Sepinien xa diamu te
Pilipae
?Visi iaxa tetis uvei ak?
Pol, xa tehe eloheoh tei na Iesu Kristo tetis uvei ak e huram 61 AD (huram xil tetutou ni poten na Iesu), melele xa tete nim te xeih e taon xa mahulong te hal Rom.
?Visi iaxa tevuli uvei ak tetiamu?
Pol tetis uvei ak teha mi Kristin xil xa lateti e taon te hal Pilipae. Melele xa Pol di tekakao tengan vahithiten longeongen hos usil Iesu Kristo e kakaoen nan xa tehe valu nen, xi tepus moletin tei te provins te hal Masedonia texo metuveen tei. Moletin ak tekesi tengan vamei visal xil. Ma, Pol tehe Masedonia, e teha rohon e taon te hal Pilipae. E Pilipae, moletin holu mei lateling neketen nae e Iesu.
?Pol tetis uvei ak veneh?
Pol ien tehei tengan vames Kristin xil te hal Pilipae ve sanien nae - Melele xa Kristin xil te hal Pilipae latelongeong ni xa Pol tete he kavmen te hal Rom, latesa sanien nae xil teha tengan vatutou ni.
Pol ien tehei tengan vapispisi mi Kristin xil te hal Pilipae ni sexien hos xil xa ipisen ni xa moletin be Kristin tei - Pol tesel xat ngan xil te sias te hal Pilipae tehit Kristin tei, nenemien nan ihe tan ixoni ngan xa Iesu Kristo tepol ni, iloh ixeih tengan ituxoh hoxalit lohen te neketen nan, nanexo ti ve neta tova, e ikila ihisu ni melele te xeih xil itel xeihen xa Iesu Kristo isa ni mini.
Pol ien tehei tengan vasel xat Kristin xil te hal Pilipae tengan ti lihur sien vehakut iti e meulien nae - Melele xa Pol tetis sepinien ak teha mi Kristin xil te hal Pilipae, xil di latehur sakpurunien xil te xeih ve neketen nae. Misak ni, Pol tesel xat xil tengan ti lipol ni holesok xil vus itel sien tang.
Pol ien tehei tengan vasel xat Kristin xil te hal Pilipae tehit lipol vituei ihusil sexien hos - Longpangasien xil e pispisien te luvosen di latesak ni Kristin xil te hal Pilipae di latengor mi xil mun tang. Ma, Pol tesel xat xil tehit ti lipol vituei ihusil sexien hos.
Vatit nenemien tei te uvei ak de Pilipae 1:21
Vengan xosxa nimeul, nipet rat Iesu Kristo ixo meulien navan. E xosxa nimat, ngan ak ihos mak mu, vengan xa ha nite visali.
Vatit nenemien teimun te uvei ak de Pilipae 2:5
Nenemien namim mei ixoni nenemien na Iesu Kristo xa tehe tan.
?Naha iaxa di e uvei ak?
1. Momal tengan ngan xil xa di langgusil Kristo ti lihisu ni melengien xil te xeih itel sien. (1:1-30)
2. Momal tengan ngan xil xa di langgusil Kristo ti lipol ni sexien hos xil itel sien. (2:1-30)
3. Momal tengan ngan xil xa di langgusil Kristo ti lisoh ixeih e neketen nae itel sien. (3:1–4:1)
4. Momal tengan ngan xil xa di langgusil Kristo ti litutou ni mosav xil itel sien. (4:2-23)
1
Sepkilaen na Pol usil uvei ak
1 Inou Pol xamel Timoti, xa mabe moletin te polien lu na Iesu Kristo, di madis uvei ak.
Madisi bat mi xamim moletin xil na Hi te hal Pilipae xa mubisti del Iesu Kristo, e mi elda e dikon xil mun namim.
2 Masis tengan eheien hos e tomat na Hi Tamer e Suv Iesu Kristo iti mi xamim vus.
Pol memes Hi ve neketen na Kristin xil te hal Pilipae
3 Vehakut di names Hi navan e melele xil vus xa di nanem usil xamim.
4 Reitin, di nasis mi Hi vehakut e rin namim del sien.
5 Names Hi vengan xa, melele xa mutelong kokot ni longeongen hos mei duxoh xosali, di mupol vituei del nou tengan ti risak ni moletin sav xil likil longeongen hos usil Iesu Kristo.
6 E nake reitin xa Hi, xa tepol kokot ni polien hos ak e meulien namim, itit ni ngan xa ipol ni iha vuma … ipol sen ni e melele xa Iesu Kristo imei rilomun en.
7 Momal tengan nilonge ihos ve xamim vengan xa di mupisen eheien namim minou melele xa rapol vituei e polien xa Hi tesa ni minou nggusil eheien hos nan. Vengan xa xamim di mudutou ni nou e melele xa nade nim te xeih ak. E di mudutou ni nou mun e melele xa di nasep kila pe met moletin xil xa longeongen hos na Iesu Kristo be reitin.
8 Hi pus kila be reitin xa ieok bei holu tengan nipus rilomun ni xamim, vengan xa eheien navan de xamim mak mu nggoni ngan taxa eheien na Iesu Kristo mun de xamim.
9 Di nasis Hi tengan isak ni xamim mukil kuhi mu xa itep ma iemim ihei xamim ihe holu mu ixo sexien xa imal. E nasis mun tengan mukil naha xa momal tengan ti mupol ni e melengien xil vus.
10 Imak, ma e neta xil vus xa mei istal mi xamim, ti mukil kuh sexien hos xil tengan mupol ni, e ti, mupol ni sung. Isak ni, e melele xa Iesu Kristo itilomun en tengan ilepis moletin xil vus, xamim mukila musoh mumese pe meten e holesok ihe tovuol iha xat rin namim.
11 Imak vengan xa Iesu Kristo ipus kila xa meulien namim nggur huite te momalen xa nggo visali. E moletin sav xil xa lipusi lisa memesien iha mi Hi ven, e ti lipet rat hisen.
Longeongen hos usil Iesu Kristo mikapis e rute xil vus, neta sav xa Pol de nim te xeih
12 Tuxoli e hinoxoli xil, ieok bei tengan mukila xa longpangasien xa bemei minou, Hi di bilesi tengan vatutou ni longeongen hos ak vaha vakapis e rute xil vus mak mu.
13 Vengan mereketeh xil vus te taon xa mahulong te hal Rom e moletin sav xil vus mun lakila xa nade nim te xeih ak vengan xa di nanggusil xat Iesu Kristo.
14 Misak ni, tuxoli e hinoxoli xil holu xa ladi inggak, melele xa lapusi xa nade nim te xeih ve neketen navan, neketen nae e Suv Iesu mei nggeih pilei sung. Ma, ulikanen nae be reling xil tengan ha lihithiten sepinien na Hi pe met moletin sav xil.
15 Be reitin xa rut moletin xil di labit usil Iesu Kristo vengan xa di laketeh misa ni nou e iexil bei tengan lali inou. E rute ngan xil di labit usili vengan xa iexil bei tengan litutou ni moletin sav xil itela.
16 Ngan xil ak di lasep usil Iesu Kristo vengan xa eheien nae di e nou. Xil lakila xa lateling inou nade nim te xeih vengan xa di naketeh xol longeongen hos ak.
17 E moletin sav xil latavithiten longeongen hos usil Iesu Kristo ti vatel nenemien xa momal. Xil di lapol ni nggo nenemien tei xa be nesao vengan xa iexil bei tengan vasak ni longpangasien navan e nim te xeih ak mei vahe eilep pilei sung.
18 E neta sav xa mak, nabesi inou. Nabesi nou vengan xa moletin xil di labit usil Iesu Kristo e rin holu, rute xil del xat nenemien xa momal, e rute sav xil del xat nenemien xa tamal ti. E inou dit namaal tang ven.
19 Inou namaal vengan xa nakila xa Hi isa huit sisen namim e rin navan e nakila xa Ninin na Iesu Kristo isak ni holesok xil ak mei ihe suse xa ha veok imase ra nim te xeih ixo en.
20 Ieok bei mak mu e di nanesi xa be reitin xa ninapol ni ti neta xa isak ni nou nihe unoun ven. Ieok bei xa ulikanen navan ihe tovuol melele xa ti nisepin tengan nipet rat Iesu Kristo vehakut ixo tenbeok, neta sav xos nimeul mu nimat ven.
21 Vengan xosxa nimeul, nipet rat Iesu Kristo ixo meulien navan. E xosxa nimat, ngan ak ihos mak mu, vengan xa ha nite visali.
22 Ma xosxa nimeul tang nita itel xat tenbeok, ma nikila nipol e meulien navan tengan nihur huite ve Hi. E natakil kuh ti ngan xave iaxa ieok bei mak mu.
23 Ngan xalu ak di lulihi inou usil suse lu. Ngan xa bos pilei mak, ieok bei mak mu tengan nistokovein tenbeok e ha nite visal Iesu Kristo.
24 E ve xamim, bos mak mu xa nimeul tang nita itel xat tenbeok tengan nitit ni ngan xa ti nitutou ni xamim.
25 E nakila xa nimeul tang nita vengan xa nake reitin xa ti nitutou ni xamim tengan neketen namim mei imatu mu e mupolu ni sien.
26 Ma, melele xa nihat nipus rilomun ni xamim, mukila musep koai ihe holu ve naha xa Iesu Kristo tepol ni e rin navan.
27 E neta sav naha xa istal e meulien navan, musak ni meulien namim ihusil xat sexien hos na ngan xil xa di langgusil xat longeongen hos na Iesu Kristo. Imak, ma neta sav xosxa hat nipus xamim mu nisakras, niteong ni xa xamim di musoh vituei nggeih del nenemien tei takes, e di mubae vituei vengan xa di muling neketen namim e longeongen hos.
28 Ihos xa ulimim nakan ni ti elu namim xil. Vengan melele xa musoh nggeih pe metexil, di pisen ni xa naha xa di obit usili be reitin. E di pisen ni mun xa Hi ihas lelen xil, e iteh meulien e xamim. E be Hi vari xa di misak ni holesok xil ak mei mistal e rin namim.
29 Vengan xa xi pol bos pupu mi xamim melele xa maen xamim muling neketen namim e Iesu Kristo, e maen xamim munggur longpangasien ve hisen.
30 E be reitin xa di munggur hisit longpangasien ve neketen namim nggoni ngan taxa mutepusi xa inou natehuri melele xa nateti visal xamim, e xa mulonge di tamu nangguri inggak.