13
Jaꞌ scꞌoplal ti persa acꞌo quictatic li cꞌustic chopol ta jpastique
1 Ta scꞌacꞌalil noꞌox li cꞌalal te to stsoboj sbaique, oy buchꞌutic laj yalbeic Jesús li cꞌu sba imile jayvoꞌ jꞌisraeletic li liquemic talel ta Galileae. Jaꞌ li iꞌaqꞌueic ta milel yuꞌun Pilato li te ta yamaqꞌuil li mucꞌta chꞌulna li ta Jerusalén li cꞌalal jaꞌ o te yacal ta smilbeic smoton li Diose.
2 Li Jesuse jech laj yalbe:
―¿Mi chanopic ti muꞌyuc yan jchiꞌiltic ta Galilea ta voꞌone schiꞌuc cꞌalal to tana ti más ep smulic jech chac cꞌu chaꞌal más ep smulic ti avalojic li jchiꞌiltactic li imileic chavalique?
3 Chacalbeic, mu jechuc li cꞌusi chanopique. Coꞌol onoꞌox chachꞌayic o sbatel osil mi mu xavictaic eꞌuc li cꞌustic chopol chapasique.
4 Li vaxaclajunvoꞌ ti ichamic li cꞌalal ijin yalel li na sventa qꞌuelob osil li te ta nopol stanqueal joꞌ Siloee, ¿mi chanopic ti muꞌyuc yan jchiꞌiltic ta Jerusalén ta voꞌone schiꞌuc cꞌalal to tana ti más ep smulic jech chac cꞌu chaꞌal más ep smulic ti avalojic li jchiꞌiltactic li ichamique?
5 Chacalbeic, muc bu jech li cꞌusi chanopique. Coꞌol onoꞌox chachꞌayic o sbatel osil mi mu xavictaic eꞌuc li cꞌustic chopol chapasique ―xꞌutatic yuꞌun li Jesuse.
Jaꞌ scꞌoplal ti laj yal Jesús ti tsta scꞌacꞌalil ti mu xcꞌanatic o yuꞌun Dios li jꞌisraeletic mi mu schꞌunique
6 Li Jesuse la scoꞌoltajes jech chac cꞌu chaꞌal jtecꞌ higo li jꞌisraeletique. Jech laj yal:
―Oy jun vinic stsꞌunoj jtecꞌ higo ta tsꞌunbaltic. Tsꞌacal to ba sqꞌuel mi oy sat li teꞌel higo ti stsꞌunoje pero muꞌyuc sat ista.
7 Jech laj yalbe li yajchabiejtsꞌusube: “Li teꞌel higo liꞌi yoxibal xa jabil liꞌ chtal jqꞌuelulan mi ta satine, pero mu snaꞌ satin. Jaꞌ lec tsꞌeto, yuꞌun altic liꞌ smacoj balumile”, xut.
8 Itacꞌav li yajchabiejtsꞌusube: “Cajval, liꞌ to oyuc junuc jabile. Ta jlocbe lec sjoyobal li yoque. Ta xcacꞌbe lec syaxal.
9 Mi jech ta jpase, ta nan xlic satinuc. Mi mu satine, jaꞌ to xuꞌ ta xichꞌ tsꞌetel”, xi li yajchabiejtsꞌusube ―xi li Jesuse.
Jaꞌ scꞌoplal ti la scolta jun ants Jesús li ta scꞌacꞌalil ta xcuxique
10 Ta yan o cꞌacꞌal ichanubtasvan Jesús ta yut jun chꞌulna. Jaꞌ scꞌacꞌalil o ta xcuxic li jꞌisraeletique.
11 Te oy jun ants vaxaclajuneb (18) xa jabil tsacbil ta chamel yuꞌun isocbat sbaquil yuꞌun pucuj. Xpatpun chanav, mu xuꞌ stuqꞌuibtas sba.
12 Li Jesuse iyil li antse, laj yicꞌ talel ta stojol. Jech laj yalbe:
―Yaa, chacol ―xut.
13 Li Jesuse laj yacꞌbe scꞌob ta sba li antse, ituqꞌuib ta ora li sbaquile, lic yal coliyal Dios.
14 Li banquilal li te ta chꞌulnae iꞌilin li cꞌalal icoltavan Jesús ta scꞌacꞌalil ta xcuxique. Jech lic yalbe li schiꞌiltaque:
―Oy vaquib cꞌacꞌal xuꞌ chijꞌabtejutic. Ta scꞌacꞌalil ti xuꞌ chijꞌabtejutique jaꞌ o xatalic mi chacꞌanic coltaele. Mu me xatalic li ta scꞌacꞌalil ta jcuxtique ―xut.
15 Itacꞌav li Cajvaltique:
―Jloꞌlovanejoxuc. Li jujunoxuque ¿mi mu xajitun batel avacax, mi acaaꞌ cꞌusi, ta scꞌacꞌalil ta jcuxtic yoꞌ acꞌo ba yuchꞌic joꞌ?
16 Li ants liꞌi ti svaxaclajunebal xa jabil tsacbil ta chamel yuꞌun li Satanase, jaꞌ jchiꞌiltic, pero chopol avaꞌiic ti ijcolta ta scꞌacꞌalil ta jcuxtique ―xꞌutatic yuꞌun li Jesuse.
17 Cꞌalal jech laj yal li Jesuse, iqꞌuexavic scotol li buchꞌutic chopol chilic li Jesuse. Pero ep crixchanoetic xmuybajic noꞌox yuꞌun iyilic ti toj lec scotol li cꞌustic la spas li Jesuse.
Jaꞌ loꞌil sventa becꞌ mustasa
(Mt. 13.31–32; Mr. 4.30–32)
18 Li Jesuse jech laj yal jun loꞌil:
―Chacalbeic li cꞌu sba ta sventainan crixchanoetic li Diose.
19 Acꞌo mi muc bu ep li buchꞌutic ta xventainatic li avie pero ta tsꞌacale ta xꞌepaj. Jaꞌ jech chac cꞌu chaꞌal li becꞌ mustasa ti la stsꞌun ta yosil jun vinique ti toyol ibate. Laj yacꞌ ep scꞌob. Ital mutetic, la spas stasic ta scꞌobtac ―xi li Jesuse.
Jaꞌ loꞌil sventa svochesobil pan
(Mt. 13.33)
20 Laj yal yan loꞌil li Jesuse. Jech laj yal:
―Chacalbeic li cꞌu sba ta sventainan crixchanoetic li Diose.
21 Oy lec stsatsal jech chac cꞌu chaꞌal svochesobil pan. Li jucub cuartia harinae, manchuc mi jutuc noꞌox chacꞌbe scap li antse, pero lec ta xvoch o spꞌejel ―xi li Jesuse.
Jaꞌ scꞌoplal ti laj yal Jesús ti jaꞌ biqꞌuit li sbelel vinajele
(Mt. 7.13–14, 21–23)
22 Li Jesuse ixanavic batel ta be schiꞌuc yajchanbalajeltac yuꞌun ta xbatic ta Jerusalén. Echꞌ chanubtasvanuc ta scotol jteclumetic schiꞌuc ta coloniaetic li bu ijelave.
23 Oy buchꞌu jech la sjacꞌ:
―Cajval, ¿mi atbil noꞌox li buchꞌutic ta xcolique? ―xi.
Itacꞌav li Jesuse:
24 ―Jaꞌ biqꞌuit li sbelel li cuxlejal sventa sbatel osile. Ep li buchꞌutic tscꞌan tstamique pero chacalbeic ti mu xuꞌ yuꞌunique. Yuꞌun jaꞌ noꞌox xuꞌ ta stamic li buchꞌutic ta sbicꞌtajes sbaic ta stojol li Diose. Jaꞌ yuꞌun bicꞌtajeso me abaic.
25 Jech chac cꞌu chaꞌal mi la smac xa tiꞌna li yajval nae, mi tsꞌacal to chtal atijic li tiꞌnae, jech chavalbeic: “Cajval, Cajval, jambuncutic li tiꞌnae”, xavutic. Pero jech chayalbeic li yajval nae: “Maꞌuc jnichꞌnaboxuc”, xayutic.
26 Jech chavalbeic: “La jchiꞌinotcutic ta veꞌel, la achanubtasuncutic ta jteclumalcutic”, xavutic.
27 Jech chayalbeic: “Laj calboxuc xa ti maꞌuc jnichꞌnaboxuque. Batanic, mu xajcꞌanic yuꞌun naca chopol li cꞌustic la apasique”, xayutic.
28-29 Chavilic ti te xa ochemic li yoꞌ bu ta spas mantal Dios li jtotic jmeꞌtic ta voꞌonee, jaꞌ li Abrahame, schiꞌuc li Isaaque, schiꞌuc li Jacove, schiꞌuc scotol li buchꞌutic iyalic scꞌop Dios ta voꞌonee, schiꞌuc ep jyanlum crixchanoetic li liquemic talel ta spꞌejel balumile. Xmuybajic noꞌox. Li joꞌoxuque te xaꞌoqꞌueletic o, te xcꞌuxuxet o aveic ta scoj ti mu xa xuꞌ chaꞌochique.
30 Aꞌiic, oy buchꞌutic itsꞌinal ta xꞌileic li avie, jaꞌ banquilal chcomic yuꞌun la sbicꞌtajes sbaic. Pero oy buchꞌutic banquilal spꞌisoj sbaic li avie, jaꞌ itsꞌinal chcomic yuꞌun la stoy sbaic ―xi li Jesuse.
Jaꞌ scꞌoplal ti laj yat yoꞌon Jesús ta scoj ti muc bu schꞌunic li buchꞌutic te nacalic ta Jerusalene
(Mt. 23.37–39)
31 Ital ta ora jayvoꞌ jfariseoetic. Jech laj yalbeic li Jesuse:
―Locꞌan batel yuꞌun chac smilot li Herodese ―xutic.
32 Li Jesuse jech laj yalbe:
―Li Herodese jaꞌ jech chac cꞌu chaꞌal jcot vet yuꞌun chtiꞌvan yaꞌel. Batanic, jech xcꞌot avalbeic: “Li avie schiꞌuc ocꞌobe ta to jloqꞌues pucujetic, ta to jcolta jchamelajeletic. Chaꞌej ta xlaj coꞌon.
33 Persa chixanav batel li avie schiꞌuc ocꞌob chaꞌej. Yuꞌun te chimile ta Jerusalén jech chac cꞌu chaꞌal te imileic li buchꞌutic yan iyalic scꞌop Diose, xijyutcutic talel”, utic cꞌotel.
34 ’Joꞌoxuc schiꞌuc scotol la achiꞌiltac li te ta Jerusalene, atalelic o ti chamilic li buchꞌutic chalic li scꞌop Diose. Chavacꞌbeic ton li buchꞌutic tacbilic talel yuꞌun Dios liꞌ ta atojolique. Pero ep xa ta velta la jcꞌan jtsoboxuc jech chac cꞌu chaꞌal ta stsob yol ta yolon xicꞌ jcot meꞌcaxlane, pero mu xacꞌanic.
35 Aꞌiic, toj abol abaic chacomic. Muc xa bu liꞌ achiꞌuquic li Diose. Jech chacalbeic, muc xa bu chavilicun o. Jaꞌ to mi icꞌot scꞌacꞌalil ti jech chavalique: “Toj lec li buchꞌu tacbil talel yuꞌun li Cajvaltic Diose”, mi xachiique, jaꞌ to chavilicun nojtoc ―xꞌutatic yuꞌun li Jesuse.