Sepinien xa diamu te
Filimon
?Visi iaxa tetis uvei ak?
Pol tetis sepinien ak e huram xa sangas ni 64 AD (huram xil tetutou ni poten na Iesu) e melele taxa tetis uvei tei mi Kristin xil e taon te hal Kolose. Pol tete nim te xeih e taon xa mahulong te hal Rom, e tetis uvei xalu ak e telingi e he Tikikas e Onesimas tengan lalihuri e lalisa ni mi ngan xil te hal Kolose.
?Visi iaxa tevuli uvei ak tetiamu?
Pol tetis sepinien ak teha mi moletin tei te sias te hal Kolose, hisen Filimon. Texo polien na Pol e Kolose, Filimon mei be Kristin tei. E Filimon temaen Kristin xil di latevituei e tim san. Xi tehe eilep tei xa teleh slev xil di latepol mini. Pol tetis uvei ak mi Filimon tengan vasisi e vahur pilei rilomun ni slev tei nan, hisen Onesimas.
?Pol tetis uvei ak veneh?
Pol ien tehei tengan vapisen suse xa Kristin xil liketeh ihos ni ngan xil xa di lasa mi xil - Nggusil rae na mol‑Rom xil, momal tengan Filimon vahas vin Onesimas vengan xa xi mikan ni neta tei nan e milesae relingi. E Pol tesis Filimon tengan iketeh ihos rilomun mi Onesimas. E tesisi mun tengan ipol ihos mini e napol ni ti mun mini naxoni ngan xa xi be slev tei nan tang. Ipol ni mini ixoni ngan xa xi be tuneli tei e neketen. Imak, ma xir mun rikila riketeh ihos rilomun mi ngan xil xa di lapol misa mi xir.
Pol ien tehei tengan vapisen ni xa, pe met Hi, xir vus rapin tang - E melele xa Pol temeul teta, ngan xil xa labe eilep, e ngan xil xa labe slev nae, lasakras lamos vituei. E nggo Iesu, xir vus rapin tang, neta sav xos rabe eilep mu rabe slev, rabe moletin xa holesok nar holu mu rabe hoeo tang, rabe moletin te maluxoluk mu rabe metalo, mu rabe malohos mu rabe atou. Vengan xir vus xa di raneket e Iesu, rapin tang pe met Hi.
Pol ien tehei tengan vapisen sexien te merereen - Pol tehe eilep te sias e mikila vasepin vaxeih mi Filimon tengan ihur pilei Onesimas e navasi ti. E vengan xa Pol temerere ni Filimon, xi tesa sepinien xa tehos tang mini e tesisi tengan vapol vahos mi Onesimas. Bos xa xir mun rimerere ni moletin sav xil.
Vatit nenemien tei te uvei ak de Filimon 1:15-16
Nahe xos Hi maen Onesimas telesae relinguk vuteili tengan melele xa itilomun ihat, xi mikila ita kat visaluk vehakut. E taxeak, xi tave slev nam ti tang. !E‑e! Xi bos mak mu mili slev tei, xi mei be tumali hos tei. Eheien navan di en, e xouk, eheien nam iti en ili, vengan xi be slev nam, e be tumali mun vari e his Suv Iesu.
?Naha iaxa di e uvei ak?
1. Pol besi xi himetu ve polien na Filimon. (1:1-7)
2. Pol misis Filimon tengan iketeh ihos rilomun mi Onesimas. (1:8-25)
1
Sepkilaen na Pol usil uvei ak
1 Inou Pol, nade nim te xeih vengan xa di nabit rat longeongen hos usil Iesu Kristo.
Inou del tumali Timoti, mabit bos makoe minuk, Filimon. Xouk obe moletin hos tei te polien na Iesu nggoni xamel e eheien namel di e xouk.
2 Mabit malhit bos makoe mun mi Apia, xa be hinoxoli namel. E bos makoe mun mi Akipas, xa di pol mi Iesu nggoni moletin hos tei te vaeen nan nggoni xamel. E bos makoe mun mi ngan xil xa langgusil Hi xa di lasukul e tim sam.
3 Nasis tengan eheien hos e tomat na Hi Tamer e Suv nar, Iesu Kristo, iti mi xamim.
Pol misep usil eheien e neketen na Filimon
4 Tuxoli Filimon, melele xa di nanem xatuk e sisen xil navan, vehakut di names Hi ve xouk.
5 Nasis mak vengan xa nalongeong usil neketen nam e Iesu Kristo, e eheien xa di opisen ni mi moletin xil na Hi.
6 Nasis mi Hi tengan melele xa mumei vituei, isak ni neketen namim ixeih mu, e isak ni xamim mukilakil kuhi ni holesok hos xil vus xa be namim vengan mubisti del Iesu Kristo.
7 Tuxoli, eheien nam mi mosav misak ni nou nabesi pupu ni nou e di dal rat nenemien na moletin xil na Hi.
Pol misis Filimon tengan ihur pilei slev nan xa telesae relingi
8 Vengan xa nakil kuh eheien nam mi mosav xil, inou nakila xa xosxa nisemae minuk e his Iesu Kristo tengan upol ni neta ngan, ma xouk upol ni.
9 E nabesi nou tang tengan nisisuk e upol ni naha xa ieok bei ve eheien nam e nou, xa nabe momatu ngamu e nade nim te xeih taxeak ve his Iesu Kristo.
10 Nasisuk ve rin na Onesimas. Xi nggoni horamue tei navan vengan xa, melele xa nade nim te xeih, natetutou ni e xi tekamet meulien hu.
11 Tetiamu, melele xa telesae relinguk, xi tenave moletin hos te tutouen ti. E taxeak, xi bos tengan itutou ni xouk, e itutou ni nou mun.
12 Eheien navan di pupu e Onesimas. E neta sav xa mak, di nasa rilomun ni bat minuk.
13 Ieok bei tengan namur xati vate visal nou vaxolesuk tengan vatutou ni nou e melele xa nade nim te xeih ve longeongen hos xa di nabithiteni.
14 E ieok ti tavei napol ni ti neta xa xouk otamaen nou ti tengan napol ni. !E‑e! Ieok bei tengan nipol ni naha xa xouk kestang di onemi obit bos. Isak ni, tutouen xa usa ni minou ihusil nenemien hos nam kestang, e nave ti vengan nanggeih xatuk tengan opol ni.
15 Nahe xos Hi maen Onesimas telesae relinguk vuteili tengan melele xa itilomun ihat, xi mikila ita kat visaluk vehakut.
16 E taxeak, xi tave slev nam ti tang. !E‑e! Xi bos mak mu mili slev tei, xi mei be tumali hos tei. Eheien navan di en, e xouk, eheien nam iti en ili, vengan xi be slev nam, e be tumali mun vari e his Suv Iesu.
17 Mak, ma xosxa onemi obit rupol mi Suv tei takes, ma uhur pilei ixoni ngan taxa ovur pilei nou.
18 Xosxa xi tepol ni neta tova tesa minuk, mu pol ni kaon tei delak, inou iaxa nixal rati.
19 !Pus ti mu! Nadis ngan ak ni heok xati: Inou Pol nixal rat holesok xil xa be kaon na Onesimas. (E xouk iem nabong ni kaon nam ti xa del xat nou, vengan xouk otehur meulien hu texo nou.)
20 Tuxoli hos navan li, ieok bei pupu tengan upol ni naha xa inou di nasisi minuk vengan ralu vus rube moletin na Iesu Kristo. Ngan ak isak ni nou nipolu ni sien.
21 Melele xa di ladis sepinien navan xil ak, inou nakil kuhi mak xa xouk upol ni ixoni ngan xa di nasisi. !Io! E nakila xa upol ni ili.
22 Nabit nasisuk mun ve neta tei: usak mesen vontoen tova e nim mam tengan mei nita en. Vengan nake reitin xa Hi isa huit sisen namim tengan nistal ra nim te xeih ak e nihat nite visal xamim rilomun.
Sepinien kor
23 Epapras xa de nim te xeih del nou ve his Iesu Kristo, xi bit ‘bos makoe’ minuk.
24 E Mak, Aristakas, Dimas e Luk mun xa di mapol vituei, xil mun labit lavit ‘bos makoe’ minuk.
25 Nasis tengan eheien hos na Suv Iesu iti mi xamim vus.