9
Ja' sc'opilal ti icol yu'un ti Jesuse ja' ti ma'sat c'alal i'ane
Ti bu ni'ech'tutic batel xchi'uc ti Jesuse te laj quiltutic jun jchi'iltutic. Ma'sat c'alal i'an ti vinique. Ho'ontutic ti yajchanc'opuntutic ti Jesuse hech laj jac'betutic ti Jesuse:
―Maestro, ¿much'u smul ti yu'un ma'sat i'an avi jchi'iltic li'to? ¿Mi ti scoj smul stuc, mi ti scoj smul stot sme'? ―xichitutic.
Hech itac'av ti Jesuse:
―Mu ti scojuc smul avi jchi'iltic li'to, mu ti scojuc smul stot sme'. Yu'un ti ma'sat i'an ti jchi'iltique, ja' no'ox yu'un hech chvinaj yabtel Dios ti sventa. C'alal cuxulun li' ti balumile ja' yorail ti xu' jpasbe yabtel ti Jtote ti laj stacun talele. Mi nichame mu xa xu'. Ti jayib c'ac'al li'oyun li' ti balumile ho'on hech chaj c'u che'el luz c'otemun avu'unic ho'oxuc ti li'oyoxuc li' ti balumile yu'un chacac'bot avil ti lequil bee ―xchi ti Jesuse.
C'alal laj yal hech ti Jesuse laj stubta ts'ubilum. Laj spas ti ach'el ti ts'ubilume. Laj sbombe ach'el ti sat ti ma'sate. Hech laj yalbe:
―Batan, ba poco tal asat ti ho' te ti estanque Siloé sbi ―x'utat. Ti Siloe sbie ja' sjam ti ic'bil chtal ti ho'e.
Ibat ti ma'sate, ba spoc sat te ti Siloe. C'alal isut tal, chil xa balumil. Hech yu'un laj sjac'be sbaic ti svecinotaque xchi'uc ti much'utic yilojic ti ma'sat ono'oxe:
―¿Mi ma'uc li'to ti much'u laj snacan sba sc'an paramote? ―xut sbaic.
Oy much'u hech laj yal:
―Ja' lume ―xchiic.
Oy yan hech laj yalic:
―Ma'uc, ja' no'ox co'ol x'elan ―xchiic.
Hech itac'av ti vinique:
―Ho'on chavile ―xchi.
10 Hech ijac'bat:
―¿C'u che'el ijam asat? ―xchiic.
11 Hech itac'av ti vinique:
―Ja' ti jchi'iltic Jesús sbi, ja' laj spas ti ach'el ti ts'ubilume. Laj sbombun ti jsat. “Batan ti yo' bu Siloé sbi, ba poco tal asat”, xiyutun. Hech nibat, ba jpoc jsat. Hech yu'un chquil xa balumil ―xchi.
12 Hech lic sjac'beic:
―¿Bu oy ti much'u chavale? ―xchiic.
―Mu jna' bu ibat ―xchi xtac'av ti vinique.
Ja' sc'opilal ti ep ijac'bat ti ma'sat ono'oxe
13 Laj yiq'uic batel sva'anic ti stojol ti fariseoetique ti much'u ma'sat ono'oxe. 14 Ja' sc'ac'alil ti jcux co'ntontutic c'alal laj spas ti ach'el ti ts'ubilum ti Jesuse, c'alal laj sjambe sat ti ma'sate. 15 Laj sjaq'uic uc ti fariseoetique c'u che'el ijambat ti sate. Hech itac'av ti vinique:
―Laj sbombun ach'el ti jsat. Patil ba jpoc jsat. Hech yu'un chquil xa balumil ―xchi.
16 Hech yu'un hech i'albat yu'un cha'vo' oxvo' ti fariseoetique:
―Mu'yuc ti stojol ti Diose ti vinique ti chavale yu'un mu xchabi ti sc'ac'alil ti jcux co'ntontique ―xchiic.
Oy yan hech laj yalic:
―¡Bu c'amba hu'uc yu'un tspas avi jchop o abtel li'to ti much'u oy smule! ―xchiic.
Hech cha'tos ic'otic ti fariseoetique. 17 Hech yu'un hech laj sjac'beic yan vuelta ti ma'sate:
―Ho'ot, ¿c'usi xchi avo'nton yu'un ti much'u laj sjambot asate? ―xut.
Hech itac'av ti vinique:
―Ho'on chcal ti ja' j'alc'op yu'un ti Diose ―xchi.
18 Ti jchi'iltaque muc xch'unic ti ja' ma'sat ono'oxe. Ja'to ba yiq'uel tal ti stot sme'e ti much'u ijam xa sate, ja'to laj xch'unic ti ja' ijam xa ti sate. 19 Hech hul jac'batuc ti stot sme'e:
―¿Mi ja' avol anich'on li'to ti ma'sat ono'ox c'alal i'an ti chavalique? ¿C'u che'el ti chil xa balumil ti ora to? ―x'utat.
20 Hech itac'av ti stot sme'e:
―Ja' col jnich'on li'to, ti ma'sat c'alal i'ane. 21 Pero mu jna'tutic c'u che'el chil xa balumil. Mu jna'tutic uc ti much'u ijambat ti sate. Oy xa yo'nton. Jac'bo ava'yic. Ac'o yal stuc ―xchiic.
22 Yu'un ti hech laj yalic ti stot sme'e, yu'un ixi' yu'un ti totiletic cu'untutique. Yu'un ti totiletique xchapoj xa sc'opic ti j'ech'el mu stac' ch-och ti templo ti much'u jamal chal ti ja' ti Jcoltavaneje ti Jesuse. 23 Ja' sventail ti hech laj yalic ti stot sme'e: “Oy xa yo'nton, jac'bo ava'yic”, ti xchie.
24 Hech yu'un laj xcha'iq'uic tal ti much'u ma'sat ono'oxe. Hech hul albatuc:
―Jamal chaval ti stojol Dios ti ja' jp'ajmantal ti vinique. Ti ho'ontutique ti jna'tutic ti ja' jp'ajmantal ―xchiic.
25 Hech itac'av ti vinique:
―Mu jna' mi jp'ajmantal. Ja' no'ox jna' ti chquil xa balumil ti ora to, ti ma'satun ono'oxe ―xchi.
26 Laj xcha'jac'beic yan vuelta:
―¿C'usi laj yutot? ¿C'u che'el laj sjambot ti asate? ―xchiic.
27 Hech itac'av ti vinique:
―Laj xa calbot ava'yic. Mu xac'an xach'unic. ¿C'u yu'un chac'an chava'yic yan vuelta? ¿Mi yu'un chac'an cha'ochic ti yajchanc'op uc? ―xchi.
28 Hech yu'un lic slabanic. Hech lic yalbeic:
―Ho'oti yajchanc'opot jmulavil. Ho'ontutique yajchanc'opuntutic ti Moisese jcotoltutic. 29 Jna'tutic ti laj sc'opon ti Moisese ti Diose. Ti much'u chavale mu jna'tutic bu liquem tal ―xchiic.
30 Hech itac'av ti vinique:
―Xch'ay co'nton xca'i ti mu xana' bu taleme. Ja' laj sjambun jsat chavil. 31 Ti jna'tic ti mu stsacbe sc'op jmulaviletic ti Diose. Ti much'u chi' ti Diose, ti tspasbe ti c'usi tsc'an ti yo'ntone, ja' tstsacbat sc'op yu'un ti Diose. 32 C'alal ilic ti balumile asta ti ora to mu'yuc much'u hech a'ibil sc'opilal ti xu' tsjambe sat ti much'u ma'sat c'alal i'ane. 33 Ti manchuc loq'uem tal ti stojol ti Diose ti much'u chcale, mu xu' yu'un spas ti hechuque ―xchi.
34 Hech lic yalbeic:
―¡Bu c'amba achanubtasuntutic ho'ontutique! Yu'un pucujot ono'oxe, hech yu'un ti ma'sat c'alal na'ane ―x'utat.
Hech i'albat ti j'ech'el mu stac' ch-och ti templo.
Ja' sc'opilal ma'sat chcom ti much'utic ti chojtiquinic ti Diose ti scuyojique, xchi
35 Ti Jesuse laj ya'ibe sc'opilal ti j'ech'el mu stac' ch-och ti templo ti vinique. Hech yu'un ital ti Jesuse, tal sc'opon ti vinique. Hech laj sjac'be:
―¿Mi ach'unoj ti jelaven sp'ijil ti Snich'on ti Diose? ―xchi.
36 Hech itac'av ti vinique:
―¿Much'u? tote. Ti jc'an ti jch'un ―xchi.
37 Ti Jesuse hech laj yalbe:
―Aq'uelojbe xa sat. Ho'on ti chajc'oponote ―xchi.
38 Itac'av ti vinique, hech laj yalbe:
―Chajch'unot, Cajval ―xchi. Hech lic squejan sba ti stojol ti Jesuse.
39 Ti Jesuse hech laj yalbe:
―Nital li' ti balumile, tal chapanvanucun. Tal cac'be yojtiquinic ti Diose ti much'utic tsc'an chojtiquinic ti Diose. Hech ma'sat chcomic ti much'utic ti chojtiquinic ti Diose ti scuyojique ―xchi.
40 Oy fariseoetic te xchi'inojic ti Jesuse. Laj ya'yic ti hech laj yal ti Jesuse. Hech lic sjac'beic:
―¿Mi yu'un ma'satuntutic chacuyuntutic? ―xchiic.
41 Hech itac'av ti Jesuse:
―Ti ja'uc ma'satucoxuque, mu'yuc amulic ti hechuque. Yu'un chcojtiquintutic ti Diose, xachiique, hech yu'un ja' amulic ―xchi ti Jesuse.