2 Timotius
Paulus susura kaduan
fee nonoon Timotius
1
Soda-molek
1-2 Timotius fo malole!
Susurak ia numa au mai, Paulus, fo Manetualain mesa kana here nalan dadi neu Yesus Karistus nedenun ena. Ara radenu au fo uu afada masoda ndoos naa, fo Manetualain helu-bartaa elak fee neu basa hatahorir fo mana ramahere neu Yesus Karistus ena.
Timotius, ee! O sama leo au ana heli-heling ena. De au hule-haradoi oke fo Manetualain, ita Aman, no Yesus Karistus, ita Lamatuan fo sue-lai o, ratudu dale susuen ma fee o leo-laꞌo no mole-damek ma lino-lendek.
Paulus noke makasi neu Lamatuak
Hatu-leledon au hule-haradoi fee o. Au soa oke makasi neu Manetualain, nahuu o tungga makandoo neun. Au aono-lalau Manetualain no dale lolo-laok, sama leo ita baꞌin nara raono-lalaun. Au asaneda fai bakahulun fo ita tabaꞌek naa, o luu-oem tuda. Huu naa de au daleng hii nalan seli atonggo seluk ua o, mita fo au daleng namahoko.
Au oo asaneda fai bakahulun fo o mulai mamahere tebe-tebe neu Lamatuak Yesus. Nemeheherek matak leo naak naoka memak nai o beim Luisa, ma o inam Eunike dalen. Ma au oo amahere tebe-tebe boe ae, nemeheherek matak leo naak oo, ana mori nai o dalem boe.
Paulus noke fo Timotius pake babanggi-babaꞌek fo Lamatuak feen
Fai bakahulun neu au ndae au limang neu o langgam lain, ma hule-haradoi fee o, faik naa Manetualain tao nala o mabeꞌi tao ue-osa fee Ndia. De hatematak ia au oke fo o makarombe falik o babanggi-babaꞌem naa. Manetualain Dula-dalen ta tao ita dadi teu hatahori taꞌu tekek. Tehuu Ana tao ita dadi teu hatahori mana nabeꞌik ma namahena aok, mana nalela nasue-laik, ma mana nalela nakatataak aon no malole. Dadi boso mae kokolak laꞌe-neu ita Lamatuan fo mana naena haak parenda ita. Boso mae nahuu au ia hatahori bui. Au maso bui ia, nahuu au aono-lalau neu Ndia. Mete ma o muu tui-bengga Hara Lii Malolen naa, na, o muste mahehere fo lemba-masaa mala susa-sonak sama leo ai. Mete ma o hambu susa-sonak leo naak, na, neu ko Manetualain fee o bebeꞌi-barakaik.
9-10 Manetualain ndia tao nasoi-nasoda ita numa ita sala-singgon nara mai.
Ma Ana here nala ita dadi teu Ndia hatahori lolo-laon ena.
Ana natudu dale susuen neu ita, nahuu Ana sue-lai ita.
Naa te ita ta tao hata esa boe na fo nandaa ita simbo Ndia dale susuen.
Manetualain bei ta adu dae-bafok ia, tehuu Ana naketu memak ena fo nadenu Yesus Karistus mai,
fo natudu Ndia dale susuen, ma tao nasoi-nasoda ita.
Yesus Karistus mai ena, de Ana buka Manetualain nanaen naa isin ena.
Ana nakalulutu mamates koasan ena.
Ia dadi neu Hara Lii Malole!
Dadi see ndia namahere neu Yesus Karistus, neu ko ana nasoda nakandoo no Manetualain.
11 Huu naa de Manetualain soꞌu nala au dadi uu Yesus Karistus nedenun, fo au tui-bengga Ndia Hara Lii Malolen, ma au anori hatahorir nai bee a mesan. 12 Basa naar tao au doidoso nai bui ia dale, huu au akalalaꞌok Yesus Karistus parendan naa. Leo mae talo naa oo, au ta mae, nahuu au bubuluk see ndia au amaheren, ndia Lamatuak Yesus. Ma au oo bubuluk tebe-tebe boe ae, Ana ndia natotoꞌu ues ia neu au limang. Ana ndia nabeꞌi nanea ues ia, ma Ana ndia tao au abeꞌi akalalaꞌok ue-osa ia losa Ana fali mai. 13 De manori tungga nenorik tetun fo au atudu basan neu o leo. Mete ma o mamahere makandoo ma sue-lai basa hatahorir talo naa, na, naa natudu nae, o dadi esa mua Yesus Karistus ena. 14 Manetualain fee o suꞌi mabeli esa nai o limam ena, ndia nenori matetuk. De lopo-linu matalolole suꞌi naa! Pake Manetualain Dula-dale Malalaon manai ita dalen, mita fo Ana tulu-fali o lopo-linu ma manea matalolole suꞌi naa.
Onesiforus tulu-fali Paulus nai bui dale
15 Neu ko o mamanene ena rae, Figelus ma Hermogenes, ma hatahori laen nara maruma profensi Asia* mai rasadea laꞌo ela au ena. 16-18 Tehuu Onesiforus laen bali. Ana ta nakaheok numa au mai. O mita no o matam, fai bakahulun neu au bei numa kota Epesus, ana tulu-fali au nakandoo. Hatematak ia ana mai nai kota Roma ia ena. Neu ana losa, ana sangga au ndule sudi nai bee. Mateꞌen, ana natonggo au numa bui dale. Tehuu ana ta mae. Ana mai tiro-dangga au taa-taa nai bui ia, fo natetea au daleng.
De au hule-haradoi fo Manetualain natudu dale susuen neu Onesiforus no basa nufanelun nara. Neu ko ndaa no dae-bafok fai mateꞌen, mete ma Manetualain naketu-naladi hatahori dae-bafok kara dedeꞌan, na, au amahena fo Manetualain naketu-naladi no malole neu Onesiforus asa.
1:1-2 Nedenuk kara Tutuin 16:1 1:5 Nedenuk kara Tutuin 16:1 1:11 1 Timotius 2:7 * 1:15 Profensi Asia lele uluk naa, hatematak ia dadi neu negara Turki murin.