GALATIITE
Suh Pool Ih Raang Arah Le
Ephangjatjih
Ruurang ese Jisu tiit ah phang tumbaat rumta, Jehudi lah angka loong ah nep tenroon lam ih poon rumta, erah raangtaan ih jengkhaap dongta ami kristaan angsuh nyia hanpiite angsuh Moses Hootthe ah ekap theng tam lakap theng ah. Pool ih li rumta erah ekap jaatjaat etheng ngeh tah angka—elang mok ih ah, roidong raangtaan ibah Jisu suh tuungmaang je theng, erah doba Rangte thung puntheng ang ah. Enoothong Galati chaas loong, Esia mong nawa Room juungkhuung esiit dowa mina loong ah ih Pool jeng ah daan rum ano li rumta thoontang ih ese hanpiite ang suba Moses Hootthe uh echaat wak ih theng, erah doba Rangte re nah epun ejun ang ah.
Pool ih Galatiite loong suh leeraang raang maatta ah langla Rangte ko neng tuungmaang ah ese ih toomlek rum ah nyia amiisak lam nah toom khoom rum ah ngeh ah, mamah liidoh neng loong suh eki nyootte loong ih kiinyoot rum kano raang korumta. Pool ih heh teeteewah ah mina loong suh ngah Jisu Kristo Kaamwah ngeh noisok rumta. Heh ah Rangte jiin nawa ra taha Kaamwah ih poon theng ngeh angta, mina chaan nawa ih tah angka, heh mootkaat ah langla Jehudi lah angte loong raang ih angta. Eno heh ih laat dong nyootsoot rumta tuungmaang luulu ibah Rangte re nah epun ejun ang thuk ah. Leedaap ethoon ko adi Pool ih noisok ha hanpiite dang ajang abah minchan nyia Kristo suh tuungmaang nawa dongha.
Hemong Dowa Jatjih
Ephangjatjih (1:1-10)
Pool ah Kaamwah (1:11—2:21)
Ruurangese ah Rangte minchan (3:1—4:31)
Hanpiite pongwan nyia banlam esuh neng mat angta (5:1—6:10)
Hethoon (6:11-18)
1
Pool taangnawa le, marah mih rah kaamwah raangtaan ih poon theng ngeh angta warah, mina taangnawa tah angka nyia mina thung ih tah angka, Enoothong erah Jisu taangnawa ra taha nyia Jisu Kristo tek nawa ngaaksaat siitte Rangte taangnawa ra taha. Ani wa hanpiite loong enep nga damdi Galati chaaste loong suh jengseera ah maat hi:
Seng loong Wah Rangte nyia Teesu Jisu Kristo ih minchan koh hanno semroongroong toomtong thuk han.
Seng loong ah charangneng ethih roidong dowa puipang suh Kristo ih heh teeteewah sak ah, seng loong rangdah raang ih kota, Rangte nyia heh Wah lih jen phan suh ah. Rangte ah roitang raangtaan ih phoongpha theng toom ang ah! Amen.
Esiit Ruurangese
Sen thung ah seek ih mamah lek lan ngeh rapne paatja lang! Sen ah Kristo minchan* nawa ih taat poon tahan eno sen ih ‘ruurangese ehoh ah chaat han. Amiisak diibah ruurangese tiit ah ehoh amukka, enoothong sen loong thung thet hoomte nyia Kristo ruurangese ah leksiit suh woot chungte mih eje, erah thoi ngah ih baat rumhala. Enoothong seng ih baat ibah uh rangmong nawa rangsah ih baat abah uh Jisu tiit marah baatti erah lah ang thang ih mok we baat han bah, erah mih ah dut haat ano soolam nah toom wang thuk ah. Jaakhoh ni uh seng ih baat choi, amadi uh ngah ih we baat rumhala: Ngo ih ang abah uh ruurangese tiit jaakhoh ni marah kapchaat tan erah lah ang thang ih ehoh mok baat han bah, erah mih ah dut haat ano soolam nah toom wang thuk ah!
10 Arah jenglang ah mina loong laktung nah ngah suh toom seechoh hang likhiik tam jeng lang? Emabah tah angka! Ngah ih jamhang abah Rangte ih toom seechoh ah liihang! Mina loong ih seechoh suh tam liihang? Ngah ih emah mok thun tang bah ngah Kristo laksuh tah ang thengtang.
Pool ah Kaamwah mamah ih hoonta
11 Phoh ano loong, ngah ih baat rum thaak ha, ruurangese marah baat rumhala erah, mina thung nawa ih tah angka. 12 Ngah ih mina jiin nawa chothaang ang rah tah angka, edoleh nyootsoot rum hang rah tah angka, erah bah Jisu Kristo heh teeteewah ih dong baat hang rah.
13 +Sen loong suh baat choi nga Jehudi thooroom kap angno songtong tang adi ngah ih Rangte chaas mina loong ah minchan laje thang ih mamah thet haat tang, edoleh siiwi rum tang nyia mathan jen thet haat suh thuntang erah than ih thet haat tang. 14 +Nga roite dung ni Jehudi thooroom soomtuute wahoh nang ih phangkhoh thoon ah ngah angtang, nyia sengte sengwah banlam loong ah rapne ih soomtuute angtang.
15 + Enoothong ngah maang tupsom rang di dook Rangte ih heh minchan nawa ih heh mootkaat raangtaan ih juuje tahang. Eno heh ih erah chungta adi 16 heh Sah ah noisok tahang, Ranglajatte loong suh Ruurang Ese baat raangtaan ih ah, eno ngah ih ngo suh uh tah jamcheng tang, 17 Jerusalem ni uh nga jaakhoh ni Jisu kaamwah loong ang rumta damdoh chomui suh tajook wangtang, enoothong ngah echaan ih Arabia ko ih katang eno erah lini Damaskas ko we ngaak tahang. 18 +Eno ngah paang jom lini Jerusalem ni Pitar jinni ethoithak jat esuh wangtang, erah ni heh damdi asi sa baji roongtong wangtang. 19 Ngah ih kaamwah wahoh ngo uh tah tuptang enoothong Teesu suh heno angta Jeems ah ba tuptang.
20 Ngah ih ma raanghang ah amiisak. Ngah laleek kang rah Rangte ih jat eha!
21 Erah lih adi ngah Sairia nyia Silisia hah ni wangtang. 22 Erah tokdi Judia chaas loong nawa mina loong ih ngah tah samjat rum tahang. 23 Neng iba mih jeng arah chaat rum ano ba jat rum tahang: “Marah seng siiwiite kah angta wah ih amadi laalom tiit ah tumbaat ha, marah tiit heh ih thet haat taat chungta rah tiit ah!” 24 Ngah angthoi ih neng loong ih Rangte ah phoongpha rumta.
* 1:6 1:6 Mararah adi he minchan nawa ih raangha + 1:13 1:13 Esm 8:3; 22:4,5; 26:9-11 + 1:14 1:14 Esm 22:3 + 1:15 1:15,16 Esm 9:3-6; 22:6-10; 26:13-18 + 1:18 1:18 Esm 9:26-30 1:19 1:19 Ngah ih wahoh etup muh enoothong ngah ih tuptang ah langla Jeems.