Sepinien xa diamu te
1 Pita
?Visi iaxa tetis uvei ak?
Pita xa be eloheoh tei na Iesu Kristo iaxa tetis uvei ak e huram hanutap tol e tol e he mun AD (huram 63 xa latetutou ni poten na Iesu). Melele xa Iesu tekes kot ni Pita, xi tehe moletin xa di te sar meseo xil xal tuneli Andru. E Iesu tekes xalu mei lutehe moletin nan xalu. Melele xa Iesu sangas vahe reling ut etan, xi teling Pita tehe eilep e eloheoh sav xil. Polien 1:1–12:24 di bit usil holesok holu xa Pita tepol ni. Di, sangas ni hoxalit meulien nan, Pita tehe taon xa eilep te hal Rom (xa tekes xuxus ni en Babilon) e tepusi xa, e ut xil ngasen, Kristin xil di latekameti texeih vengan xa di latehur sakpurunien xil holu texo he kavmen, texo he mol‑Isrel xil xa latesin Iesu, e texo he titsa te luvosen xil mun xa pispisien nae tenahusil reitinen ti. Tesak ni, Pita tetis uvei ak tengan vapet rat nenemien na Kristin xil.
?Visi iaxa tevuli uvei ak tetiamu?
Pita tetis uvei ak teha mi mol‑Isrel xil xa lateling neketen nae e Iesu Kristo. E melele xa sakpurunien xil temei texeih e taon te hal Serusalem, Kristin xil holu latestokovein rut ak e latehe ut savsav xil sung. E, e rut xil vus xa lateha en, latehithiten longeongen hos usil Iesu Kristo mi moletin xil xa mei lateling neketen nae sung e Iesu Kristo.
?Pita tetis uvei ak veneh?
Pita ien tehei tengan Kristin xil lakila xa Hi tehosei xil mei labe nan - Hi tehosei Kristin xil mei labe Nim Eo nan, mei labe pris nan xil, e mei labe hortan xil te ut nesao. Ve rin ak, ladi e ut etan nggoni ngan xa labe ngan halesav xil.
Pita ien tehei vasel xat Kristin xil tengan lipisen merereen mi vat nae xil te ut etan - Pita tekila xa Kristin xil holu di latekameti texeih texo he ngan xil te kavmen. E tave ti neta xa temak, Pita tesel xat Kristin xil tengan ti lipisen merereen mi xil.
Pita ien tehei vasel xat Kristin xil tengan limerere ni xil mun tang - Pita tesel xat slev xil tengan lipol ihusil nenemien na masta nae xil, atou xil lipisen merereen mi tiramue nae xil, e tiramue xil mun lipisen merereen mi atou nae xil.
Pita ien tehei vasel xat Kristin xil tengan lixulehi lipol ihos - Tave ti neta xa di latehur sakpurunien xil texo he mosav xil, bos tengan Kristin xil lipol ni holesok xil vus itel nenemien xa ihe tan tang e linasa xoles sexien tesa xil ti. Vengan xa momal tengan moletin xil na Kristo ti lihur longpangasien xil ve neketen nae e melele xa lipol ni naha xa momal ixoni ngan xa Iesu mun tehuri.
Pita ien tehei vasel xat ngan xil te Sias tengan limerere kuhi ni elda nae xil - Pita tesel xat elda xil tengan ti lilaxat kuh moletin xil na Hi, e tesel xat Kristin xil mun tengan ti lilong xat elda nae xil te sias.
Nenemien tei xa mahulong te uvei ak de 1 Pita 4:12-13
Tuxoli xil e neketen, munatemanin ni ti longpangasien te xeih xil xa di mungguri tengan vasak pis reitinen te neketen namim. Munanemi ti munahit holesok xil ak linamei ti e xamim. E‑e. Xosali, bos tengan mupolu ni sien vengan xa mudi e suse te longpangasien xa Iesu vari teta en. E, e hoxalit suse ak, melele xa Iesu ipisen minehinen te xeihen nan, xamim mei mupolu kuhi ni sien.
?Naha iaxa di e sepinien ak?
1. Hi tehosei vanut moletin xil tengan mei lihe moletin eo nan xil. (1:1–2:10)
2. Kristin xil limerere ni moletin sav xil itel nenemien xa ihe tan. (2:11–3:7)
3. Tave ti neta xa di langgur longpangasien xil, Kristin xil ti lisoh ixeih e linem xati xa Iesu tehur longpangasien ve xil. (3:8–4:19).
4. Kristin xil limerere ni ngan xil te sias vengan xa lakila xa Iesu imei rilomun. (5:1-14)
1
Sepkilaen na Pita usil uvei ak
1 Inou Pita, eloheoh na Iesu Kristo.
Di nadis uvei ak bat mi xamim, Kristin xil xa mudi e provins xil te hal Pontas, Kalesia, Kapadosia, Esia, e Bitinia. Hi tehosei xamim mei mube nan, xa xosali, sakpurunien tesak ni xamim muteletasil ba muteti e rute xil vus e ut etan nggoni ngan halesav xil.
2 Hi Tamer tekil xamim tetiamu nousav e tehosei xamim tehusil nenemien nan. Misak ni, Ninin nan di pol ni xamim mube eo tengan mulong xat Iesu Kristo e ren isak ni xamim mei mumese ra tesaen namim xil.
Nasis mi Hi tengan meulien namim ipolu ni eheien hos e tomat nan.
Rimes Hi vengan xa xi tepol ni suse tengan vateh meulien e xir
3 !Risa memesien iha mi Hi xa be Tame Iesu Kristo, Suv nar! Vengan xa esaeen nan mahulong, Hi misak ni xir mei rabe neta hu e mei rabe horamue nan xil reitin. E ranesi xa rimea rilomun ra maten e rihur meulien sal vengan xa di rabisti del Iesu xa temea rilomun ra maten.
4 E rakil kuhi mun xa ti rihur neta xa Hi teling kuhi tengan ihe na moletin nan xil. Xi teling kuh neta xil ak ladi e ut nesao, e lasakras lamerer, lasakras lasa, e lasakras lave neta metu.
5 Holesok xil ak labe namim xa Hi di misikoe xol xamim del xeihen nan. Xi di misikoe xol xamim nggo neketen namim ituxoh hoxalite te holesok xil vus, xa ipisen ni mi xamim e melele xa mutuxoh hoxalit suse te neketen namim.
6 Misak ni, mukila muhesi xamim ihe holu, vengan xa holesok xil ak be reitin, neta sav xa, xosali ak di munggur longpangasien xil nggo melele te xeih xil xa di mubisu ni xa be te melengien vahis tang.
7 Melele te xeih xil ak di bemei tengan vapisen reitinen te neketen namim, xa bos mak mu mili gol xa memese tevi xa latelingi tete upang tengan vaa moten ni, vengan xa, vatova, gol ak ha ikesae. E vengan xa sexien namim xil di lapisen ni xa neketen namim be reitin, Hi isa memesien, his tei xa eilep, e merereen mi xamim e melele xa Iesu imei rilomun en.
8 Tave ti neta xa mutapus ti mu Iesu Kristo, eheien namim da en ngamu. Reitin, neta sav xa mutapus ti taxeak, e di muneket en tuei. Misak ni, di mulonge bos pupu e mupolu ni sien tei xa sepinien tovuol xa vapin tengan vahit usili.
9 Mupolu ni sien ak vengan xa di munggur huit neketen namim xa di mudatili, vengan xa be reitin xa Hi di miteh meulien e xamim.
10-11 Provet xil tetiamu latehit lelen rin xa Hi iteh meulien e xamim e itep iaxa xi ipisen eheien hos nan mi xamim. Xil latelang ves koute teni e latenem holu usili tengan mei lakil kuhi. Ma melele xa Ninin na Kristo tese xat provet xil ak, tesak ni xil latehit lelen ni usil longpangasien xa Kristo ihuri itiamu, itel his xa eilep xa ihuri itutou sung. E provet xil ak latesak pisi tengan lalang ni melele xati xa netak istal en e istal itep.
12 E Hi tepisen ni mi provet xil ak xa sepinien nae xil tenave te melele xil ti xa lateti en tengan vatutou ni xil, e be nar te xosali ak tengan vatutou ni xir. Reitin, naha xa xil latehit lelen ni usili tetiamu, moletin xil di labit usili xosali. Di labit usili e melele xa di lasa longeongen hos mi xamim nggo xeihen na Ninin Eo xa Hi te ut nesao tesila teha mi xamim. Reitin li, holesok xil di lastal ve rin namim xosali, masxaxa xil mun labesi xil pupu e melele xa di laketeh bemei e lapusi xa di mistal.
Sexien nar imese tevi vengan xa Hi texal rat xir ni re Iesu Kristo
13 Ma, vengan xa longeongen hos xa Hi di miteh meulien e xir bos pupu, muvue xat nenemien namim tengan mupol ni neta xil ak: muxuxou kuhi ve sexien namim xil e muling sen nenesien namim iti e eheien hos xa Iesu Kristo ipisen ni mi xamim e melele xa mei istal en.
14 Mulong xat Hi ixoni horamue hos nan xil xa di lalong xat tamexil. Munapol ni ti mun sexien tesa xil xa mutepol ni tetiamu, e melele xa mutnahur ti mu kilakilen usil Iesu Kristo.
15 Ma sexien namim isav e muhe eo e holesok xil vus xa di mupol ni. Reitin, muhe eo vengan xa Hi xa tekes xamim mei mube nan, xi be eo.
16 Ngan ak be reitin, vengan xa latetisi e Vanuvei Eo latehit, “Muhe eo vengan xa inou nabe eo.” (Lev 19:2)
17 Be reitin xa di musis mi Hi xa di milepis rin na moletin xil vus e tapus ti moletin tova xa be nesao mu be tan vali mosav xil, e di mukes ni Tata. Ve rin ak, momal mun tengan mupisen merereen namim mini itel meulien namim e melele xil ngasen xa mudi e ut etan nggoni ngan halesav xil.
18 Reitin, mumerere mi Hi itel meulien tevi namim vengan xa mukil neta hos xil ngamu xa Hi tepol ni tengan vaxal rerat meulien namim. Tetiamu, mutehusil xat sexien votei xil na avu namim xil xa tehe neta sav tang. E, taxeak, Hi texal rerat xamim mutemeluv ra sexien votei xil ak. E melele xa texal rerat xamim, tenapol ni ti vatel neta xa mikila mei vasa vatova vaxoni silva mu gol.
19 E‑e, Hi texal rerat xamim ni neta tei xa bos mak mu mili holesok xil ngasen te ut etan. Xi texal rerat xamim ni re Suv Iesu Kristo, ngan xa temat texoni sulut sipsip te sanien eo xa memese tevi e tesaen tovuol en.
20 Tetiamu nousav, e melele xa Hi tenapeas ni ut etan ti mu, xi tehosei Iesu tuei tengan isa rat meulien nan. E taxeak, sangas ni hoxalite te holesok xil vus, Hi tepisen xi mi xamim e melele xa tesa ni temei ve rin namim.
21 Iesu be suse xa xamim mei muneket e Hi, xa tesak ni temea rilomun ra maten e tesa his xa be eilep mini. Ve rin ak, di muling neketen e nenesien namim nggeih e Hi.
22 Melele xa mulong xat reitinen na Hi, misak ni xamim mumese ra tesaen xil namim. Ve rin ak, mupusi xa di iemim bei tuemim xil e neketen del eheien tei xa be reitin. Misak ni, itel meulien tevi namim, muxulehi ti mupisen eheien mi xamim.
23 Mupol ni imak vengan xa munggur meulien hu tei xa misav ni meulien xa mutehuri texo tamemim del ninemim xil te ut etan, xa hoxalite teni tehe maten tang. Mutehur meulien hu ak texo sepinien na Hi xa meul vehakut e misakras vakesae vatova.
24 Ngan ak nggoni naha xa Vanuvei Eo di biteni bit,
“Nggoni husmunae, meulien na moletin xil vus te ut etan nati ti navehi.
E hosien xa di lapusi be te melengien vahis tang nggoni hungovae xil te urmatu.
Reitin, husmunae xil mei langguxu katen e hungovae xil di lamereh labe tan,
25 e sepinien na Hi Suv ita vehakut xa vehakut tang.” (Aes 40:6-8)
Sepinien ak be longeongen hos xa latehithiteni mi xamim.