weetamumasĩꞌi. Beꞌropʉ na quẽꞌrã na cʉose meꞌrã mʉsãrẽ weetamurãsama. Aꞌtiro wéérã, mʉsã niꞌcãrõnojõ cʉorãsaꞌa.
15 Õꞌacʉ̃ ye queti ojáca pũrĩpʉ ojaꞌcaronojõta niꞌi. Aꞌtiro ojanoꞌo: “Peje cʉomiꞌcʉ cʉoyʉꞌrʉosome. Apĩ pejeti cʉogʉ quẽꞌrã ñeꞌenojõ dʉꞌsanoꞌsome”, ni ojanoꞌwʉ̃.
Tito cʉ̃ meꞌrãcjãrã meꞌrã Corintopʉ waꞌatje niꞌi
16 Yʉꞌʉ mʉsã ye cjasere wãcũqueꞌtiꞌi. Yʉꞌʉ wãcũqueꞌtiro weronojõ Tito quẽꞌrãrẽ Õꞌacʉ̃ wãcũqueꞌticã weecʉ niwĩ. Tojo weegʉ Õꞌacʉ̃rẽ eꞌcatise oꞌoꞌo.
17 Tito yʉꞌʉ oꞌócã, maata yʉꞌtiwĩ. Niꞌcãrõacãrẽ cʉ̃ mʉsãrẽ ĩꞌasĩꞌrĩꞌcʉ nitjĩagʉ̃, cʉ̃ añurõ tʉꞌsaro meꞌrã mʉsã tiropʉ waꞌagʉsami.
18 Tito meꞌrã apĩ oꞌónemorãsaꞌa. Cʉ̃ marĩ acaweregʉ Jesucristore ẽjõpeogʉ nimi. Nipeꞌtirã Jesucristore ẽjõpeori curuacjãrã cʉ̃rẽ aꞌtiro ucũma: “Cʉ̃ Jesucristo ye quetire weremeꞌrĩyʉꞌrʉami”, nima.
19 Apeye quẽꞌrãrẽ, Jesucristore ẽjõpeose cururicjãrã ʉ̃sãrẽ baꞌpatidutirã cʉ̃rẽ besecãrã niwã. Niyeru sẽrĩneoꞌquere miacã, cʉ̃ ʉ̃sã meꞌrã baꞌpatiwãꞌcãgʉ̃sami. Ʉ̃sã niyerure miarã, masã marĩ wiogʉre añurõ ucũdutirã tojo weeꞌe. Tojo nicã ʉ̃sã eꞌcatise meꞌrã weetamusĩꞌrĩsere ĩꞌorã tojo weeꞌe.
20 Ʉ̃sã aꞌtere tojo wéérã, masã ʉ̃sãrẽ “Niyeru bajuriopã” nidutitirã tojo weeꞌe.
21 Aꞌtere wéérã, ʉ̃sã marĩ wiogʉ ĩꞌorõpʉre queoro weesĩꞌrĩꞌi. Tojo nicã masã ĩꞌorõpʉ quẽꞌrãrẽ queoro weesĩꞌrĩꞌi.
22 Apĩ marĩ acaweregʉ quẽꞌrãrẽ na meꞌrã oꞌónemoꞌo. Cʉ̃ ʉpʉtʉ weetamusĩꞌrĩsere pejetiri ĩꞌowĩ. Totá niꞌcãrõacãrẽ mʉsãrẽ na queoro weeapãrã nígʉ̃, weetamusĩꞌrĩmi.
23 Titore ãpẽrã sẽrĩtiñaꞌcã, aꞌtiro niña: “Pablo meꞌrãcjʉ̃ cʉ̃ meꞌrã daꞌragʉ ʉ̃sãrẽ weetamugʉ̃ nimi”, niña. Ãpẽrã pʉarãrẽ sẽrĩtiñaꞌcã peꞌema, aꞌtiro niña: “Jesucristore ẽjõpeori curuacjãrã na oꞌóꞌcãrã nima. Na, na weese meꞌrã Cristore añurõ ucũcã weema”, niña.
24 Maꞌise meꞌrã narẽ ñeꞌeña. Tojo weecã, ãpẽrã mʉsã Tito quẽꞌrãrẽ maꞌisere masĩrãsama. Ʉ̃sã ãpẽrãrẽ aꞌtiro nitojawʉ: “Corintocjãrã masãrẽ añurõ ñeꞌema”, niwʉ̃. Mʉsã tojo weecã ĩꞌarã, na ʉ̃sã níꞌquere “Diacjʉ̃ta nipã”, nirãsama.