14
Ta hambu dalak laen bali fo malole to Amak; kada nesik Yesus mesa kana
1 Yesus kokolak tamba nae, “Boso dadi duduꞌak neu ei. Mamahere neu Manetualain. Ma mamahere neu Au boe.
2 Nai Au Amang mamana leleon, hambu kama noꞌun seli. Mete ma mamanak ta dai, na, neu ko Au afada memak neu ei ena. Hatematak ia Au ae uu sadia mamanak fee ei nai naa.
3 Mete ma Au uu ena, ma sadia ala ei mamanam mara ena, neu ko Au fali mai, fo ei tungga sama-sama mia Au. No dalak naa, Au nai bee, na, ei oo nai naa boe.
4 Huu ei bubuluk dalak mana neni mamanak fo Au ae uu naa ena.”
5 Tehuu Tomas natanen nae, “Lamatuak, ee! Ai ta bubuluk Lamatuak nae neni bee neu. Dadi talo bee de ai bisa bubuluk dalak mana neni naa neu?”
6 Boe ma Yesus nafada nae, “Ta hambu dalak laen fo no hatahori reni Amak nai nusa tetuk do inggu temak neu. Kada nesik Au mesa ngga. Huu Au ia, dalak mana neni Manetualain neu. Au ia, mana toꞌu ndoo-tetuk. Ma Au ia, mana fee masodak tetebes. Ta hambu dalak laen bali.
7 Leo ei malela Au tetebes, na, ei oo malela Au Amang boe. Dadi mulai numa hatematak ia mai, ei oo malela Ndia ena, ma mete-mita Ndia ena boe.”
8 Felipus noke nae, “Lamatuak, ee! Tulun matudu Lamatuak Aman mai ai dei! Kada naa, dai ena.”
9 Boe ma Yesus nafadan nae, “Ipu, ee. Au sama-sama ua ei doo basa ia ena, tehuu ei bei ta malela Au no tebe-tebe, do? Hatahori mana mete-nita Au ena, sama leo ndia oo mete-nita Au Amang ena boe. Tao hata de bebeik kara o moke mae, ‘Matudu Amak neu ai’ bali?
10 Talo bee? Neu Au ae, Au akaesa ua Amak, ma Amak oo nakaesa no Au boe, na, o mamahere neu Au, do taa? Dedeꞌa-kokolak fo Au kokolak neu ei naa, ta raoka nai Au mesa ngga, tehuu ara raoka nai Au Amang. Ma Ana pake Au fo tao akandoo Ndia ue-osan.
11 Mamahere Au, neu Au ae, Au akaesa neulauk ua Au Amang, ma Ndia oo nakaesa neulauk no Au boe. Tehuu mete ma ei ta bisa mamahere talo naa, na, mamahere neu Au, nahuu ei mete-mita dedeꞌak kara fo Au taok kara ena.
12 Au kokolang naa, tetebes! Ia oo tetebes boe, hatahori fo mana namahere neu Au, neu ko ana oo tao dedeꞌak sama leo Au taok boe. Huu Au uni Au Amang uu, de hata fo hatahori naa taok, neu ko ta hohoꞌan lena heni Au taok.
13 Ei mana makaesak mia Au, maena haak fo meni Au nadeng. Dadi mete ma ei hule-haradoi fo moke hata a mesan, menik Au nadeng, neu ko Au tao fee ei. No dalak naa, Au akadedemak Au Amang, mita fo basa hatahorir bubuluk.
14 Au afada seluk bali: ei hule-haradoi fo moke hata a mesan, menik Au nadeng, neu ko Au taon fee ei.”
Lamatuak Yesus helu-bartaa nae nakonda Manetualain Dula-dalen mai
15 Yesus kokolak tamba nae, “Mete ma ei sue-lai Au, na, ei tao tungga Au parendang nggara.
16-17 Au oke neu Au Amang, neu ko mete ma Au ta sama-sama ua ei bali, na, Ana fee ei Mana Makalalaꞌok esa fo natudu dalak soa-neu ei. Ndia naa, Manetualain Dula-dalen, mana manori ei hata fo ndoos. Hatahori ketuk nai dae-bafok ia, ta nau simbok kana, nahuu ara ta bisa mete-rita Ndia, ma ta ralelan. Ei malelan, nahuu Ana nakaesa no ei. Neu ko Ana leo nai ei dalem. Boe ma Ana oo, neu ko sama-sama no ei nakandoo boe.
18 No dalak naa, Au ta laꞌo ela ei mesa ngga, sama leo kakanak fo ta naena ina-ama. Tehuu masaneda, te neu ko Au fali mai uni ei neti.
19 Baꞌu anak bali te, hatahori laen manai dae-bafok ia, ta mete-rita Au ena bali. Neu ko ei mete-mita Au, nahuu Au asoda fali numa mamates mai. De ei oo hambu masodak tetebes boe.
20 Ma neu faik fo Au asoda fali numa mamates mai ena, neu ko ei bubuluk tebe-tebe mae, Au akaesa ua Au Amang; ei makaesa mia Au; ma Au oo akaesa ua ei boe.
21 Hatahori fo mana simbok ma tao tungga Au parendang nggara, na, hatahori naa ndia sue-lai Au. Ma Au Amang oo sue-lai hatahori fo mana sue-lai Au naa boe. Au oo sue-lai ndia boe, ma atudu Au aong neun.”
22 Numa naa, hambu hatahori esa, nade Yudas. Ndia naa, ta Yudas Iskariot. Neu ana namanene Yesus kokolan, boe ma natane nae, “Lamatuak nae natudu aon neu ai. Tehuu tao hata de Lamatuak ta nau natudu aon neu hatahori laen manai dae-bafok ia?”
23 Yesus naselu nae, “Talo ia. Hatahori fo mana sue-lai Au, neu ko ana tao tungga Au Dedeꞌa-kokolang. Au Amang oo suen boe. De Au ma Au Amang leo dalek esa mian.
24 Tehuu hatahori fo ta mana sue-lai Au, Ana oo ta tao tungga Au Dedeꞌa-kokolang boe. Basa dedeꞌak kara fo ei mamanene numa Au mai ia, ta raoka nai Au, tehuu raoka nai Au Amang mana nadenu Au.
25 Hatematak ia Au bei sama-sama ua ei. Huu naa de Au afada memak dedeꞌa bebek kara iar.
26 Tehuu doo-doo te Au Amang nae nakonda Mana Makalalaꞌok esa, ndia Ndia Dula-dale Malalaon. Dula-dalek naa neu ko nggati Au nai dae-bafok ia. Ndia uen naa, ndia: nanori ei laꞌe-neu basa dedeꞌak kara, ma fee nesenedak basa dedeꞌak kara fo Au afada ita sara neu ei.
27 Neu faik fo Au uu ena, neu ko Au tao fo ei bisa leo-laꞌo no mole-damek ma dale linok. Kada Au mesa ngga ndia bisa fee dale lino-lendek talo naa. Basa hata fo marai dae-bafok ia ta bisa tao nala ei dalem mara linok talo naa. De boso elan fo dadi duduꞌak ma nemetaꞌuk soa-neu ei.
28 Ei mamanene mita Au afada ei ae, ‘Au laꞌo ela ei, basa boe ma neu ko fali mai.’ De dalem mara hae sona. Mete ma ei sue-lai Au, na, ei dalem mara ramahoko, nahuu Au uni Au Amang uu. Au Amang naa, ta neni babanggak lena heni Au.
29 Masaneda, te Au afada memak neu ei ena. No dalak naa, mete ma dedeꞌak bebeik kara iar neu ko ara dadi, na, ei bisa mamahere neu Au.
30 Baꞌu anak bali te Au ta kokolak ua ei ena. Nitur malanggan fo mana toꞌu parenda nai dae-bafok ia, hatematak ia ana mai, tehuu ndia koasan ta laꞌe Au.
31 Leo mae ana mai, tehuu Au laꞌok akandoo fo tao tungga Au Amang parendan. Naa, natudu neu hatahorir marai dae-bafok ia nae, Au sue alan seli neu Au Amang.
Mai fo ita teu leo!”