3
Kute ar kute Jeju nhõ me jao ba djwỳnhmã 'ã karõ.
Xit 1.6
1 Be mrãmri ne me abenmã kum,
—Gêdja me'õ kute meo ba prãm jabej, kute Jeju nhõ me jao ba prãm jabej, mrãmri mexkumrẽx. Nà, mrãmri mexkumrẽx. Nà, kôt ne me kute arẽnhja.
2 Be, mã gêdja Jeju nhõ me jao ba djwỳnh kute? Me axwe kêt ne kute amijo ba mextire nhym kam me me'ã kabẽn kêtja, me prõ pỹnh, me bixaêr punu kêt, me kute amipnênh ne ar ba, me kabôt kati, me kute meo djuw mex prãm, me kute memã Metĩndjwỳnh'ã ujarẽnh prãm, me ja gêdja me Jeju nhõ me jao ba.
3 Kwãrĩk wãnh me kum kadjwati kangô djành, me àkrê, me kute kabẽno me apanh prãmja, me kute pi'ôk kaprĩbit mar ne kute amim o àptàrja, kwãrĩk wãnh me ja gêdja me meo ba kêt ne. Bep kati, me ukaprĩmẽ, me kute umar mex marja dja me Jeju nhõ me jao ba.
4 Dja me'õ meo ba prãm jabej dja kumrẽx amim prõmẽ kra jakre, ne arkum mrãnh mextire gê ar omũn kam adjwỳnhdjwỳ kôt mrãnh mexkumrẽx. Dja amim ar jao ba mex nhym kra amakkre mex ne kabẽnkôt ar amijo ba nhym kam arỳm kôt Jeju nhõ me jao ba.
5 Nok ren me'õja ar meo ban kam prõmẽ kra jakre kêtkumrẽx ne kam Metĩndjwỳnh nhõ me jabit me akre, mã gêdja on? Mã gêdja kam nẽ? Ije, mỳkam ne prõmẽ kraja ar o ba mex kêt nhym kra jaxwe rã'ã? Ije kum bep nãm ren amim prõmẽ krawã kumrẽx jakren kam ren kôt Metĩndjwỳnh nhõ me ja jakre. Mỳkam ne prõmẽ krawã ar o ba kêt ne kam Metĩndjwỳnh nhõ me jabit ar o ba?
6 Kwãrĩk wãnh me'õ ajbir kute Jejuo aminhõ ny'õ'ã Jeju nhõ me jao ba djwỳnh mẽnh kêt. Mỳkam? Bir, kute amiraxo àmra nhym kam ren Metĩndjwỳnh kute o bikẽnh karõ dja me kute Jejuo aminhõ ny'õ'ã meo ba djwỳnh mẽnh kêt. Ne ren amiraxo amra nhym ren Metĩndjwỳnh o ajkẽ. Mrãmri kute Xatanajo bikẽnhja pyràk. Xatanaj kute amiraxo àmra nhym kam Metĩndjwỳnh kute prĩne o bikẽnhja pyràk. Ne ren me'õ ajbir kute Jejuo aminhõ ne ren meo ban ren amijo amra, Xatanajkôt amijo amra nhym ren Metĩndjwỳnh adjwỳnhdjwỳ o ajkẽ.
7 Nhym bep kati, Jeju nhõ me jao ba djwỳnh dja amijo ba mextire nhym kam me kàtàmdjwỳ kum kĩnh ne kum mex jarẽ. Nãm ren arĩk ar ba nhym kam me kàtàm rãn 'ã kabẽn ne. 'Ã kabẽn nhym kam rãn Xatanaj ikôta, Xatanaj meo ba djwỳnhja nhikôta.
8 Nhym Jeju nhõ me jao ba djwỳnh jatãri me àpênhjadjwỳ dja me katàt mrã gê me me'ã kabẽn kêt. Dja me kabẽn mexmẽ me kabẽn punuo aben nhikjê kêt. Dja me kum kadjwati kangô djành kêt. Kwãrĩk wãnh gê me pi'ôk kaprĩ prãmebit me noo biknor prãm kêt.
9 Dja me amim Metĩndjwỳnh kukràdjà markumrẽx ne 'ã ngrà tỳx ne. Metĩndjwỳnh kute me bamãbit amikukràdjào amirĩtja, kukràdjà tãmbit dja me 'ã ngrà tỳx ne maro ba ne mỳjja mexbit mar ar o ba. Mỳjja mexbit mar ar o ban kam amikam axwe 'õ mar kêt. Kadjy dja me Metĩndjwỳnh kukràdjà'ã ngrà tỳx ne ar o ba.
10 Dja me Jeju nhõ me jao ba djwỳnh jatãri me àpênhja kumrẽx kabi nhym me kabẽn mex ne kam ar kôt àpênh ba. Godja me mrãmri mexkumrẽx jabej ne kam arỳm àpênh ar ba.
11 Nhym Jeju nhõ me jao ba djwỳnh jatãri me àpênh prõjadjwỳ. Me adjwỳnhdjwỳ dja me katàt mrã gê me me'ã kabẽn kêt. Dja me me kà mex jarẽnh prãm kêt. Dja me bixaêr punu kêt ne ar ba. Dja me prĩne mrãnh mextiren kabẽn pỹnh ne arẽ. Dja ã Jeju nhõ me jao ba djwỳnh jatãri me àpênh prõja ã ane.
12 Be, Jeju nhõ me jao ba djwỳnh jatãri me àpênh gêdja me prõ pỹnh ne. Dja me õ kikre kumrẽxkam amim ar ja jakren arkum mrãnh mexkumrẽx gê ar omũn kam adjwỳnhdjwỳ kôt mrãnh mexkumrẽx. Dja me amim krao ba mexkumrẽx gê ar kabẽn mexkumrẽx ne ar ba.
13 Godja me atãri me àpênhja mrãmri àpênh mex ne kam arỳm memã amimexo amirĩt nhym me kàtàmja arỳm me mex pumũn kam kum me kĩnh. Gêdja mekam amikam pijàm kêt ne kàjmã djan tu memã Jeju'ã ajarẽ. Me kute amim Kritu Jeju mar tũmkam tu memã 'ã ajarẽ. Bir be, dja ã Jeju nhõ me jao ba djwỳnhmẽ atãri me àpênhmẽ ã ane.
14 Be, nã bãm amã ikabẽn'ã pi'ôk no'ôk ne amikukãm ano. Dja ba ĩ wãm kôt tẽ. Nã bãm amim itẽm djà ma.
15 Nàr kon birãm dja ba amikrà ga prĩne omũn kam kôt memã arẽ, me kute mar kadjy. Metĩndjwỳnh kra kunĩ kute kôt ar amijo ba mar kadjy. Kadjy ne ba amã pi'ôk no'ôk jano. Apỹnh pyka kunĩkôt ne me bakwỳ arỳm amijo Jeju pytà nhym Metĩndjwỳnh arỳm kôt me bajo kra. Gu me kôt arỳm apỹnh banhõ pyka djàri kam aprakamã kôt aben pydji, Metĩndjwỳnh tĩnjakôt mã pyka kunĩkôt aben pydji. Ne me kàtàmmã Metĩndjwỳnh kabẽn jarẽnh ar o baba, Metĩndjwỳnh 'êxnhĩ kêt ne kute katàt kabẽn jarẽnhja memã arẽnh ar o baba.
16 Bir be, djãm mỳjja kakrit, djãm mỳjja prĩre, djãm mỳjjao bikẽnh ne gu me arỳm amim kuman kam amim kamnhĩxbê ar baba? Djãm mỳjja ngri: got me tebê kute mar ne ate krãmã? Mrãmri ne Jeju ra:xi.
Nãm amijo kubêngôkren kato.
Nhym Metĩndjwỳnh Karõ kabin axwe kêtmã katon kôt memã arẽ.
Nhym kadjy mrãnh djwỳnhdjwỳ arek omũnh ar o ba.
Nhym me apỹnh me õ pyka djàri kàj bê memã 'ã ujarẽnho ajmà.
Nhym me kam pyka kunĩkôt tu amim markumrẽx ne.
Nhym kam Metĩndjwỳnh kàjkwamã o wabi, õ kàjkwa mextiremã o wabi. Õ kàjkwa mexo kute pykabê mỳjja kunĩ jakrenhjamã o wabi.
Nãm ã Jeju raxo ane.