8
Ja' sc'opilal ti sventainoj ti ach' tratoe ti Jesuse
1 Ja' hech sjam ti c'usi laj xa jcholboxuque. Hech oy ti totil pale ti sventainojucutique. Ti ora to te nacal ti sbats'ic'ob ti Diose te ti vinajel, pasbil ti muc'. Ti Diose te nacal ti smuc'ta nacleb tspas ti mantal scotol.
2 Ti totil paleetic ti i'ech'ic li' ti balumile i'abtej cu'untic te ti templonucule, ti ja' pasbil ti sc'ob crixchanoetique. Ja'uc ti totil pale cu'untic ti ora to te ch-abtej cu'untic ti mero stojol ti Diose te ti vinajel, ti ja' pasbil yu'un ti Diose.
3 Scotol ti much'utic i'och ti totil pale li' ti balumile ti vo'onee, ja' yabtelic laj yaq'uilambe smoton ti Diose, laj smililambe smoton ti Diose. Ja'uc ti totil pale cu'untic ti ora to laj xa yac'be smoton ti Dios uque. J'ech'el no'ox laj yac' ti motonile, ja' motonil ti stuque. J'ech'el no'ox laj yac' sba pero ja' chtunilan cu'untic scotol c'ac'al asta sbatel osil. Ja' más lec yabtel stuc.
4 Ti ja'uc li' ti balumil ch-abtej ti Jesuse, mu xtic'at ti totil pale yu'un ti jchi'iltique yu'un yan ti yabtel ti Jesuse. Mu co'oluc yabtelic xchi'uc ti totil paleetic li' ti balumile ti chac'beic smoton Dios stuquique hech chaj c'u che'el chal ti mantaletique. Ja'uc ti Jesuse, ja' sventa vinajel.
5 Yu'un ti templo li' ti balumile ja' señail no'ox hech chaj c'u che'el oy ti vinajel. Ja' sjam ti hech ipasat ti mantal ti Moisese yu'un ti Diose c'alal lic smeltsan ti templonucule: “Scotol ta me xameltsan hech chaj c'u che'el ti señaile ti laj cac'bot avil te ti ba vits”, ti x'utate.
6 Ti yabtel ti yich'oj ti paleetic li' ti balumile mu xco'olaj xchi'uc ti yabtel ti yich'oj ti Jesuse. Ja' más lec ti yabtel ti yich'oj stuc ti Jesuse. Ja' más lec ti ach' trato ti sventainoj stuque, yu'un ja' chijcolucutic yu'un sbatel osil.
7 Ti nijcoluc yu'un ti sba tratoe, mu persauc oy yan trato ti hechuque.
8 Yu'un laj yil ti Diose ti muc xch'un yu'unic ti mantaletique ti jtatamol jmembeltique ti vo'one, hech yu'un hech laj yal:
Ta me sta yorail ti yan to c'ac'al ti jpas trato xchi'uc ti avelnich'nabique, ho'oxuc ti yelnich'onoxuc ti Israel xchi'uque.
Manchuc mi cha'tos avac'oj abaic ti ora to, jun no'ox chaquilic asta avelnich'nabic.
9 Mu xa co'oluc ti trato ti jpas xchi'uc ti avelnich'nabique hech chaj c'u che'el laj jpas xchi'uc ti atatamol amembelique ti vo'one ti ja' laj quic' loq'uel tal te ti slumal Egipto.
Ja' no'ox laj jcoltailan hech ihu' yu'unic ijelavic ti butic ijelavique.
Yu'un mu j'ech'eluc laj spas ti muc' ti trato cu'une,
hech yu'un ti jcomes ti poco tratoe, xchi ti Diose.
10 Hech yu'un hech oy ti trato ti jpas xchi'uc ti avelnich'nabique.
Ta me sta yorail chcac'be ti yo'ntonic ti mantaletic cu'une.
Ta me jts'ibabe ti yo'ntonic.
Ho'on Diosun yu'unic chic'ot ti mero melel.
Ja' cu'un chc'otic ti mero melel.
11 Mi junuc mu'yuc much'u chalbe sbaic hech:
“Ojtiquino ti Cajvaltique”, mu xut sbaic hech.
Yu'un ti jujune xiyojtiquinucun manchuc mi muc' mi biq'uitic.
Mu xalbe sbaic yu'un hech chiyojtiquinucun scotolic.
12 Yu'un j'ech'el chch'ay ti co'nton ti smulique,
xchi ti Diose.
13 “Ti jpas ach' trato”, ti xchie, yu'un mu xa xtun ti poco tratoe. Yu'un ja' ti bu mu'yuc xa stu, ja' ti jtentic comel.