11
Maten na Lasaros
1-2 E metimal te hal Betani, moletin tei da en, hisen Lasaros. Hineli xalu, Meri xal Merta. (Ihe Meri xa mei iteh vokon iha xat le Suv e isihia ni hilin.) Ma melele xa Lasaros mei mesei holu, hineli xalu lusa sepinien ba mi Iesu bit, “Suv, ngan xa eheien nam di en mesei pupu.”
Melele xa Iesu milonge, biteni bit, “Hoxalit mesien ak nave maten ti. Ngan ak di mistal tengan vapet rat his Hi e isak ni moletin xil mei lipet rat his Natneli mun.” E neta sav xa eheien na Iesu de Merta, Meri e Lasaros eilep pupu, melele xa nggur longeongen xa Lasaros mesei mak, da kat e rute xa da en melengien lu mun.
Di, Iesu biteni mi moletin nan xil bit, “Ritilomun rihe provins te hal Sudea.”
E moletin nan xil lasisi labit, “Titsa, tenave nousav ti, Siu xil te rute ak latesak tengan lavov vinuk. ?Ma xouk iem bei tengan utilomun uha veneh?”
Iesu misepin bit, “E melengien tei, eai di ngan haoa lu e le tei (12). E ngan xil xa di lakakao e miehen lasakras lasavut vengan xa miehen xa bemei e ut etan ak di misak ni xil di lapus kil holesok xil vus. 10 E ngan xil xa lakakao e maluxoluken lasavut, vengan xa miehen tovuol e xil.”
11 Di, Iesu bit rilomun ni bit, “Tua nar Lasaros ba pat li. E inou niha nisiasi ni tengan ilale.”
12 Ma, moletin nan xil labiteni labit, “Suv, xosxa xi pat kuhi, ma di meul e, ti, ilonge ihos rilomun.” 13 Xil lanemi xa Iesu di misepin usil paten na Lasaros, e xi di bit usil maten na Lasaros vari.
14 Mak, ma Iesu bit lelen ni mi xil bit, “Lasaros mat ngamu. 15 E nabesi nou xa natnara ti visal xil e melele nen ak, vengan xa ngan ak itutou ni xamim tengan muke reitin mak mu e nou. Rihe visali.”
16 Mak, ma Tomas, ngan xa lakesi ni Meah, biteni mi xil bit, “Xir vus riha tengan ha rimat itela.”
Iesu misak ni Lasaros mea rilomun ra maten vengan xa be vatit mea rilomunen e vatit meulien
17 Melele xa Iesu duxoh metimal te hal Betani, xi mikameti xa lateling tiei na Lasaros de vangihat te tehinen melengien hat (4) ngamu. 18 Betani tave sotin ti ra hal Serusalem, be kilomita tol (3 km) tang. 19 Ma, Siu xil holu lamei tengan lasa esaeen nae mi Merta e Meri ve maten na tua nalu. 20 Melele xa Merta milongeong ni xa Iesu di bemei, xi ba tengan ha vahisu mini. E Meri dat tim. 21 Melele xa Merta pus Iesu, biteni mini bit, “Suv, vahit xouk otete inggak, tua navan namat ti li. 22 E nakila xa xosali ak, Hi isa ni minuk naha xa di osisi ven.”
23 Iesu biteni mini bit, “Tumali imea rilomun ra maten.”
24 Merta bit rilomun ni bit, “Nakila xa xi imea rilomun ra maten e hoxalite te holesok xil vus.”
25 Iesu biteni mini bit, “Inou nabe vatit mea rilomunen e nabe vatit meulien. Ngan xil xa lake reitin e nou, neta sav xa lamat, xil limea rilomun ra maten e limeul. 26 E ngan xil xa lameul tamu ladi e lake reitin e nou, xil linamat ti vatova. ?Midep? ?Oke reitin e ngan ak?”
27 Xi bit rilomun ni bit, “Suv, nake reitin xa xouk obe Mesaea, Nat Hi, ngan xa xi tehit xati tengan isila imei e ut etan.”
28 Melele xa Merta misepin mi Iesu bus, dilomun be tim e mikes xuxus ni tunehin Meri. Ngguri be rin e biteni mini bit, “Titsa bemei inggak e di misisuk.” 29 Melele xa Meri milonge mak, mea katen e be hale tengan ha vapusi. 30-31 Melele xa ngan xil xa di ladang dela lapusi xa mea katen mak, langgusili. Lanemi labit xi di be vangihat te tehinen tengan ha vatang en.
Iesu datil Meri e rute xa Merta tehisu ni e seri metimal te hal Betani. 32 Melele xa Meri duxoh rute xa Iesu da en, pusi ma mitingeiril sangas ni len e midang bit, “!O Suv, vahit otete inggak, tua navan li namat ti!”
33 Melele xa Iesu pusi di midang mak, e pusi midep moletin xil xa lamei dela di ladang, xi mun milonge misa e tinen muis. 34 Misis xil bit, “?Mutetihin ni ingga xave?”
Labit rilomun ni labit, “Suv, amei pusi.”
35 Melele xa di laba, simete Iesu mileh. 36 E ngan xil xa lapusi labiteni labit, “Pus ti mu. Eheien nan di pupu e tua nan.”
37 E rute xil labiteni labit, “Xi tepol ni met metevar mei miketeh. ?Veneh vari tenapol ni Lasaros tengan namat ti?”
38 Melele xa laduxoh vangihat te tehinen, Iesu milonge misa mun. Pusi xa ladivin hat tei xa eilep da xol puiteh te vangihat ak. 39 Ma, Iesu biteni bit, “Mutivin rat hat ak vaha.”
Merta, hine ngan xa temat, bit rilomun ni bit, “Suv, tiei nan bo ngamu vengan xa mat melengien hat (4) tuei.”
40 E Iesu biteni mini bit, “Nabiteni tuei minuk xa upus minehinen te xeihen na Hi xosxa uke reitin en.”
41 Ma, moletin xil ladivin rat hat ak ba. Di, Iesu miketeh be nesao e misis bit, “Tata, namesuk vengan xa di olong nou. 42 Nakila xa vehakut di olong nou, e nabit lelen sepinien ak ve moletin xil ak, tengan isak ni xil like reitin xa xouk iaxa otesil nou namei.”
43  Melele xa bit sepinien ak bus, Iesu mikei nggeih bit, “!Lasaros, amei hale!” 44 E moletin xa temat mea e bemei hale. Mavulut kaliko xil di tamu bar xat tenben, hen e len del valnaon mun. Misak ni, Iesu biteni mi moletin xil bit, “Muleh rerat kaliko rani e mumaen ni ha ven imase.”
45 Melele xa Siu xil xa langgusil Meri lapus naha xa Iesu pol ni, holu e xil lake reitin en. 46 E rute xil labe visal Farasi xil, e labit mesen ni mi xil naha xa Iesu tepol ni. 47 Mak, ma Farasi xil e vat xil na pris xil lakes viton kaonsel nae. Melele xa lamei vituei, lasis xil mun tang labit, “?Ripol ni naha vari mi Iesu? Xi dit pol ni merekel xil holu. 48 Xosxa rimaen ni tengan ixulehi ipol imak, ma moletin xil vus mei like reitin en e lisak pisi tengan lilingi mei ihe suv toto nae. !Xosxa imak, ma mol‑Rom xil mei lihu len Nim Eo nar, e lipurun sen mol‑Isrel xil vus e kantri nar!”
49 Tei e kaonsel, hisen Kaeafas. Xi be vatixar na pris xil e huram ak. E melele xa milong sepinien na ngan xil te kaonsel, biteni mi xil bit, “!Xamim mutakil ti neta! 50 Ihos mak mu xosxa moletin tei takes imat e rin na moletin xil, ili xosxa rimaen mol‑Rom xil mei lipurun sen mol‑Isrel xil vus e kantri nar.” 51 Kaeafas taviten sepinien ak ti vaxo nenemien nan tasen. E, texo polien nan usil vatixar na pris xil te huram ak, xi tehit lelen ni xa Iesu imat ihinat mol‑Isrel xil. 52 E bit lelen ni mun xa Iesu imat e rin na horamue xil vus na Hi xa ladi e kantri sav xil tengan ileh viton xil mei lihe tatit moletin tei takes. 53 Misak ni, e melele nen ak ba, vat xil na Siu xil lapol ni lingxatien tei tengan lihas vin Iesu.
54 Mak, ma Iesu takakao ti mun e valkesao pe met Siu xil. Be reling rute ak e be metimal sav tei xa lakesi ni Efrem, xa de sangas ni uruvuol. E de rute ak del moletin nan xil melengien vahis.
55 Melengien eo xil te Anien te Tavien di bemei sangas, e Siu xil hao langgo ut xil vus te kantri ak e labe Serusalem. Di laba tengan lapol ni sexien xil xa ipol ni xil mei limese pe met Hi tengan likila lipol ni holesok xil te anien eo ak. 56 E moletin xil di lalang ves Iesu. Melele xa lamei vituei e vioh te Nim Eo, di lasis xil mun tang labit, “?Munemi midep? ?Iesu imei e anien eo ak, mu namei ti?” 57 Labiteni mak vengan xa vat xil na pris xil e Farasi xil latesemae ni xa moletin tova xa mikil rute xa Iesu da en imei ihit mesen ni mi xil tengan likila liha lital xati.
11:1-2 Luk 10:38-39 11:1-2 Sion 12:3 11:3 Sion 11:36 11:4 Sion 9:3 11:8 Sion 8:59; 10:31 11:9 Sion 9:4-5; 12:35 11:11 Mat 9:24; 27:52; Mak 5:39; Luk 8:52; Pol 7:60; 1Kor 11:30 11:16 Mak 14:31; Rom 6:8 11:18 Mat 21:17 11:21 Sion 11:32 11:24 Dan 12:2; Sion 5:28-29; 6:39-40; Pol 24:15 11:26 Sion 8:51 11:27 Sion 6:69; Mat 16:16; Sion 6:14 11:30-31 Sion 11:20 11:32 Sion 11:21 11:35 Luk 19:41 11:36 Sion 11:3 11:37 Sion 9:6 11:38 Mat 27:60; Mak 15:46; Luk 23:53; 24:2; Sion 20:1 11:42 Sion 12:30; 6:29; 17:8,21 11:44 Sion 20:6-7 11:45 Luk 16:31; Sion 2:23; 7:31; 8:30; 10:42; 12:11,42 11:49 Sion 18:14 11:52 Sion 10:16; 17:21 11:53 Mat 14:5; Sion 5:18; 7:1,25; 8:37,40 11:54 Sion 7:1; 2:12; 3:22 11:55 Sion 2:13; 6:4; 2Kron 30:17 11:56 Sion 7:11