2
Ita muste takaloloe aok sama leo Yesus Karistus
Toranoo susue nggara ein, fo mana dadi neu Yesus Karistus hatahorin! Ana fee ei hata fo neulauk noꞌuk ka ena. De ei bisa tao matetea esa no esa dalen. Ei bisa fee nenori-nefadak fo ana naoka numa ei dale susuem mai. Ei bisa leo-laꞌo no neulauk esa no esa, nahuu Manetualain Dula-dalen naue-osa nai ei taladam. Ma ei bisa matudu dale kasian ma dale neulaum esa no esa. Mete ma ei tao talo naa, na, au daleng mbena sau-sau. Lenak bali, mete ma ei leo-laꞌo no masue aok ma dalek esa, leo-laꞌo no hihiik esa, ma mala harak esa fo maue-osa sama-sama. Boso tao hata-hata fo sangga nanalak soa-neu kada o ao heli-helim. Ma boso tao aom lena heni hatahori laen nara. Naa te o koa aom naa, oka-huun taa. Ita muste takaloloe aok fo duꞌa tae hatahori laen nara lena heni ita. Ma boso faduli kada ei esa-esak ka ena uma dalen. Tehuu ita oo muste tao matak neu hatahori laen totoꞌan nara boe.
Ita dalen, ita duduꞌan ma ita hihiru-heheon muste sama leo Yesus Karistus.
Leo mae Ndia mata-aon sama leo Manetualain,
ma Ndia oo Lamatuak sama leo Manetualain boe,
tehuu Ana lui heni Ndia haak,
ma ta pake Ndia panggan.
De Ana konda neni dae-bafok ia mai,
pake mata-aok sama leo hatahori dae-bafok biasa.
Ana laꞌo ela Ndia haak basa-basan,
fo tao Ndia aon dadi neu neondak.
Ta kada dadi neu hatahori kadiꞌi anak,
tehuu Ana oo tao Ndia aon dadi neu hatahori neni nekedadaek,
fo tao tungga Manetualain hihii-nanaun.
Leo mae hatahorir rakanisan numa ai ngganggek lain oo, Ana simbo a mesan boe,
ma maten, leo bali hatahori manggarauk.
No Ana nakaloloe aon talo naa,
huu naa de Manetualain nakadedemak kana.
Ma feen nadek fo ta neni babanggak.
Ta hambu nadek esa boe na fo ta neni babanggak lena heni Ndia.
10 Manetualain nakadedemak naden talo naa,
fo basa hatahorir fee hada-horomatak neun.
Sira: hatahorir marai lalai,
ma hatahorir marai dae-inak.
Hatahori masodak ma hatahori mates.
Neu ko basa hatahori sendek luu-langgan nara fo rakaluku-rakatele neun.
11 Ma neu ko basa hatahorir rae, “Yesus Karistus naa, tebe-tebe Lamatuak fo naena haak parenda au!”
No dalak naa, ara oo koa-kio Amak Manetualain boe.
Ita dadi sama leo nduu kasaꞌak mana tao manggaledo dae-bafok ia
12 Toranoo susue nggara ein! Nenene besa-besa! Fai maneuk kara, neu au bei numa kota Felipi, ei nenene au, basa de ei tungga Manetualain eno-dala ndoon. Hatematak ia ita tabinggak nai mamanak laen, tehuu au oke fo ei maote tebe-tebe makandoo fo leo-laꞌo tungga ndoon. Masanenedak te mete ma ei ta nenene neu Ndia, na, neu ko ei mete a leo! Huu Ana ndia tao nasoi-nasoda ei numa sala-singgom mara mai. Boe ma ei muste leo-laꞌo ndaa no dala-hadak, huu ei dadi miu Ndia hatahorin ena. 13 Manetualain mesa kana ndia oꞌofe-fafae ei dalem mara. Ana ndia soi dalak fo ei nenene neun. Ma Ana ndia fee koasa fo ei bisa tao mamahoko Ndia dalen.
14 De mete ma ei tao hata a mesan, na, boso unggu-remu, ma boso mareresi. 15 Tao talo naa, fo ei bisa dadi miu hatahori dale lolo-laok, ma hatahori ta mana maena salak. Ei leo-laꞌo nai hatahori manggarauk taladan ma mana puta-paik kara. Tehuu ei boso tungga sara! Ei leleo-lalaꞌom muste lolo-laok, nahuu eir ia, Manetualain anan nara. De ei leleo-lalaꞌom mara muste randela-rasaꞌa fo matudu dalak soa-neu sara, sama leo nduuk nasaꞌa nai makiuk. 16 Boe ma ei leo-laꞌo tungga ndoon ma makalalaꞌok Manetualain Dedeꞌa-kokolan. No dalak naa, neu ko ei tao mala au daleng mbena sau-sau, neu faik fo Yesus Karistus fali mai. Ma au bebengge-mamanggung naa, hambu buna-boa neulauk, nahuu ta nggari heni sana no muda hiek.
17-18 Tehuu leo mae au fee basa au masodan, fo dadi neu tunu-hotuk, mita fo ei bisa mamahere matea lenak ma makalalaꞌok Manetualain ue-osan, na, au simbok no nemehokok. [Naa, sama leo malangga anggama mboꞌa oe anggor neu mei tunu-hotuk lain fo nakaluku-nakatele neu Manetualain.] No dalak naa, ita bisa tamahoko sama-sama, nahuu tunu-hotuk naa, ta hie-hie.
Timotius uen
19 Au amahena ta dook ka bali te Lamatuak Yesus soi dalak fo au adenu Timotius, fo ana neti natetea ei dalem mara. Basa naa, ana fali neni ia mai bali, fo nafada au laꞌe-neu ei nenggetuu-nemberiim. No dalak naa, natetea au daleng. 20 Au ta adenu hatahori laen. Au adenu kada Timotius, nahuu ana dalek esa no au. Ma ana sue tebe-tebe neu ei. 21 Ndia naa, ta sama leo toranoo laen nara. Te sira raa, duduꞌa kada ena uma dalen nara, tehuu ta tao matak neu dedeꞌak fo nenenin lenak soa-neu Yesus Karistus. 22 Ei oo bubuluk boe mae, Timotius naue-osa fafandek lima-ein nara fo nakalalaꞌok Manetualain ue-osan ena. Ana naue-osa no au, nok bali kanak esa naue-osa fee aman. Ai dua ngga laꞌok miu tui-bengga Lamatuak Yesus Hara Lii Malolen nai bee a mesan. 23 Mete ma ara raketu-raladi basa au dedeꞌang nai ia ena, na, dei fo au adenu Timotius neti. 24 Tehuu hatematak ia, Lamatuak natetea au daleng nae, ta dook ka te, au oo bisa neti tiro-dangga ei boe.
Epafroditus uen
25 Fai bakahulun au hambu susa-sonak, de ei madenu ita toranoon Epafroditus mai tiro au. Ana nakalalaꞌok Lamatuak ue-osan sama-sama no au, nok bali soldadu mana manggate tungga ndia komedan parendan. Tehuu hatematak ia, nai au duduꞌang au muste adenu falik kana neni ei neti. 26 Huu dalen hii nalan seli nau natonggo no ei ena. Ma ana oo duduꞌan ta namaneu soa-neu ei boe, nahuu ana bubuluk nae, ei mamanene ena, ndia kada hedi-hedik. 27 Memak tebe. Fai maneuk kara, ana namahedi berak losa sangga nae mate. Tehuu Manetualain suen, de tao nahain. Ma Manetualain oo sue au boe, de Ana tao nahai Epafroditus, mita fo au boso tamba susa bali. 28 Huu naa de au nau adenu falik kana neti, mita fo ei bisa matonggo mian no dale nemehokok. Mete ma talo naa, na, au daleng lende. 29-30 De ei muste simbok malan no malole, nahuu ndia naa, Lamatuak hatahorin. Ma ei muste fee hada-horomatak neun no basa hatahorir fo sama leo ndia ia. Ana nakalalaꞌok Karistus ue-osan losa ela baꞌuk ka maten. Ma ana ta nakaheok faa boe na, nahuu ana nau tulu-fali au nggati ei. Dadi ei muste simbok mala falik kana no dale neulauk.
2:11 Yesaya 45:23 2:15 Tui Seluk laꞌe-neu Dala Masodak 32:5 2:17-18 Susura Rerekek 28:7