7
Jaꞌ scꞌoplal ti iꞌacꞌbatic seyoal stiꞌbaic chanib svaxacvinic ta mil li jꞌisraeletique
Ta tsꞌacal iquil chanvoꞌ chꞌul ángeletic te vaꞌalic ta schanjotol schiquin li balumile. Jaꞌ spajesojic li icꞌ ta schanjotol schiquin li balumile yoꞌ jech mu xtal icꞌ liꞌ ta balumile schiꞌuc li ta nabe. Schiꞌuc maꞌuc jtecꞌ teꞌ chnic. Iquil ilocꞌ talel ta sloqꞌueb cꞌacꞌal otro jun chꞌul ángel, jaꞌ yichꞌoj li seyo yuꞌun li cuxul Diose. Tsots laj yapta li chanvoꞌ schiꞌiltac li te vaꞌalic ta schanjotol schiquin li balumile, ti acꞌbil tsots yabtelic yoꞌ ta soquesic li balumil schiꞌuc li nabe. Jech laj yalbe:
―Mu to me xasoquic li balumile, schiꞌuc li nabe, schiꞌuc li teꞌetique. Jaꞌ to mi laj cacꞌbe seyoal stiꞌbaic scotolic li buchꞌutic ta spasic li cꞌustic ta scꞌan li Dios cuꞌuntique, jaꞌ to xuꞌ chasoquic ―xꞌutatic.
Icaꞌi ti cꞌu yepal iꞌacꞌbatic seyoal li stiꞌbaique, jaꞌ chanib svaxacvinic ta mil (144,000). Naca jchiꞌiltac ta israelal scotolic. Li jchop li liquemic ta jtot jmeꞌcutic Judá ta voꞌonee lajchamil laj yichꞌ seyoal stiꞌbaic. Li jchop li liquemic ta jtot jmeꞌcutic Rubén ta voꞌonee lajchamil laj yichꞌic eꞌuc. Li jchop li liquemic ta jtot jmeꞌcutic Gad ta voꞌonee lajchamil laj yichꞌic eꞌuc. Li jchop li liquemic ta jtot jmeꞌcutic Aser ta voꞌonee lajchamil laj yichꞌic eꞌuc. Li jchop li liquemic ta jtot jmeꞌcutic Neftalí ta voꞌonee lajchamil laj yichꞌic eꞌuc. Li jchop li liquemic ta jtot jmeꞌcutic Manasés ta voꞌonee lajchamil laj yichꞌic eꞌuc. Li jchop li liquemic ta jtot jmeꞌcutic Simeón ta voꞌonee lajchamil laj yichꞌic eꞌuc. Li jchop li liquemic ta jtot jmeꞌcutic Leví ta voꞌonee lajchamil laj yichꞌic eꞌuc. Li jchop li liquemic ta jtot jmeꞌcutic Isacar ta voꞌonee lajchamil laj yichꞌic eꞌuc. Li jchop li liquemic ta jtot jmeꞌcutic Zabulón ta voꞌonee lajchamil laj yichꞌic eꞌuc. Li jchop li liquemic ta jtot jmeꞌcutic José ta voꞌonee lajchamil laj yichꞌic eꞌuc. Li jchop li liquemic ta jtot jmeꞌcutic Benjamín ta voꞌonee lajchamil laj yichꞌic eꞌuc.
Jaꞌ scꞌoplal li ep ta chop crixchanoetic tucꞌ yoꞌonic iyil li Juane
Ta tsꞌacal iquil epal crixchanoetic ti liquemic ta ep ta chop crixchanoetic ta spꞌejel li balumile. Mu xlaj ta atel. Te vaꞌalic ta stojol Dios schiꞌuc ta stojol li chexel chije. Naca sac scꞌuꞌic slapoj scotolic, jaꞌ svinajeb ti tucꞌ o yoꞌonic sbatel osile. Schiꞌuc stsacanojic yanal xan. 10 Scotolic tsots icꞌopojic, xi laj yalic:
Ti lijcolutic xae, jaꞌ ta sventa li Dios cuꞌuntic li liꞌ chotol ta mucꞌ ta chotlebale, schiꞌuc ta sventa li chexel chije,
xiic. 11 Scotol li chꞌul ángeletic li te joyolic ta stojol li Diose, schiꞌuc li chanib schaꞌvinic banquilaletique, schiꞌuc li chanvoꞌique, la spatan sbaic ta stojol li Dios li te chotole, laj yichꞌic ta mucꞌ. 12 Xi laj yalic:
Toj lec ti jech icꞌot ta pasele.
Jaꞌ jcꞌuxubinvanej li Diose.
Toj echꞌem slequilal, echꞌem schꞌulpꞌijil.
Stuc noꞌox ta xꞌalbat coliyal.
Ichꞌbil ta mucꞌ.
Echꞌem stsatsal.
Jaꞌ ta spas mantal sbatel osil.
Toj lec ti jech ta xcꞌot ta pasele, xiic.
13 Jech lisjacꞌbe jun li banquilaletique:
―¿Mi xanaꞌ buchꞌutic li liꞌ oyic li naca sac scꞌuꞌ slapojique? ¿Mi xanaꞌ bu liquemic talel? ―xiyut.
14 La jtacꞌbe:
―Tata, mu jnaꞌ. Joꞌot xanaꞌ atuc ―xcut.
Jech liyalbe nojtoc:
―Leꞌe jaꞌ li buchꞌutic ti imileic ta scoj li ep cꞌustic chopol li liquem li te ta balumile. Yuꞌun ischꞌunic ti jaꞌ ichꞌaybat o smulic yuꞌun li chexel chije, jaꞌ yuꞌun muꞌyuc xa smulic o. Jaꞌ senyail ti sac scꞌuꞌ slapojique. 15 Jech liꞌ oyic o ta stojol li Diose. Cꞌacꞌal acꞌubal liꞌ ta xtuneic yuꞌun li Diose. Jaꞌ chiꞌinbilic o yuꞌun li Diose. 16 Mu xa xviꞌnajic, mu xa xtaquij stiꞌic, muꞌyuc xa cꞌacꞌal chaꞌiic, mu xa bu chchiqꞌuinic. 17 Yuꞌun jaꞌ chabibilic o yuꞌun li chexel chij li te oy ta oꞌlol li yoꞌ bu chotol li Diose, jech xmuybajic noꞌox sbatel osil yuꞌun acꞌbilic xa scotol. Ta scusbat yaꞌlel satic yuꞌun li Diose jech mu xa xꞌoqꞌuic o ―xiyut li jun banquilale.