Sepinien xa diamu te
Sion
?Visi iaxa tetis vanuvei ak?
Moletin xa tetis vanuvei ak, hisen tehe Sion. Xi tehe tei e moletin na Iesu xil xa latehe lu e le tei (12). Tave ti neta xa tavit rat hisen ti e vanuvei ak, tekes tasen ni xi tang ni “ngan xa eheien na Iesu di en.” Sion xal tuneli Temis lutehe moletin xa di lutesar meseo xil melele xa Iesu tekes xalu tengan lalihusili. Sion tehe tei xatel xa Iesu teleh xatel tengan vapispisi kuhi mi xatel vali ngan tesav xil e moletin nan xil. Melele xa Iesu tete eivave e sangas vamat, xi tesis Sion tengan ilaxat kuh ninen, Meri. Melele xa Iesu temea rilomun ra maten e tehe ut nesao, Sion mei tehe vat tei te sias hu xa testal.
Sion tetis vanuvei ak tetiamu ni huram 70 AD (huram xil xa tetutou ni melele xa Iesu tepot en). Lanemi mak vengan xa Sion tenavit usili ti melele xa moletin xil te vaeen te hal Rom mei latehu len taon te hal Serusalem xa testal e huram 70 AD. Xi tetisi tetutou ni vanuvei xil xa Matiu, Mak tetel Luk latetisi usil meulien e pispisien xil na Iesu.
?Visi iaxa tevuli vanuvei ak tetiamu?
Melele xa Sion tetis vanuvei ak usil Iesu, moletin sav xil na Iesu tetel moletin sav xil holu mun xa lateti visal Iesu melele xa tete ut etan latekesae ngamu. Eloheoh Sion tepol tetel Kristin xil e taon xil te hal Efeses, Samerna, Pegamam, Taeatira, Sadis, Piladelvia, e Laodisia xa lateti e tan xa mahulong te hal Esia. Ma, melele xa Sion temeul tamu teta, ngan xil ak latesisi tengan vatis rat naha xa tepus Iesu tepol ni e naha xa telonge tehiteni. E texoni ngan xa Sion tehiteni e 21:25 tehit, “Iesu tepol ni holesok xil holu mak mu mili naha xa natetis xati. Vahit latis xat holesok xil vus xa xi tepol ni vati e vanuvei xil, ma nanemi nabit ut tapin ti e ut xil vus te ut etan tengan laling xil en.” Misak ni, Sion tehosei tumulen xil kestang xa mikila vatutou ni Kristin xil tengan lipus kil kuhi xa Iesu tehe Mesaea, Mesaea xa Hi tehit xati tengan isa ni imei, nggoni ngan xa Sion tehiteni e 20:31 tehit, “E natetis holesok xil ak tengan vasak ni moletin xil mei lake reitin xa Iesu be Mesaea, Nat Hi. E xamim mukil kuhi xa ngan xil xa lake reitin e xi lihur meulien sal ixo hisen.”
?Sion tetis vanuvei ak veneh?
Sion ien tehei tengan vapisen ni xa Iesu nggo visal Hi - Melele xa Mak tetis usil meulien na Iesu, tetis kokot usili e vanuvei nan xa merekel xil xa Iesu tepol ni tepisen kila xa xi tehe Mesaea. E Matiu xal Luk, lutetis kokot usili e vanuvei nalu xa tetep iaxa Iesu mei tepot e ut etan tehusil lingxatien na Hi. E Sion, xi tetis kokot usili e vanuvei nan xa tetep iaxa Iesu tete visal Hi tetiamu nousav e lutepeas vituei ni holesok xil vus xa ladi. Texo suse ak e suse sav xil mun, Sion tesep kila xa Iesu tete ut nesao tetiamu, e Hi tesila temei e ut etan.
Sion ien tehei tengan vapisen ni xa Iesu tehe Nat Hi - Iesu tehit kila tehe holu xa xi tehe Nat Hi reitin e Hi tehe Tamen xati.
Sion ien tehei tengan vapisen ni xa Iesu tehe Mesaea xa Hi tehit xati tengan isa ni mi moletin xil - Sion tetis xat sepinien na moletin xil xa latepus kila xa Iesu tehe Mesaea na Hi: Sion Baptis, Andru, Pilip, Nataniel, Iesu tasen, ate‑Sameria tei, ngan Sameria sav xil, vanut moletin xil xa Iesu tehangan xil, Pita, vanut moletin sav xil, e Merta.
Sion ien tehei tengan vapisen xeihen na Iesu texo merekel xil xa xi tepol ni - Sion tetis xat merekel na Iesu xil tehe lu e he sav (7). 1) Iesu tehiles oei mei tehe uaen. 2) Iesu tepol ni horamue na eilep tei na kavmen xa temesei mei tehos rilomun. 3) Iesu tepol ni moletin tei xa temesei huram 38 mei tehos rilomun. 4) Iesu tesa anien mi moletin xil latehe taosen lim (5000) texo merekel tei. 5) Iesu tekakao e ramut oei. 6) Iesu tepol ni met metevar tei mei tehos rilomun. E 7) Iesu tesak ni moletin tei xa temat mei temea rilomun ra maten. Merekel xil ak tesak ni moletin xil latehiteni e 7:31 latehit, “Xamem malonge xa melele xa Mesaea imei, xi ipol ni merekel xil holu. !E moletin tovuol xa mikila vapol ni merekel xil vahe holu mak mu vali ngan xil xa Iesu di pol ni!”
Sion ien tehei tengan vapisen ni xa Iesu tehit rati xa xi be Hi, e tepisen reitinen teni texo vole xil - E Eksodas 3:14, Hi tepisen xi mi Mosis tehit, “!Inou nabe ngan xa NABE!” Ma, Siu xil latehur sepinien te NABE texoni ngan xa be his xati na Hi. Koute te his ak iaxa Hi dat mak vehakut, e melele xil tetiamu, te xosali ak, e te melengien xil vus xa ti imei mun. E, ve merereen nae, moletin xil latekes Hi ni ‘Iahova’ xa koute teni be Suv. E Sion tetis xati tehe vahat e he sav (9) xa Iesu mun tehit sepinien ak xa tehit, “!Inou NABE!” xa Siu xil lalong kila xa be his Hi reitin. Iesu tepisen ni mun xa xi be vatit meulien sal texo vole lu e he sav (7) tehit, “1) Inou nabe beret xa di misa meulien. 2) Inou nabe miehen e ut etan. 3) Inou nabe puiteh xa sipsip xil di langgo en tengan lave nim. 4) Inou nabe moletin hos xa di milaxat kuh sipsip xil. 5) Inou nabe vatite te mea rilomunen e meulien sal. 6) Inou nabe suse, nabe reitinen, e nabe meulien. E 7) Inou nabe vatite.”
Sion ien tehei tengan vapisen ni xa ngan xil kestang xa labisti del Iesu lihur meulien sal - Vengan xa be reitin xa Iesu be Hi e vatit meulien sal, ngan xil xa labisti dela lihur meulien sal. Labisti dela melele xa laneket en e melele xa lalong xati. Ixo Iesu, xir mei rikil Hi vengan xa Iesu tekil Hi. Ma ixo Iesu, xir rihur meulien sal.
Sion ien tehei tengan vapisen ni xa xir, moletin nan xil, ti ripisen Iesu mi mosav xil ixo sepinien e sexien nar xil - Iesu tesil moletin nan xil tengan ha lihithiten longeongen hos usili mi mosav xil. Iesu ien tehei tengan moletin nan xil lipol ihusil sexien nan xil ixoni ngan xa iexil ihei mosav xil e ti lipet rat his Hi ixo holesok xil vus xa di lapol ni.
Vatit nenemien tei te vanuvei ak de Sion 20:31
E natetis holesok xil ak tengan vasak ni moletin xil mei lake reitin xa Iesu be Mesaea, Nat Hi. E xamim mukil kuhi xa ngan xil xa lake reitin e xi lihur meulien sal ixo hisen.
?Naha iaxa di e sepinien ak?
1. Iesu be Vatit Sepinien te Meulien. (1:1-18)
2. Iesu pisen ni xa xi be Nat Hi nggo polien e pispisien nan xil. (1:19–4:54)
3. Vat na Siu xil lanem misa holu ni Iesu. (5:1–12:50)
4. Iesu misa pispisien kor mi moletin nan xil. (13:1–17:26)
5. Ladal xat Iesu, ladi xati e eivave, e Iesu mat. (18:1–19:42)
6. Iesu mea rilomun ra maten e mistal mi moletin nan xil. (20:1–21:23)
7. Sepinien kor. (21:24-25)
1
Iesu be Vatit Sepinien te Meulien xa temei tete ut etan
1 Tetiamu nousav, melele xa Hi tenapeas ni ut nesao mu ut etan ti mu, Vatit Sepinien teta ngamu. Xi xa be Vatit Sepinien teta tetel xat Hi, e xi tehe Hi e rin xil vus.
2 Xi teta tetel xat Hi ngamu e melele xa holesok xil latehe tovuol tamu.
3 E texo xi, Hi tepeas ni holesok xil vus. E vahit nave xi ti, ma neta vahe tovuol.
4 Vatit Sepinien ak be vatite te meulien. E mei be miehen mi moletin xil tengan lakila lale kil holesok xil vus vaxo en.
5 Ngan xa be miehen ak mileluv e maluxoluken, e ngan xil xa ladi e maluxoluken ak lasakras lanem kila mu laleli.
6 Hi tesa moletin tei temei, hisen tehe Sion.
7 Xi temei tengan vahit usil xi xa be miehen ak, e tengan vasak ni moletin xil vus mei laling neketen nae en.
8 Sion tenave miehen ak ti. E xi temei tengan vahit usil xi xa be miehen ak.
9 Reitin, Sion temei tengan vahit usil meien na ngan xa be miehen reitin xa mei ileluv e nenemien na moletin xil vus tengan lile kil reitinen na Hi.
10 Ngan xa be miehen ak temei tete ut etan. E tave ti neta xa holesok xil vus e ut etan latestal latexo xeihen nan, moletin xil te ut etan latnakil ti xi.
11 Xi temei mi moletin nan xil xati, e moletin nan xil latnahur pilei ti.
12 E ngan xil vus xa latehur pilei e lateneket en, xi tepol ni suse temal tengan mei lihe horamue xil na Hi.
13 Xil mei latehe neta hu reitin, e tenaxo rin te pesisen ti xa di mistal nggo eheien mu lingxatien na moletin xil. E xil latemei latehe horamue xil na Hi vengan xa Hi vari tang tehosei xil mei latehe nan.
14 Vatit Sepinien ak temei tehe moletin xa ven teta. Xi temei tete visal xir e xamem matepus minehinen te xeihen nan, vengan xa xi be Nat Hi tei takes reitin xa tepolu ni eheien hos e reitinen.
15 Sion tehit usil xi xa xi be visi tehit, “Moletin ak be ngan xa di natesep usili. Ngan xa natehiteni natehit imei itutou ni nou xa ihe eilep ili nou. Be eilep mili nou vengan xa xi teta ngamu tetiamu nousav, e melele xa nana taling nou ti mu.”
16 Xi polu ni eheien hos, ma di duxol xat xir vus holu xa holu pupu mili naha xa momal tengan ravuri.
17 Texo Mosis tetiamu, Hi tesa rae nan xil mi moletin xil. E, nggo Iesu Kristo, Hi di pisen eheien hos e reitinen nan mi moletin xil.
18 Moletin tovuol tamu iaxa vapus Hi ni meten xati. E moletin xil mei lakil Hi nggo Natneli xa be siskes nan, ngan xa de ri Tamen.
Sion Baptis bit rati xa xi tave Mesaea na Hi ti
Mat 3:11-12; Mak 1:7-8; Luk 3:15-17
19 Ngan ak be tumulen usil naha xa Sion Baptis tehit rati usil Iesu. Vatei, vat xil na Siu xil e hal Serusalem lasil rut pris xil del ngan xil xa lastal langgo vatimol na Livae xa di lapol e Nim Eo tengan lava lapus Sion e lasis pilei xa xi be visi. Ma melele xa lastal e rute xa Sion da en lasisi labit, “?Xouk obe visi?”
20 E Sion tasin ni ti tengan vasa rilomun ni sepinien nae e bit rati bit, “Inou natave Mesaea ti xa Hi tehit xati tengan isa ni imei.”
21 Misak ni, xil lasisi labit, “?Xos imaxai, ma xouk obe visi vari? ?Obe provet Ilaetsa?”
E Sion bit rilomun ni mi xil bit, “E‑e, natave xi ti.”
Lasisi mun labit, “?Xouk obe Provet xa Mosis tehit lelen ni tehit Hi isa ni imei?”
E xi biteni bit. “E‑e.”
22 Ma xil ladakesi labit, “Hit rati li mi xamem xa xouk obe visi tengan mukila muhit mesen ni mi vat namem xil xa lasil xamem mamei tengan makil ti. ?Di obit naha usil xouk tasom?”
23 Misak ni, Sion misa sepinien na provet Aesea mi xil xa bit,
“Inou nabe rae tei xa di mikei e uruvuol bit,
‘!Musak mesen suse na Suv!
!Mupol ni suse nan imal!’ ” (Aes 40:3)
24 Rut moletin xil ak xa latemei, tehe Farasi xil iaxa latesil xil lamei visal Sion.
25 E xil iaxa mei lasis Sion labit, “?Xosxa xouk otave Mesaea ti, mu Ilaetsa ti, mu Provet xa Hi tehit xati ti, veneh ma di obaptaes ni moletin xil?”
26 E Sion bit rilomun ni mi xil bit, “Inou di nabaptaes ni moletin xil del oei tang. E, e hilaep te xamim, moletin tei da ngamu xa xamim mutakil ti.
27 Xi iaxa imei itutou ni nou xa be eilep mak mu mili inou. E inou natapin ti tengan mei name slev nan tang xa naleh rerat sandel nan.”
28 Holesok xil vus ak testal e rute xa Sion di baptaes ni moletin xil en, ist te Oeisal Sodan e sangas visal taon te hal Betani.
Sion Baptis bit rati xa Iesu be Mesaea na Hi
29 E melengien sav nen, Sion miketeh ba e pus Iesu di bemei visali. Melele xa pusi, Sion bit rati mi moletin xil bit, “!Mupus ti! Sulut sipsip xa Hi tesila di bemei. Xi iaxa ileh rerat tesaen xil ra moletin xil te ut etan.
30 Xi vari be ngan xa natesep usili natehit, ‘Moletin tei imei itutou ni nou e xi ihe eilep mak mu ili nou. Vengan xi teta ngamu e melele xa nana taling nou ti mu.’
31 Melele xa natesep usili, inou mun natnakil kuh ti mu xa xi be visi. E Hi tesil inou tengan namei inggak e nabaptaes ni moletin xil, e napisen xi mi mol‑Isrel xil.”
32-33 Sion biteni mun bit, “Reitin. Tetiamu, inou natnakil ti xa xi be visi. E Hi xa tesil nou namei inggak tengan nabaptaes ni moletin xil vatel oei, xi tehiteni minou tehit, ‘Melele xa upus Ninin Eo imei etan e mei ite moletin tei, xi vari iaxa ihe ngan xa ti ibaptaes ni moletin xil itel Ninin Eo.’ Misak ni, tave nousav ti, natepusi xa xi temei visal inou, e natepus Ninin Eo texo ut nesao e temei texoni mae mei teta kat en.
34 Reitin li nabiteni mi xamim xa natepusi ngamu. E di nabit rati mi xamim xa moletin ak vari be Nat Hi reitin.”
Iesu mikes moletin hat (4) tengan lavusili
35 E melengien sav nen, Sion dilomun be rute ak del moletin nan lu.
36 E melele xa Sion pus Iesu di mikakao ba, xi bit rati mi moletin xil bit, “?Mupusi? !Ngan ak be sulut sipsip xa Hi tesila temei!”
37 Melele xa moletin nan xalu lulong naha xa biteni, luba lunggusil Iesu.
38 E melele xa Iesu di mikakao ba, xi biles e pus xalu xa di lunggusili. Ma, misis xalu bit, “?Iemil bei naha?”
E xalu lubit rilomun ni mini lubit, “Titsa, iemel bei tengan malkil ti xa oda xave.”
39 Iesu biteni mi xalu bit, “Mulimei e mulipusi.” Melele xa di latkakao latoba, be mahis ngamu e eai da be tan vuteili. E ludi visal Iesu duxoh vongien.
40 Tei e xalu xa telong sepinien na Sion e tehusil Iesu, hisen Andru, xa be tua na Saemon Pita.
41 E melele xa misepin del Iesu bus, vatakes, ba pus Saemon Pita e biteni mini bit, “Tuxoli, xamel makamet Mesaea xa Hi tehit xati tengan isa ni imei.”
42 Di, Andru del Saemon Pita e lube visal Iesu.
E melele xa Iesu pus Saemon, biteni bit, “Xouk obe Saemon, nat Sion. E taxeak iha, hisom ihe Pita.” Koute te Pita be ‘hat.’
43 E melengien sav nen, Iesu pol ni nenemien nan tengan vahe reling rute xa de sangas ni Oeisal Sodan, e ihe provins te hal Kaleli. Ma, ba mikamet moletin tei xa hisen Pilip e biteni mini bit, “Amei, uhusil inou.”
44 Pilip be ngan Betsaeta tei, taon xa Andru xal Pita lutexo en.
45 Pilip maen ni e ba milang ni tuneli xa hisen Nataniel. Melele xa mikameti, xi biteni mini bit, “Xamem makamet Mesaea xa Mosis tetis usili e tisen te rae xil, ngan xa provet xil mun latetis usili. Hisen Iesu, nat Siosep te hal Nasaret.”
46 Melele xa milong sepinien ak, Nataniel misisi bit, “?Reitin mak? Inou natanem ti xa neta tova vahos vamak mikila vaxo taon votei te hal Nasaret.”
E Pilip bit rilomun ni mini bit, “Amei, mei upus ti.” Ma lukakao lube visal Iesu.
47 Melele xa Iesu pus Nataniel bemei visali, bit usili bit, “Ngan ak be moletin tei xa taluvos ti, ngan xa pipin tengan likesi ni ‘ngan Isrel tei.’ ”
48 Melele xa Nataniel milonge mak, misisi bit, “?Xouk okil nou midep?”
Iesu bit rilomun ni mini bit, “Natepusuk ngamu e melele xa di tamu otetotan pe mamel te vatit fik, e melele xa Pilip tenavat ti mu tengan vakes xouk.”
49 Nataniel mesep pupu e biteni mini bit, “!Titsa, xouk obe Nat Hi reitin! !Xouk obe suv toto te hal Isrel xa di madatili!”
50 Iesu biteni mini bit, “Xouk oneket e nou vengan xa nabiteni tang minuk xa natepusuk melele xa di tamu otetotan pe mamel te vatit fik. E navehi ti, upus holesok savsav xil xa lihe tellep mak mu mili ngan ak.
51 Reitin li nabiteni minuk xa upus tilang hat imesel e masxaxa na Hi xil ti likakao lihe nesao e limei etan lixo nou, Nat Moletin, ixoni ngan xa nabe suse tei.”