5
Ti cꞌu sꞌelan ta pasel ta stojol ti jchꞌunolajeletique
1 Mu me xajajanta ti buchꞌu mol xae. Lecuc noꞌox xavalbe ti cꞌusi scꞌan pasele. Biso jech chac cꞌu chaꞌal junuc atot. Jaꞌ jech xtoc ti querem viniquetique, biso jech chac cꞌu chaꞌal junuc achiꞌil ta voqꞌuel.
2 Jaꞌ jech xtoc ti yayiletique, biso jech chac cꞌu chaꞌal junuc ameꞌ. Jaꞌ jech xtoc ti tsebetique, tucꞌuc me ajol ta stojol. Biso jech chac cꞌu chaꞌal junuc achiꞌil ta voqꞌuel.
3 Coltao me xtoc ti meꞌlal antsetic ti buchꞌu muꞌyuc cꞌusi xꞌayan yuꞌunic ta melele.
4 Pero mi jaꞌ jun meꞌlal ants ti oy yalabtaque, ti oy smamabtaque, acꞌo spaquic sutel ti cꞌu sꞌelan laj yichꞌic cꞌuxubinel yuꞌun ti stot smeꞌique, yoꞌ tey ta xchanic talel ti cꞌuxubinvaneje. Ti mi jech ta spasique, lec ta xꞌilatic yuꞌun ti Diose.
5 Yan ti meꞌlal ants ti solel stuc icom ta jꞌechꞌele, ti spatoj yoꞌnton xtoc ta stojol ti Diose, ti ta sta ta cꞌoponel cꞌacꞌal acꞌobale, jaꞌ me scꞌan cꞌuxubinel taje.
6 Pero ti jun meꞌlal ants ti ta spas ti cꞌusi ta scꞌan ti yoꞌntone, coꞌol sꞌelan chamem manchuc mu cuxul to. Ti buchꞌu jech taje, mu xacꞌuxubinic.
7 Ti vaꞌi sꞌelan ta xcalbot liꞌe, jaꞌ me jech xavalbe yaꞌiic ti jchꞌunolajeletique, yoꞌ jech mu xchopol-cꞌoptaatic yuꞌun ti cristianoetique.
8 Yuꞌun ti buchꞌu mu xcꞌuxubin ti yuts yalale, jaꞌ jech xtoc ti mu xcꞌuxubin ti tey ta yut snae ti cꞌalal más tsots scꞌoplal scꞌan cꞌuxubinele, ti buchꞌu jech taje, jecheꞌ ta xal ti xchꞌunoj ti Cajvaltique. Jaꞌ más to lec ti buchꞌu maꞌuc jchꞌunolajele.
9 Jaꞌ noꞌox me tsacbo ta vun sbiic ti meꞌlal antsetic ti buchꞌutic yichojic más ta oxvinic (60) jabile. Pero jaꞌ noꞌox ti buchꞌutic laj xcꞌuxubin sbaic lec schiꞌuc ti anima smalale.
10 Ta scꞌan ti ojtiquinbilic lec xtoc ti cꞌusi laj spasique, mi lec laj stsꞌites ti yalabique, mi lec xmuyubaj yoꞌntonic yuꞌun ti yuloꞌ ti ta xcꞌot ta snae, mi oy laj yacꞌ sbaic ta tunel yuꞌun ti jchꞌunolajeletique, mi laj scolta ti buchꞌu ta xichꞌ svocole, mi oy yan ti cꞌusi lec laj spasique, jaꞌ xatsacbe ta vun sbiic taje.
11 Pero ti tsebal meꞌlal antsetique, mu xatsacbe ta vun sbiic. Yuꞌun yicꞌal ti ta to xmalij yaꞌiique. Tey ta xchꞌay ta yoꞌntonic ti oy cꞌusi laj yal ta stojol ti Cristoe.
12 Jaꞌ yuꞌun un, ta sta smulic ti muꞌyuc ta xcꞌot ta pasel yuꞌunic ti laj yalic ti ta xacꞌ sbaic ta tunele.
13 Yuꞌun ti mi jaꞌ noꞌox ta spasic ti bu xvaꞌvunet ta naetique, tey xlic chꞌajubicuc. Jaꞌ jech xtoc ta xjoybijic ta jbolesejcꞌopetic. Pero maꞌuc noꞌox ti ta xchꞌajubique, yuꞌun tey chba sticꞌ sbaic ti bu mu sventaicuque. Muꞌyuc smelol ti cꞌusiuc noꞌox ta sbol alic batele.
14 Jech o xal un, ta jcꞌan ti acꞌo malijicuc ti tsebal meꞌlal antsetique, ti acꞌo cꞌoticuc ta yajval nae. Acꞌo stsꞌites ti yolique, yoꞌ jech mu xquichꞌtic labanel yuꞌun ti jcrontatique.
15 Yuꞌun oy jlom meꞌlal antsetic laj xa xchꞌac sbaic. Yuꞌun jaꞌ laj xa stsꞌacliic batel ti totil pucuje.
16 Mi oy jchꞌunolajeletic, mi vinic o mi ants, ti oy meꞌlal ants yuꞌunique, acꞌo me scoltaic. Mu me xacꞌbe sbain ti jchꞌunolajeletique, yoꞌ jech ti stuquique xuꞌ ta scoltaic ti yan meꞌlal antsetic ti buchꞌutic muꞌyuc cꞌusi xꞌayan yuꞌunique.
17 Ti ancianoetic ti lec ta sventainic ti jchꞌunolajeletique, scꞌan ti ichꞌbiluc ta muqꞌue. Pero jaꞌ más tsots scꞌoplal ti ancianoetic ti buchꞌutic yabtelinojic o ta xcholel ti scꞌop Diose, ti ta xchanubtasvanique.
18 Yuꞌun ta xal ti scꞌop Diose: “Mu xavacꞌbe svosal ti jmaj-trigo vacaxe”, xi. Jaꞌ jech xtoc ta xal: “Ti jꞌabtele tsots scꞌoplal ta xichꞌ ti stojole”, xi.
19 Mi ta xticꞌbat smul ti jun ancianoe, mu xachꞌun ta ora. Jaꞌ to xachꞌun ti mi oy chib oxib rextigoe.
20 Mi ta xvinaj ti oy smule, vulic ta sba ta sat ti jchꞌunolajeletique, yoꞌ jech ta xiꞌic ti yane.
21 Ta jcꞌubanbot ta sba ta sat ti Diose, ti Cajvaltic Jesucristoe, schiꞌuc ti yajꞌángeltac ti tꞌujbilic yuꞌune, jech me xapas o batel ti cꞌu sꞌelan laj calbote. Mu me jeltosuc avoꞌnton. Parejo xapas ta stojol ti jchꞌunolajeletique.
22 Mu me ta orauc noꞌox ta xavaꞌan ti buchꞌutic ta xꞌochic ta anciano yuꞌun ti jchꞌunolajeletique, naca mi amaquibe smul ti mi chopol ta xbat yuꞌunique. Qꞌuelo me aba yoꞌ jech mu xcꞌot ta pasel ti chopole.
23 Ti jech loqꞌuel ta xaꞌipaj yuꞌun ti achꞌute, mu me stucuc noꞌox voꞌ xavuchꞌilan. Uchꞌan jutebuc vino xtoc.
24 Oy smulic jlom cristiano ti lec xvinaj ta qꞌuelel ti cꞌalal mu to ta xchapanatique. Pero oy jlom ti mu xvinaj ti smulique. Tsꞌacal to ta xvinaj.
25 Jaꞌ noꞌox jech xtoc ti buchꞌu lec ti cꞌusi ta spase, lec xvinaj ta qꞌuelel. Pero oy jlom mu xvinaj ta ora. Pero mu onoꞌox teyuc mucul ta xcom o.