3
C'alal mu xa xcuch cu'un ti ep xa c'ac'al muc xca'i c'u xa'elanique, jech laj jnop ti xu' jtuc tey chicom ta lum Aténase. Jech la jtac tal li quermanotic Timoteoe yu'un ja' yajtunel Dios ec. Ja' jchi'il jbacutic ta xcholel ti ja' no'ox chijcol ta sventa Cristoe. La jtac tal ta atojolic yu'un tal stsatsubtasboxuc avo'ntonic ta stojol li Cajvaltique. Yu'un jech mu xchibaj avo'ntonic ta stojol Cajvaltic ta sventa ti oy vocol chava'yique. Xana'ic ti ta persa ono'ox ta xquich'tic ep vocole. Yu'un c'alal tey to'ox oyuncutique, laj ono'ox calcutic ti ta ono'ox jtatic vocole. Xana'ic xa ti ta melel ta jtatic vocole yu'un ic'ot xa ta pasel ta atojolic. Jech c'alal ep xa c'ac'al muc xca'i c'u xa'elanique, la jtac tal ta ora li Timoteoe yu'un chac ca'i ca'i me yoquel to lec ach'unojic. Yu'un naca me oy la xchibajesboxuc avo'ntonic li pucuje, yu'un stalel ono'ox ta sq'uel c'u x'elan co'ntontic. Yu'un me la slo'laoxuc li pucuje, altic ti li'abtejcutic ta atojolique.
Pero li' ta orae laj xa ca'icutic ti c'u xa'elanique yu'un isut xa tal li Timoteoe. Xcuxet no'ox co'ntoncutic yu'un laj xa ca'icutic ti yoquel to lec ach'unojique, ti lec chac'anvanique. Laj yal noxtoc ti scotol c'ac'al chana'uncutique, yu'un chac aq'ueluncutic ava'yic yan velta jech chac c'u cha'al chac jq'ueloxuc ca'icutic ec li vu'uncutique. Quermanotac, toj xcuxet ic'ot co'ntoncutic c'alal laj ca'icutic ti yoquel to lec ach'unojique. Ac'o me oy vocol xchi'uc uts'intael chca'icutic, xcuxet no'ox ic'ot co'ntoncutic. C'alal laj ca'icutic ti jun avo'ntonic o ta stojol Cajvaltique, jech ipas ta jun co'ntoncutic. Yu'un toj ech'em xcuxet co'ntoncutic avu'unic ta stojol li Dios cu'untique, jech mu xlaj jtojbecutic ta vocol ta sventa ti toj lec ach'unojique. 10 Ta c'ac'al ta ac'ubal ta jc'anbecutic Dios ti ac'o xu'uc cu'uncutic chtal jq'uelotcutic yan veltae, yu'un jech xu' ta xcalcutic ava'yic ti bu sc'an to avu'unique.
11 Li Dios cu'untic ti Tati xcutique, xchi'uc li Cajvaltic Jesucristoe, ta jc'anbecutic ti ac'o yac' chtal jq'uelotcutic yan veltae. 12 Ta jc'anbecutic noxtoc Cajvaltic ti ac'o scoltaoxuque yu'un jech más chac'anan abaic acotolic. Jech más chac'anic noxtoc scotol cristianoetic jech chac c'u cha'al lec jc'anojotcutique. 13 Jech ta stsatsub avo'ntonic ta sventa li Cajvaltique, jech mu'yuc amulic chac'otic ta stojol li Dios ti Tati xcutique. Lec chayiloxuc ti c'alal chtal yic'utic li Cajvaltic Jesucristoe. Ta xchi'in yalel tal scotol li yu'untaque.