21
Lamatuak Yesus maso kota Yerusalem sama leo Manek
(Markus 11:1-11; Lukas 19:28-40; Yohanis 12:12-19)
1 Basa naa, Yesus asa laꞌok rakandoo losa nggorok esa nade Betfage, nai letek Setun tatain. Nggorok naa deka-deka no kota Yerusalem ena. Ara hahae taak numa naa. Boe ma Ana nadenu ana nunin dua rakahuluk.
2 Ana parenda sara nae, “Ei dua ngga meni nggorok naa miu. Mete ma ei maso, neu ko ei mete-mita banda keledei ina no ana tenan esa, neni paꞌak kara rai naa. Ei miu sefi heni talin nara, fo leꞌa meni sara ia mai fee Au.
3 Tehuu mete ma hambu hatahori natane ei nae, ‘Tao hata de ei leꞌa meni hatahori keledein?’ Na, ei maselun mae, ‘Lamatuak nae paken. Mete ma pake basa ena, neu ko Ana haitua fali memak kana.’
4 Basa iar muste dadi, tungga hata fo Manetualain mana toꞌu dedeꞌan surak memak kana ena nae,
5 ‘Hee, ei hatahori Yerusalem mara ein!
Mai fo mete ia dei!
Te ei Manem mai ena.
Ana mai no dale nekeloloen.
Ana mai no saꞌe banda keledei tenak.’ ”
6 Basa boe ma ana nunin nara reu, ma tao tungga basa-basan, ndaa no Yesus helu neu sara ena.
7 Ara leꞌa roo keledei ina no ana tenan reni Yesus reu. Boe ma ara bela lafan nara neu reredon, de Ana saꞌe neu lain fo nae maso neni kota neu.
8 Neu ara rae maso reni kota dale reu, boe ma hatahori noꞌuk kara haꞌi rala lafan nara ma ndae arun nara, fo bela sara reu dalak. Hambu ketuk reu tati rala mbua sina doon nara, fo ara nggenggela sara reu dalak. No dalak naa, ara tao tanda rae, ara soru Yesus sama leo hatahori moꞌo-inahuuk.
9 Boe ma hatahori ketuk laꞌok rakahuluk resik Yesus matan, ma ketuk tungga dean. Ara eki rame-rame rae,
“Hosana! Ai koa-kio Manetualain!
Huu Dauk tititi-nonosin mai ena!
Hosana! Ai koa-kio Manetualain!
Huu Lamatuak nadenu Hatahori ia mai ena.
Hosana! Ai koa-kio Manetualain!
Huu Lamatuak nanggatuuk toꞌu parenda memak nai lalai fo demak mateꞌen!”
10 Neu Yesus maso Yerusalem no rame-rame talo naa, boe ma kota isin lalaꞌen kalua, de ratane rae, “Awii! See ndia mai ia?”
11 Hatahori noꞌuk kara raselu rae, “Ndia ia, Manetualain mana toꞌu dedeꞌan. Naden Yesus, hatahori Nasaret, numa profensi Galilea mai.”
Lamatuak Yesus maso neni Uma Huhule-haradoi Ina-huuk neu, de ofe heni pasar numa naa
(Markus 11:15-19; Lukas 19:45-48; Yohanis 2:13-22)
12 Basa boe ma Yesus asa laꞌok rakandoo, de maso reni Manetualain Uma Huhule-haradoi Ina-huun reu. Numa Uma Huhule-haradoik naa bebelan, hatahori taon dadi neu pasar ena, fo ara raseseꞌo mbui lunda sinar, ndia hatahori paken dadi tunu-hotuk soa-neu huhule-haradoik. Yesus mete-nita talo naa, boe ma Ana neu husi-mbuu kalua heni sara. Ana fae nggari heni basa meir fo ara pake tuka doik, ma fae nalengga heni basa banggur fo ara pake raseseꞌo mbuik kara.
13 Boe ma Ana nafada sara nae, “Manetualain mana toꞌu dedeꞌan surak ena nae,
‘Au ambadedeik Uma ia,
mita fo hatahorir bisa mai hule-haradoi nai ia.’
Manetualain nanaun talo naa, tehuu ei tao Uma ia dadi neu naꞌo manu-meor mamana nekebuan!”
14 Basa boe ma hatahori pokek ma hatahori keko-luꞌuk kara reni Yesus mai numa Manetualain Uma Huhule-haradoin naa. De Ana tao nahai basa sara.
15 Numa naa oo hambu malangga anggama Yahudi malanggan nara ma meser anggamar boe. Neu ara mete-rita Yesus tao tanda heran talo naa, boe ma ara rasakele. Lena-lenak bali, neu ara ramanene kakanak kara bolu rame-rame numa Uma Huhule-haradoik rae,
“Hosana! Ai koa-kio Manetualain!
Huu mane Dauk tititi-nonosin mai ia ena!”
16 Basa de malanggan nara raa kokolak reu Yesus rae, “Heeh! O mamanene kakanak kara raa kokolan? Naa, ta ndaa naa!”
Tehuu Yesus naselu sara nae, “Hou, Au amanene. Te hata de? Ei bei ta lees mita nai Manetualain Susura Malalaon laꞌe-neu kakanak kara fo mana koa-kio Manetualain, do? Nai naa neni surak nae,
‘Manetualain sadia memak kakana mbimbila anak ma kakana kadiꞌi anak,
fo ara koa-kio neu Ndia.’ ”
17 Basa boe ma Yesus asa kalua laꞌo ela kota naa, fo reu sunggu nai nggorok Betania.
Lamatuak Yesus parenda ai huuk esa fo boso naboa bali
(Markus 11:12-14, 20-24)
18 Neu beꞌe-mai huhua anan, Yesus asa laꞌok bali fo maso fali reni kota Yerusalem reu. Tehuu neu ara bei laꞌok numa dalak, Ana nameda ndoe ena.
19 Ana mete-nita ai huuk esa numa dalak tatain fo hatahorir rasiꞌe raꞌa boan. De Ana neu deka-deka no ai huuk naa, fo nae mete sudik kaboak do taa. Neu Ana losa ai huuk naa, Ana ta mete-nita boak esa boe na, tehuu mete-nita kada ai huuk naa doon. Boe ma Ana kokolak mbali ai huuk naa nae, “Huu o ta fee o boam soa-neu Au, de o ta bisa maboa ena!” Ana kokolak basa, boe ma ai huuk naa namatuu tutik kana.
20 Ana nunin nara mete-rita talo naa, boe ma ara nggengger. Ara ratane rae, “Tao hata de medak neu ma ai huuk ia namatuu tutik kana?”
21 Boe ma Ana naselu nae, “Nenene matalolole, ee! Mete ma ei mamahere tebe-tebe neu Manetualain, ma ta madale duak faa boe na, ei bisa tao sama leo Au taok naa ena. Ei oo bisa tao lena heni naa boe. Haꞌi netuduk leo: ei bisa parenda letek esa fo lali neni tasi neu. Neu ko Manetualain lali heni memak letek naa, sadi ei mamahere tebe-tebe neu Ndia!
22 Basa hata fo ei moke neu Manetualain, neu ko ei simbon, sadi ei mamahere tebe-tebe neu Ndia.”
Malanggan nara rakaseseluk dedeꞌak ro Lamatuak Yesus laꞌe-neu Ndia haak
(Markus 11:27-33; Lukas 20:1-8)
23 Basa boe ma Yesus asa laꞌok rakandoo. Losa Yerusalem, ara maso fali reni Uma Huhule-haradoi Ina-huuk bebelan reu bali. Neu Ana nanori hatahorir laꞌe-neu Manetualain eno-dala ndoon, boe ma malangga anggama Yahudi malanggan nara ma lasi-lasi hadak kara mai rakaseseluk dedeꞌak roon rae, “See ndia nadenu o mai tao nemuek numa ia ndia afik ka? See ndia fee o haak naa?”
24 Tehuu Ana bubuluk ara sangga dalak fo rae rakatutudak Ndia. Boe ma Ana bala nae, “Au oo ae atane ei boe. Ei maselu Au dei, dei fo Au aselu ei.
25 Au ae atane talo ia: ei basa ngga malela Yohanis Mana Saranik naa, hetu? See ndia feen haak fo ana sarani hatahorir? Manetualain, do hatahori dae-bafok?”
Boe ma ara duduꞌa reu-mai, ma rakokola aok rae, “Awii! Ikek nala ita ia ena, ma! Huu mete ma ita taselu tae, ‘Manetualain ndia feen haak’, neu ko Ana bala nae, ‘Mete ma talo naa, tao hata de ei ta mamahere Yohanis?’
26 Tehuu ita oo ta bisa tae, ‘Hatahori dae-bafok ndia feen haak’ boe, neu ko basa hatahorir ramue mbali ita, nahuu ara ramahere rae, Yohanis naa, Manetualain mana toꞌu dedeꞌan.”
27 Huu naa de ara raselu mbali Yesus rae, “Ai ta bubuluk.”
Boe ma Yesus bala nae, “Dadi mete ma talo naa, Au oo ta parluu afada see ndia fee haak neu Au boe.”
Lamatuak Yesus fee lololek laꞌe-neu amak esa no ana toun dua
28 Yesus kokolak nakandoo no malanggan nara raa nae, “Ei duꞌa talo bee laꞌe-neu lololek ia? Hambu amak esa no ana toun dua. Ana parenda ana ulun nae, ‘Anang gee! O muu maue-osa nai osi dale faik ia dei.’
29 Tehuu kanak naa naselu nae, ‘Eeh! Au ta uu.’ Tehuu ta dook ka boe ma ana fale dalen de ana neu.
30 Basa boe ma amak naa nadenu ana kaduan nae, ‘Anang gee! O muu maue-osa nai osi dale faik ia dei.’
Boe ma kanak naa naselu nae, ‘Malole papa. Dei fo au uu.’ Naa te ana ta neu.”
31 Yesus tui basa talo naa, boe ma natane sara nae, “Au ae atane talo ia: numa kakana kaduak kara raa mai, see ndia tao tungga aman parendan naa?”
Boe ma ara raselu rae, “Ndia makasososak naa!”
Basa de Ana kokolak nae, “Hou. Nenene matalolole, huu Au kokolang ndia ndaa. Hatahori fo ei henggenee malan ta kambareek kara, sama leo mana susu bea ia ma ina petak, neu ko ara maso dadi reu Manetualain hatahorin rakahuluk ruma ei mai. Huu ei kada mataa hie-hie mbali Manetualain, tehuu ei ta tao tungga Ndia hihii-nanaun.
32 Fai bakahulun, Yohanis Mana Saranik nanori ei ena, dalak talo bee fo ei bisa leo-laꞌo no ndoos. Tehuu ei ta nau mamahere neu sana. Naa te neu faik hatahori ta kambareek kara ramanene Yohanis, ara laꞌo ela basa sira sala-singgon nara fo tungga ndia nenorin naa. Ei oo bubuluk mala basa naar ena boe. Tehuu ei ta nau hahae numa ei sala-singgom mara mai, fo tungga Manetualain hihii-nanaun.”
Lamatuak Yesus fee lololek laꞌe-neu hatahori manggarauk mana maue osi anggor
(Markus 12:1-12; Lukas 20:9-19)
33 Basa naa, Yesus tui lololek esa bali nae, “Hambu tenu daek esa neu nasosoi nambalao osi beuk fo nae sele ai anggor neu ndia daen lunggun. Basa de ana mbaꞌa eko-feon. Ma ana tao baak fo nae rumu-keꞌe anggor oen. Boe ma ana nambaririik mamana nenea demak. Basa de ana fee osi naa neu mana maue osir fo ara raue ma rabaꞌe buna-boan nara roon. Boe ma ana laꞌo neni nusa feꞌek neu.
34 Losa fai ketu anggor boan, boe ma tenu osik naa nadenu ndia hatahori mana maue-osan neni mana maue osir neu, fo noke ndia babaꞌen.
35 Tehuu mana maue osir ta hosek ndia hatahori mana maue-osan naa. Ketuk hambu fefembak, ketuk rakanisa sara, ma ketuk neni tokok renik batu.
36 Tehuu tenu osik naa nadenu seluk ndia hatahori mana maue-osan nara bubuak esa moꞌon lena makasososak naa. Tehuu mana maue osir raa oo, tao manggarauk talo naa neu basa sara boe.
37 Doo-doo boe ma, tenu osik naa nadenu ndia ana heli-helin. Huu ana duꞌa nae, ‘Mete ma au adenu au ana heli-heling, neu ko ara simbok no malole, ma ramanene neun.’
38 Tehuu neu mana maue osir raa mete-rita kanak naa, boe ma ara rakokola aok rae, ‘Heeh, ei mete dei! Tou lasik nadenu ndia ana heli-helin mai ena. Neu ko ana ndia simbo nala tou lasik pusakan lalaꞌen. Dadi mai fo ita tao tisan leo, mita fo ita ndia laꞌe tala osi ia.’
39 Boe ma ara humu rala kanak naa, de ara nggarin neni osi deak neu fo tao risan.”
40 Yesus tui basa, boe ma natane sara nae, “Au ae atane talo ia: mete ma tenu osik naa fali mai ngga, nai rarain ana tao mana maue osir raa talo bee?”
41 Boe ma hatahori Yahudi malanggan nara raselu rae, “Neu ko ana nakanisa basa hatahori manggarauk kara raa. Basa naa, ana fee hatahori laen seba osi naa, fo neu ko baꞌe buna-boan ndaa no fain.”
42 Boe ma Yesus kokolak no sara nae, “Fama te ei bei ta lees mita hata fo neni surak nai Manetualain Susura Malalaon nae,
‘Hambu batu esa, tukan batur nggari henin,
tehuu hatematak ia batu naa dadi neu uma batu netehuun ena!
Manetualain mesa kana ndia here nalan, boe ma nanggatutuuk batu naa.
Huu naa de ita mete-titan lolen seli!’ ”
43 Boe ma Yesus tuti kokolan nae, “Dadi ei duduꞌa matalolole, ee. Fai bakahulun Manetualain here nala ita hatahori Yahudir ia, fo dadi teu Ndia hatahorin. Tehuu ei ta nau tao matak mbali Au, de neu ko Manetualain here hatahori laen. Kada hatahori mana leo-laꞌo tungga Manetualain hihii-nanaun, ndia bisa maso dadi neu Manetualain hatahorin.
44 [Au afada no kada ndoo-tetun. Au ia, ndia batu netehuuk naa. Hatahori mana tuda laꞌe-ndaa batu ia, neu ko nakalulutu. Ma mete ma batu naa tuda laꞌe hatahori, neu ko hatahori naa dadi makararafuk memak.]”
45 Neu malangga anggama Yahudi malanggan nara, ma hatahori Farisir ramanene rala Yesus tutuin, boe ma ara bubuluk rae, lololek naa ndee laꞌe sira. Sira tetuk sama leo mana maue osir raa, ma tukan batu mana nggari heni batu netehuuk naa.
46 De ara ramanasa ralan seli. Boe ma ara duduꞌa de rala harak fo rae humu Yesus. Tehuu ara ramahia hatahori noꞌuk kara fo mana tao leo Yesus naa, Manetualain mana toꞌu dedeꞌan. Huu naa de ara oo ta bisa tao hata-hata mbalin boe.