4
1-2 Chacalbe avaꞌiic smelol li cꞌusi laj calboxuque. Jech chac cꞌu chaꞌal jun querem. Cꞌalal cuxul to li stote, iyal ti jaꞌ ta xichꞌ comel li snichꞌon li cꞌustic oy yuꞌun li cꞌalal mi ichame. Pero ta scoj ti biqꞌuit to li quereme, mu to xuꞌ ta xichꞌ, yuꞌun ta mantal to oy jech chac cꞌu chaꞌal jtunel. Jaꞌ yuꞌun isaꞌ buchꞌu ta xchabibat li snichꞌone. Iyal ti jayib jabil ta xchabibate. Cꞌalal mi itsꞌaqui li jayib jabil yaloje, chlic yichꞌbe ta venta li cꞌustic oy yuꞌun li stot li quereme. 3-5 Jaꞌ noꞌox jech eꞌuc li joꞌotique, coꞌol toꞌox schiꞌuc jtunelutic yaꞌel li cꞌalal jaꞌ toꞌox jchꞌunojtic li mantaletique, yuꞌun icaltic ti jaꞌ chijcol oe. Pero yaloj onoꞌox li Dios ti chcꞌot scꞌacꞌalil ti ta sventa li Snichꞌone chijyacꞌbutic li cꞌustic oy yuꞌune. Li cꞌalal icꞌot scꞌacꞌalil li cꞌu ora snopoj li Totile, istac talel li Snichꞌone. Cꞌalal itale, jaꞌ jech chac cꞌu chaꞌal joꞌotic yuꞌun ivocꞌ ta jun ants. Schiꞌuc jech chac cꞌu chaꞌal joꞌotic ti ta mantal oyutique yuꞌun jnopojtic ti jaꞌ chijcol o ta sventa li cꞌustic ta jpas jtuctique. Jaꞌ liscoltautic jech snichꞌnabutic xa Dios ta sventa li Cajvaltique.
Ti snichꞌnaboxuc xa li Diose, laj xa yacꞌboxuc li Chꞌul Espíritu jech chac cꞌu chaꞌal iyacꞌbe li Snichꞌone. Jaꞌ ta sventain avoꞌonic. Jaꞌ ta sventa li Chꞌul Espíritu li “Tata”, xavutic eꞌuc li Diose. Maꞌuc xa jtuneloxuc yuꞌun li mantaletique. Snichꞌnaboxuc xa li Diose. Ti snichꞌnaboxuc xa li Diose, ta onoꞌox xayacꞌbeic eꞌuc li cꞌustic oy yuꞌun ti yaloj onoꞌox ti chijyacꞌbutic ta sventa li Snichꞌone.
Jaꞌ scꞌoplal ti scꞌan ti mu xa xcacꞌ jbatic ta jtunel nojtoc yuꞌun li cꞌustic ijpastic toꞌox ta voꞌonee
Cꞌalal mu toꞌox xavojtaquinic li Diose, jaꞌ toꞌox latunic yuꞌun li cꞌustic maꞌuc Diose. Pero li avie xavojtaquinic xa li Diose. Más lec chcal ti xayojtaquinic xa li Diose. Pero ¿cꞌu chaꞌal ti jaꞌ chba achaꞌta li cꞌustic mu xcoltavane, li muꞌyuc sbalile? ¿Mi yuꞌun chaꞌochic ta yajtunel nojtoc? 10 Yuꞌun caꞌioj ti chachanbeic stalel li yan jchiꞌiltac ta israelale yuꞌun chachabiic xa cꞌustic cꞌacꞌalil, mi sliqueb jujun u, mi sliqueb jujun jabil, mi scꞌacꞌalil qꞌuin jech chac cꞌu chaꞌal ta spasique. 11 Ta xcat coꞌon avuꞌunic yuꞌun oy yicꞌal altic noꞌox ti laj calboxuc li scꞌop li Cajvaltique.
12 Li joꞌoxuc li coꞌol quichꞌojtic ta mucꞌ li Cajvaltique, ta jcꞌan ti acꞌo jechoxuc jech chac cꞌu chaꞌal li joꞌone, ti mu xa jaꞌuc tsots scꞌoplal chcaꞌi li mantaletique. Mu xa cꞌusi scꞌan chcaꞌi jech chac cꞌu chaꞌal mu cꞌusi scꞌan avuꞌunic avaꞌiic eꞌuc li cꞌalal muc toꞌox bu achꞌunojique, yuꞌun mu xanaꞌic mi oy mantal. Pero mu cꞌusi chopol apasojbecun ti jech chacalbeique, yuꞌun noꞌox la achꞌunic loꞌloel. 13 Xanaꞌic ti ta scoj ti ipun ti te lijocꞌtsaj li yoꞌ bu oyoxuque. Jaꞌ sba velta lic calboxuc ti jaꞌ noꞌox ta sventa li Cajvaltic ti chijcole. 14 Cꞌalal abol jba ta scoj ti ipune, muc bu xanaꞌlecun, muc bu xapꞌajicun. Solel avichꞌicun ta mucꞌ jech chac cꞌu chaꞌal ichꞌbil ta mucꞌ yajꞌangel li Diose. Jech chac cꞌu chaꞌal Cristo avilicun. 15 Pero li avie, ¿cꞌu chaꞌal ti mu xa jechuc avoꞌonic ta jtojole? Li joꞌone chcal ti oy cꞌusi lec chacꞌan toꞌox xapasbecune. Jnaꞌoj ti jech toꞌox avoꞌonic ti chac apits loqꞌuel asatic yoꞌ cꞌuxi chavacꞌbecun ti oyuc cꞌu xavutique. 16 Pero li avie, ¿mi jaꞌ noꞌox avilicun o ta contra ti la jpꞌijubtasoxuque?
17 Li buchꞌutic ti mu jmojuc smelol chaschanubtasic jech chac cꞌu chaꞌal chajchanubtasique, cꞌuxoxuc ta yoꞌonic yilel pero mu yuꞌunuc chascoltaic. Yuꞌun jaꞌ tscꞌanic ti acꞌo xavictauncutic yuꞌun jaꞌ tscꞌanic ichꞌel ta mucꞌ li stuquique. 18 Ti jech chcale, mu yuꞌunuc jaꞌ chopol chcaꞌi ti oy buchꞌu yan chtal schanubtasoxuque. Ti jaꞌuc sventa chatuqꞌuibic oe, lec chcaꞌi ti jechuque, yuꞌun muc bu te jchiꞌucoxuc scotol cꞌacꞌal. 19 Coꞌol schiꞌuc jnichꞌnaboxuc, toj echꞌem chquichꞌ vocol ta acojic nojtoc. Jech chac cꞌu chaꞌal jun ants ti bu chichꞌ vocol li cꞌalal ta xcuxe. Cꞌalal mi iyil ti cuxul ivocꞌ li yole, xmuybaj xa. Jaꞌ noꞌox jechun eꞌuc, muc to bu ximuybaj avuꞌunic. Jaꞌ to mi iquil ti chachꞌunic nojtoc ti jaꞌ noꞌox chacolic ta sventa li Cristoe, jaꞌ to ximuybaj avuꞌunic. 20 Ti teuc jchiꞌucoxuque, muc bu jech tsots chacalbeic ti jechuque, yuꞌun te jqꞌueloj li cꞌu sba la avoꞌonique. Ti jech tsots chacalbeic batele, yuꞌun toj yatel coꞌon avuꞌunic.
Jaꞌ scꞌoplal li cꞌusi senyail li Agar li ochem ta criaraile schiꞌuc li Sara li muc bu ochem ta criaraile
21 Joꞌoxuc ti chacꞌan chachꞌunic li smantaltac Diose, albecun caꞌi mi yuꞌun muc bu avaꞌiojic ti coꞌol schiꞌuc yajtunelutic yaꞌel li mantaletic mi jaꞌ ta jchꞌuntique. 22 Yuꞌun jech tsꞌibabil ta scꞌop Dios ti iyil chaꞌvoꞌ schꞌamal li Abrahame. Li jun quereme criarail li smeꞌe. Li june maꞌuc criarail li smeꞌe. 23 Ti jech iyil yol li buchꞌu ochem ta criaraile, jaꞌ li Agare, jaꞌ ispasic li cꞌusi iscꞌan stuquique. Yan li buchꞌu muc bu ochem ta criaraile, jaꞌ li Sarae, iyil yol ta sventa ti yuꞌun jech yaloj li Diose. 24-25 Li chaꞌvoꞌ antsetique jaꞌ senyail li cꞌusi iyal chaꞌchop li Diose, jaꞌ li iyalbe li Abrahame schiꞌuc li iyalbe li Moisese. Li Agar li ochem ta criaraile, jaꞌ senyail li smantal Dios li iꞌalbat li Moisés li te ta vits Sinaie, yuꞌun coꞌol schiꞌuc yajtunelutic yaꞌel li mantaletique. Li snitilultac li Agare, Agar iyacꞌbeic sbi li vits Sinaí li te ta Arabia balumile. Li jchiꞌiltac ta israelal li te to ta xcꞌotilanic ta mucꞌta chꞌulna ta Jerusalene, jaꞌ yalabtac Agar yaꞌel, yuꞌun coꞌol schiꞌuc ochemic ta jtunel ta scoj ti yacꞌojbeic yipal schꞌunel li smantaltac Diose. 26 Li joꞌotique jaꞌ xa jmeꞌtic yaꞌel li Sara li muc bu ochem ta criaraile yuꞌun maꞌuc xa yajtunelutic li mantaletique. Jaꞌ xa jteclumaltic li achꞌ Jerusalén li te oy ta vinajele. 27 Yuꞌun jech tsꞌibabil ta scꞌop li Diose:
Li jteclum Jerusalene, acꞌo mi ta jchꞌaybe yajval,
pero ta tsꞌacale más ep ta xquicꞌbe talel yajval.
Li yajval li ta xquicꞌbe talele naca jaꞌ sventa li achꞌ Jerusalene.
Yan li Jerusalén li liꞌ ta balumile mu tsotsuc scꞌoplal chcom,
xi tsꞌibabil.
28 Li joꞌotic li quichꞌojtic ta mucꞌ li Cajvaltique, coꞌolutic xa jech chac cꞌu chaꞌal li Isaac ti ta smantal Dios ivoqꞌue, yuꞌun yaloj onoꞌox Dios eꞌuc ti chijꞌochutic ta snichꞌnabe. 29 Li Ismael li ivocꞌ ta sventa ispasic li cꞌusi la scꞌan stuquic li stot smeꞌe, iyilbajin li Isaac li ivocꞌ ta sventa li Chꞌul Espíritue. Jaꞌ noꞌox jech li avie, muc bu lec chijyilutic li buchꞌutic ta snopic ti jaꞌ ta xcolic o ta sventa li cꞌustic tspasic li stuquique. 30 Pero jech tsꞌibabil ta scꞌop li Diose: “Nutso batel schiꞌuc yol li buchꞌu ochem ta criaraile, yuꞌun mu xuꞌ ta xichꞌbe comel li cꞌustic oy yuꞌun li stote. Jaꞌ ta xichꞌ comel li yol li buchꞌu muc bu ochem ta criaraile”, xi tsꞌibabil. 31 Li joꞌotic li quichꞌojtic ta mucꞌ li Cajvaltique, maꞌuc yolutic li buchꞌu ochem ta criaraile; jaꞌ yolutic yaꞌel li buchꞌu muc bu ochem ta criaraile. Jaꞌ yuꞌun albil onoꞌox ti joꞌotic chijꞌacꞌbat li cꞌustic oy yuꞌun li Diose.