5
Ja' sc'opilal ti balbil hune xchi'uc ti Cajvaltique ti jun to ch'iom carnero x'elane
1 Ti Diose stsacoj ti sbats'ic'ob hun laj quil. Balbil ti hune. Ts'ibabil ti yut xchi'uc ti spat. Pac'bil ti hucub sello ti hune yu'un hech mu xtilp'uj.
2 Laj quil te oy jun totil ch'ul abat. Tsots ic'opoj, hech laj yal:
―¿Much'u xu' yu'un tstuch'be ti selloe yu'un hech tsjam ti hune? ―xchi.
3 Mu'yuc much'u xu' tsjam ti hune, mi ti vinajel, mi ti balumil, o ti much'utic chamenic xae, hech yu'un mi junuc mu'yuc much'u xu' tsq'uel.
4 Ep ni'oc' yu'un muc xtaat ti much'u xu' yu'un tsjam ti hune yu'un hech tsq'uel.
5 Hech yu'un hech lic yalbun jun ti totiletique:
―Mu me xa'oc'. Oy much'u itsal xa yu'un scotol, ja' xu' yu'un tstuch'be ti selloe, hech chjam ti hune. Ja' jun achi'il, ho'oxuc ti yelnich'onoxuc ti Israele, ja' yu'un ti jchop yu'un ti Judae. Ja' statamol ti Davide. Ja' ep yip hech chaj c'u che'el yip jti'vanej bolom hech yu'un xu' yu'un tsjam ti hune ―xiyutun.
6 Hech yu'un laj jq'uel. Te ti o'lol yo' bu nacal ti Diose joyubtabil yu'un ti chanvo'ique xchi'uc ti veinticuatro ti vo' ti totiletique laj quil oy te cotol jun to jcot ch'iom carnero x'elan. Chvinaj ti imilate icha'cuxi xa. Ja' señail ti Cajvaltique ti ch'iom carnero x'elane. Hucub ti xulube, hucp'ej ti sate. Ti hucp'ej sate ja' señail ti Ch'ul Espíritue ti huctos yich'oj sbae ti ja' itacat batel ti sjoylejal balumil.
7 Hech yu'un ti Carneroe ba stsacbe ti balbil hune ti te stsacoj ti sbats'ic'ob ti Diose.
8 C'alal laj yich' ti hun ti Carneroe, ti chanvo'ique xchi'uc ti veinticuatro ti vo' ti totiletique, lic spatan sbaic ti stojol ti Carneroe. Scotolic yich'ojic yarpaic ti totiletique. Yich'ojic uc stazaic pasbil ti c'anal taq'uin nojem ti pom. Ti pome ja' señail ti tsc'oponic Dios ti much'utic lecubtasbil xa yo'ntonic ti li' ti balumile.
9 Ach' q'uejoj laj sq'uejintaic. Hech ti sbie:
Atuc ihu' xa avu'un laj avich' ti hune.
Atuc xu' avu'un chatuch'be ti selloe.
Yu'un ho'ot laj avac' aba ti milel.
Ti ach'ich'el laj aman loq'uel ti sc'ob ti pucuje ep crixchanoetic talemic ti sjoylejal balumil ti jaylajuntos ti oyic ti balumile.
10 Laj xa avac'be yabtelic tstojobtas ti xchi'iltaque ti c'u che'el chch'ay ti smulique.
Patil to chlic ochuc ti pas mantal te ti balumil avu'un,
xchiic ti stojol.
11 Laj jq'uel yan vuelta. Laj ca'ibe sc'op ep ch'ul abatetic ti te sjoyubtaojic ti Diose xchi'uc ti chanvo'ique xchi'uc ti totiletique. Ep ti mil ti ch'ul abatetique laj quil. Mu stac' atiel.
12 Scotol tsots ic'opojic. Hech laj yalic:
Yu'un scotol itsal yu'un ti Ch'iom Carneroe, ja' ti imilate, ti cha'cuxem xae, hech yu'un ac'bil yabtel.
Ja' tspas ti mantal scotol, chu'unin scotol.
Ja' jelaven sp'ijil; scotol xu' yu'un tspas.
Stuc chch'umbat sc'op.
Stuc tspasat ti muc'.
Stuc ch-albat vocol ti stojol,
xchiic ti stojol ti Ch'iom Carneroe.
13 Laj ca'i lic c'opojuc scotol ti much'utic te oyic ti vinajele xchi'uc scotol ti much'utic li'oy ti balumile xchi'uc scotol ti much'utic ichamic li' ti balumile xchi'uc scotol ti much'utic ichamic te ti nabe, scotolic lic yalic:
Lum lec yo'nton ti Diose ti te nacal ti muc'ta naclebale xchi'uc ti Ch'iom Carneroe.
Jun yutsil ti chch'umbat sc'op sbatel osil.
Jun yutsil ti tspasat ti muc' sbatel osil.
Jun yutsil ti tspas mantal sbatel osil,
xchiic.
14 ―Jun yutsil ti hech chc'ot ti pasel ―xchiic ti chanvo'ique.
Ti veinticuatro ti vo' ti totiletique laj spatan sbaic ti stojol ti Diose. Lec ic'opojic yu'un.