8
Jaꞌ scꞌoplal ti laj yilbajin li buchꞌutic yichꞌojic ta mucꞌ li Cajvaltic li Sauloe
1 Cꞌalal iyil Saulo ti icham xa li Estebane, xmuybaj xa o. Ta ora noꞌox lic ilbajinaticuc li buchꞌutic yichꞌojic ta mucꞌ li Cajvaltic li te ta Jerusalene. La spuc sbaic batel scotolic ta Judea balumil schiꞌuc ta Samaria balumil. Jaꞌ xa noꞌox te icomic ta Jerusalén li lajchavoꞌ yajtacbalaltac li Jesuse.
2 Oy jayvoꞌ viniquetic ti lec yichꞌojic ta mucꞌ li Diose, jaꞌ ba smuquic li Estebane. Yan sba iyoqꞌuitaic.
3 Yan li Sauloe tscꞌan ta schꞌaybe scꞌoplal li scꞌop Jesús ti schꞌunojique. Iꞌoch ta naetic, la stsacan loqꞌuel viniquetic schiꞌuc antsetic, la sticꞌan ta chuquel.
Jaꞌ scꞌoplal ti iꞌalbatic scꞌop Cajvaltic li jsamariail crixchanoetique
4 Li buchꞌutic la spuc sbaic batele, buyuc noꞌox iyalic batel ti jaꞌ noꞌox chijcolutic o ta sventa li Cajvaltique.
5 Li Felipee te icꞌot ta jun jteclum te ta Samaria balumil. Cꞌot yalbe crixchanoetic ti iꞌay xa li buchꞌu tꞌujbil yuꞌun Dios sventa chiscoltautique, jaꞌ li Jesuse.
6 Li crixchanoetic li te ta jteclume la stsob sbaic scotolic yuꞌun tal yaꞌiic li cꞌustic ta xal li Felipee. Cꞌalal iyilic ti ep laj yacꞌbe ta ilel stsatsal sjuꞌel Dios li Felipee, la stsꞌean lec schiquinic li cꞌustic laj yale.
7 Yuꞌun ep icolic li buchꞌutic ochem pucuj ta yoꞌonique. Cꞌalal ilocꞌ li pucujetique, tsots iꞌavanic. Icolic nojtoc li buchꞌutic ti mu xnic jun yoc scꞌobique schiꞌuc li coxoetique.
8 Jech xmuybajic noꞌox scotolic li crixchanoetic li te ta jteclume.
9 Te oy jun vinic, Simón sbi. Jaꞌ jꞌilvanej toꞌox. Ep la sloꞌloan crixchanoetic li te ta Samaria balumile yuꞌun laj yal ti oy sjuꞌele.
10 Scotol crixchanoetic, cꞌalal ta mucꞌ ta biqꞌuit, iyaꞌiic li cꞌusi iyal li jꞌilvaneje. Xi iyalic:
―Li vinic liꞌi jaꞌ yichꞌojbe sjuꞌel li Diose ―xiic.
11 Jaꞌ xa te batem o yoꞌonic ta yaꞌiel li cꞌusi ta xal li jꞌilvaneje yuꞌun voꞌone xa caj loꞌloaticuc.
12 Pero cꞌalal iꞌalbatic yuꞌun Felipe ti ista xa scꞌacꞌalil ta xventainatic yuꞌun li Diose, schiꞌuc iꞌalbatic nojtoc ti jaꞌ Cajcoltavanejtic schiꞌuc ti jaꞌ Ajvalil cuꞌuntic li Jesucristoe, oy ep viniquetic schiꞌuc antsetic la schꞌunic. Jech iꞌacꞌbat yichꞌic joꞌ yuꞌun li Felipee.
13 Li Simone la schꞌun eꞌuc, iyichꞌ joꞌ eꞌuc, jech lic schiꞌin batel li Felipee. Cꞌalal iyil li Simón ti ep laj yacꞌbe ta ilel stsatsal sjuꞌel Dios li Felipee, toj chꞌayel o yoꞌon.
14 Cꞌalal iyaꞌiic li yajtacbalaltac Jesús li te ta Jerusalén ti la schꞌunic xa scꞌop Dios li jsamariaetique, la staquic batel ta Samaria balumil li Pedro schiꞌuc li Juane.
15 Cꞌalal icꞌotique, la scꞌoponbeic Dios ta stojol li buchꞌutic yichꞌojic xa ta mucꞌ li Cajvaltique ti acꞌo yichꞌic eꞌuc li Chꞌul Espíritue.
16 Yuꞌun muc to bu yichꞌojic li Chꞌul Espíritue, jaꞌ to noꞌox yichꞌojic joꞌ ta sventa li Cajvaltic Jesucristoe.
17 Li Pedro schiꞌuc li Juane laj yacꞌanbe scꞌob ta sjolic jujun li buchꞌutic yichꞌojic xa ta mucꞌ li Cajvaltique, jech iꞌoch ta yoꞌonic li Chꞌul Espíritue.
18 Cꞌalal iyil Simón ti laj yichꞌic li Chꞌul Espíritu li buchꞌutic yichꞌojic ta mucꞌ li Cajvaltic li cꞌalal laj yacꞌan scꞌobic li yajtacbalaltac li Jesuse, jech chac yacꞌbe taqꞌuin li yajtacbalaltac li Jesuse.
19 Xi laj yal li Simone:
―Acꞌbecun jech juꞌel eꞌuc yoꞌ jech xuꞌ ta xichꞌic li Chꞌul Espíritu li buchꞌutic ta xcacꞌbe jcꞌob ta sjolic eꞌuque ―xi.
20 Xi itacꞌav li Pedroe:
―Batan ta chꞌayel achiꞌuc la ataqꞌuine yuꞌun chanop ti stacꞌ manel li Chꞌul Espíritu li chijyacꞌbutic li Diose.
21 Li joꞌote mu xuꞌ chaꞌabtej yuꞌun li Diose. Mu aventauc yuꞌun muc bu lec tucꞌ avoꞌon ta stojol li Diose.
22 Ictao li cꞌusi chopol chanope. Cꞌopono Dios, jqꞌueltic mi chaꞌacꞌbat to perton ta scoj li cꞌusi chopol chanope.
23 Yuꞌun ta to xapas chquil li cꞌusi chopole. Oyot to ta mulil ―xut li Pedroe.
24 Itacꞌav li Simone:
―Cꞌoponbecun Dios ta jtojol yuꞌun naca me chꞌaycun o sbatel osil jech chac cꞌu chaꞌal la avalbune ―xi.
25 Cꞌalal ilaj yoꞌonic ta yalbeel li crixchanoetic scotol ti cꞌu sba yilojbeic stsatsal sjuꞌel li Diose, schiꞌuc cꞌalal ilaj yoꞌonic ta yalel li scꞌop Diose, isutic batel ta Jerusalén li Pedro schiꞌuc li Juane. Te echꞌ spuquic nojtoc li scꞌop Jesús ta jujun colonia yuꞌun li jsamariaetique.
Jaꞌ scꞌoplal ti laj yalbe scꞌop Dios jun jꞌetiopial vinic li Felipee
26 Cꞌalal ta xꞌepaj xa li buchꞌutic yichꞌojic ta mucꞌ li Cajvaltic li te ta Samariae, tal cꞌoponatuc Felipe yuꞌun jun yajꞌangel li Cajvaltique. Xi iꞌalbat:
―Batan ta xocon vinajel ta sur. Te chba anupbe sbelel li jteclum Gazae, jaꞌ li te chlic talel ta Jerusalene ―xꞌutat Felipe yuꞌun li yajꞌangel li Cajvaltique.
Li sbelel Gazae jaꞌ te xꞌechꞌ ta taqui jamaltic.
27 Ibat li Felipee. Cꞌalal ixanav batele, te la sta ta be jun jꞌetiopial vinic. Li vinique pasbil ta capón yuꞌun yichꞌoj yabtel yuꞌun li meꞌajvalil li te ta Etiopía balumile. Candace sbi li meꞌajvalile. Li vinique jaꞌ yabtel ta schabibe staqꞌuin schiꞌuc scotol li cꞌustic oy yuꞌun li meꞌajvalile. A yacꞌbe smoton Dios ta Jerusalén li vinique.
28 Isut xa ba ta slumal. Te chotol batel ta scarreta nitbil ta caaꞌ. Yacal ta sqꞌuel ba li scꞌop Dios li la stsꞌiba li Isaíase.
29 Li Felipee xi iꞌalbat ta sjol ta yoꞌon yuꞌun li Chꞌul Espíritue:
―Nopojan batel, ba chiꞌino li vinic li leꞌ tiqꞌuil batel ta scarretae ―xꞌutat.
30 Li Felipee inopoj batel li ta scarreta li vinique. Iyaꞌi ti yacal ta xapta li scꞌop Dios li la stsꞌiba li Isaías li iyal scꞌop Dios ta voꞌonee. Li Felipee jech la sjacꞌbe li vinique:
―¿Mi xavaꞌibe smelol li cꞌusi chaqꞌuele? ―xut.
31 Itacꞌav li vinique:
―Mu xcaꞌibe lec smelol yuꞌun muc buchꞌu xiyalbe caꞌi ―xi.
Iꞌiqꞌue ochel ta carreta li Felipee. La schiꞌin ba ta chotlej li vinique.
32 Li scꞌop Dios ti yacal yaptaele jech chal:
Ta xꞌaqꞌue ta milel jech chac cꞌu chaꞌal jcot chexel chij pero mu cꞌusi chal.
Jech chac cꞌu chaꞌal chexel chij ti chꞌanxi li cꞌalal ta xichꞌ locꞌbeel stsotsile,
jaꞌ noꞌox jech eꞌuc li buchꞌu chtal stojbutic li jmultique,
mu cꞌusi chal li cꞌalal ta xmilee.
33 Yan sba chichꞌ vocol yuꞌun muc bu lec noꞌox ta smeltsanbeic scꞌoplal.
Chalic noꞌox ti chbatsꞌichꞌay o scꞌoplal ta jꞌechꞌel mi la smilique,
xi chal li scꞌop Dios ti ta xapta li vinique.
34 Li Felipee jech ijacꞌbat:
―Albun caꞌi buchꞌu scꞌoplal li liꞌ tsꞌibabil comele.
¿Mi jaꞌ scꞌoplal stuc li Isaías ti laj yale, mi yan o buchꞌu scꞌoplal? ―xi.
35 Li Felipee iyal ti jaꞌ scꞌoplal li Jesuse. Lic yalbe scotol li cꞌu sba scꞌoplal li Jesuse.
36 Ixanavic batel ta be, te ijelavic ta nopol ucꞌum. Xi iyal li vinique:
―Qꞌuelavil, oy ucꞌum liꞌi. ¿Mi mu xuꞌ xavacꞌbun quichꞌ joꞌ? ―xi.
37 Itacꞌav li Felipee:
―Mi achꞌunoj ta sloqꞌuel avoꞌone, xuꞌ chavichꞌ joꞌ ―xi.
Itacꞌav li vinique:
―Jchꞌunoj ti jaꞌ Snichꞌon Dios li Jesucristoe ―xi.
38 Li vinique laj yal mantal ti acꞌo cotluc li scarretae. Iloqꞌuic, ibatic ta ucꞌum schaꞌvaꞌalic. Li Felipee laj yacꞌbe yichꞌ joꞌ li vinique.
39 Cꞌalal iloqꞌuic talel ta ucꞌume, li Felipee iꞌiqꞌue batel yuꞌun li Chꞌul Espíritu ti junic schiꞌuc li Cajvaltique. Li vinique jech noꞌox muc xil bu ibat li Felipee. Pero xmuybaj noꞌox isut batel ta slumal yuꞌun la schꞌun xa ti jaꞌ Yajcoltavanej li Cajvaltique.
40 Li Felipee te to cꞌot vinajuc ta jteclum Azoto. Te lic xanavuc batel ta yoc. Echꞌ spucbe scꞌop Jesús ta jujun jteclum te to cꞌalal icꞌot ta jteclum Cesarea.