19
Ngan xil te ut nesao lames Hi ve pangasien xa misa ni mi taon te hal Babilon
Dutou ni ngan ak, nalong tangalen tei xa mahulong nggo ut nesao xa nggoni vanut moletin tei xa mahulong xa lakei be nesao labit,
“!Memesien ba mi Hi!
!Xi kestang di miteh meulien, e minehinen te xeihen nan mahulong pupu!
Lepisien nan xil be reitin e momal.
Xi misa pangasien ba mi hoeaso
xa tepurun ut etan tetel sexien tesa nan xil.
Reitin, Hi misa xoles longpangasien mini
vengan xa xi tehu vin moletin te polien nan xil.”
Xil lakei be nesao vatei mun labit,
“!Memesien ba mi Hi!
Vengan xa xi tesak ni eas te upang xa di ngga len taon xa eilep xiak ve sexien tesa nan xil
tengan ihe nesao vehakut xa vehakut tang.”
Elda hanutap tei e hat mun (24) e neta hat (4) xa lameul ladi lamot mi Hi xa dotan de von xeihen nan. Xil labiteni labit,
“!Reitin! !Memesien ba mi Hi!”
Moletin xil na Hi labesi xil ve tetelien na ngan xa nggoni sulut sipsip te sanien eo
Di, nalong rae tei xa di misepin nggo visal von xeihen na Hi xa biteni bit,
“!Xamim xa di mupol mi Hi nar, mumesi!
!Xamim xa mumerere ni,
ngan xil xa latellep ba duxol ngan xil xa latereli, mumesi!”
Di, nalong tangalen tei xa mahulong nggo ut nesao xa nggoni vanut moletin tei xa mahulong. Xil lakei nggeih nggoni melele xa tahe xa eilep di miti hat xil mu nggoni melele xa veta di posou nggeih. Nalong xil di lakei be nesao labit,
“!Memesien ba mi Hi!
Vengan Hi nar xa be Hi Suv te Xeihen,
xi be suv toto xa di milaxat holesok xil vus.
!Ma rihesi xir e ripet rat hisen!
Rimes ngan xa minehinen te xeihen nan mahulong.
Rimesi vengan xa melengien te tetelien na ngan xa nggoni sulut sipsip di bemei,
e atou nan misak mesen xi ven.
Mi atou nan, lasa eising hos tei xa mieh e minehin vengan memese mak mu.”
(Eising ak be sexien hos xil na moletin xil na Hi.)
Di, masxaxa biteni minou bit, “Utis sepinien ak: Tuxolxatien na Hi iti mi ngan xil xa lasilasil ni xil tengan lave anien te tetelien na ngan xa nggoni sulut sipsip.” E masxaxa bit rilomun ni minou bit, “Ngan ak be sepinien te reitinen na Hi.”
10 Melele xa biteni mak inou natingeiril e namot nabe tan visal len. E xi biteni minou bit, “!Onapol ni ti namak! Inou mun nabe ngan xa di napol mi Hi nggoni xouk e nggoni tumali xil xa lake reitin e sepinien usil Iesu. !Umot mi Hi kestang! Vengan reitinen usil Iesu be vatite te sepinien xa provet xil latehit lelen ni texo Ninin na Hi.”
Ngan xa miloh e hos xa mieh bemei e bas tan ni moletin tesa xil
11 Di, napus puiteh te ut nesao misaha, e natemanin xa napus hos tei xa mieh di mistal nggo en. E ngan xa di miloh en be xi xa lakesi ni ‘Reitinen e Vatit Nenesien.’ Del sexien xa momal, xi di milepis rin na moletin xil, e di bae del elu nan xil. 12 Meten minehin nggoni upang, e vatluvoluv te lelaxatien holu di e vatin. Ladis his tei xa eilep pupu da en xa mosav xil latakil ti, xi kestang mikil koute teni. 13 E hisen teimun be ‘Vatit Sepinien na Hi.’ E ra ba xat rin xil vus te eising te mieh xa mising ni. 14 Moletin xil te vaeen te ut nesao langgusili. Xil mun di laloh e hos xil xa lamieh e lasing ni eising xa mieh xa memese kuhi. 15 Tiei xa mikan mistal nggo vulongen, e di bas tan vuol ni moletin tesa xil e kantri xil dela. Lelaxatien nan ixeih e ileh viton moletin tesa xil tengan ihu lelen xil e ipisen ni xa ekaten na Hi te Xeihen mahulong ba xat xil ve sexien tesa nae xil. Ipol ni mi xil ixoni melele xa labekis huit grep xil tengan sute valeh vaxo en. 16 Latetis his tei tete eising nan xa teviei e tete marlen mun xa tehit, “Ngan ak Suv Toto na suv toto sav xil, e Vat na vat sav xil.”
17 Di, napus masxaxa tei xa di misoh de meteneai. Xi mikei nggeih ba ni tuman xil vus xa di langga e tilang hat bit, “!Mumei! !Mumei vituei ve anien xa eilep na Hi! 18 Mumei e mua tiei na suv toto xil, na vat xil te vaeen, na moletin te vaeen nae xil, na hos xil e na moletin xil mun xa di laloh en. Mumei e mua tiei na moletin xil vus ak: ngan xil xa vexil memase ba duxoh ngan xil xa labe slev, ngan xil xa latellep ba duxoh ngan xil xa latereli.”
19 Di, napus vongoro tesa xa testal ra tas tetiamu, xi bemei vituei del suv toto xil te ut etan, e del moletin te vaeen nae xil mun. Xil lamei vituei tengan lavae vatel Iesu xa di miloh e hos nan e vatel moletin nan xil mun. 20 Xi dal xat vongoro tesa del provet te luvosen nan xa tepol ni merekel xil pe met vongoro ak. Del merekel nae lateluvos ngan xil xa latehur simeleleen na vongoro e ngan xil mun xa latemot mi nanao nan. Iesu miso te meul ni xalu lube upang xa eilep xa di pili vehakut nggoni vulut upang te venu. 21 Di, Iesu, xa miloh e hos nan, bas vin moletin te vaeen xil vus na vongoro ak del tiei xa mistal nggo vulongen. E tuman xil lamei langga vin xil ni tiei na moletin xil ak.
19:2 Sam 19:9; 119:137; Rev 16:7 19:2 Dut 32:43; 2King 9:7; Sam 79:10; Rev 6:10 19:3 Aes 34:10 19:4 1King 22:19; 2Kron 18:18; Sam 47:8; Aes 6:1; Esek 1:26-27; Rev 4:2,9; 5:1,7,13; 6:16; 7:10,15; 21:5 19:5 Sam 22:23; 134:1; 135:1; 115:13; Rev 11:18 19:6 Esek 1:24; 43:2; Rev 1:15; 14:2 19:6 Esek 1:24; 43:2; Rev 1:15; 14:2; Eks 15:18; Sam 22:28; 93:1; 97:1; 99:1; Dan 7:14; Sak 14:9; Rev 11:15 19:8 Aes 61:10 19:9 Mat 22:2-3; Luk 14:15 19:10 Pol 10:25-26; Rev 22:8-9 19:11 Esek 1:1; Rev 4:1; Sak 1:8; 6:3,6; Rev 6:2; 1:5; 3:14; Sam 96:13; 11:4 19:12 Dan 10:6; Rev 1:14; 2:17-18 19:13 Aes 63:1-3; Sion 1:1,14 19:15 Aes 49:2; Rev 1:16; 2:12,16; Sam 2:9; Rev 12:5; Aes 63:3; Tang 1:15; Soel 3:13; Rev 14:20; Amos 3:13; 4:13; Rev 1:8; 4:8; 11:17; 15:3; 16:7,14; 19:6; 21:22 19:16 Dut 10:17; Dan 2:47; 1Tim 6:15; Rev 17:14 19:17 Esek 39:17-20 19:19 Sam 2:2 19:20 Rev 13:7,12-17; 14:9,11; 16:2; 20:4,10,15; Aes 30:33 19:21 Esek 39:17,20