8
Ja' smelol ti ja' sventainoj Jesús li c'usi ach' la xchapan Dios sventa chijcolutic oe
1 Li c'usi más tsots sc'oplal laj calboxuc tal ava'yique, ja' ti tey xa chotol ta sbats'ic'ob Dios ta vinajel li banquilal pale cu'untique. Tey xa ich'bil ta muc'.
2 Ja' xa tey ch‑abtej ti bu mero temploe, ja' li vinajel yo' bu oy stuc li Diose. Ja' pasbil yu'un Dios, mu pasbiluc ta sc'ob cristianoetic jech chac c'u cha'al li templo yo' bu ch‑abtejic banquilal paleetic li' ta banamile.
3 Scotol li banquilal paleetique ja' yabtel chaq'uilanic ch'ich' ta stojol Dios. Jech persa laj yac' ch'ich' ec li banquilal pale cu'untic tey ta vinajele.
4 Ti li'uc oy ta banamil li Jesuse, muc x'otesat ta banquilal pale ti jechuque, yu'un oy o li boch'otic ch‑ochic ta paleal yu'un jchi'iltactic ti chaq'uilanic ch'ich' ta stojol Dios jech chac c'u cha'al chal li smantal Dios laj yal Moisese.
5 Li templo li' ta banamil yo' bu ch‑abtejic paleetique, ja' senyail li vinajele. Ta jna'tic ti ja' senyaile yu'un jech i'albat yu'un Dios li Moisese: “Jech me xameltsan jech chac c'u cha'al laj cac'bot avil senyail tey ta jolvitse”, x'utat.
6 Li banquilal pale cu'untique mu jechuc yabtel laj yich' jech chac c'u cha'al banquilal pale li' ta banamile. Ja' más lec yabtel laj yich' li Jesuse. Yu'un ja' sventainoj li c'usi ach' la xchapan Dios ti ja' sventa chijcolutic o sbatel osile.
7 Ti colcuticuc yu'un li c'usi ba'yuc la xchapan Dios ta vo'onee, mu persauc la xchapan yan ach' ti jechuque.
8 Yu'un laj yil Dios ti mu xcolic o li jmoltot jyame'tic ta vo'onee yu'un mu xch'un yu'unic li smantaltaque, ja' yu'un jech laj yal li Diose:
Ta to sta sc'ac'alil oy c'usi yan ach' ta jchapan jchi'uc amomnich'nabic,
vo'oxuc ti tey nacaloxuc ta Judá banamile xchi'uc li achi'iltac ti tey to'ox nacajtic ta Israel banamile.
9 Li c'usi ta jchapan jchi'uc amomnich'nabique mu xa co'oluc jech chac c'u cha'al la jchapan jchi'uc amoltot ayame'ic ta vo'one ti c'alal la jloq'uesic tal ta mozoil ta Egipto banamile.
Ac'o me laj yilic ti c'u x'elan la jcoltaic tale,
pero muc xch'unic li c'usitic la jchapan jchi'uque,
jech la jcomtsanic.
10 Li c'usi ta jchapan jchi'uc amomnich'nabique jech chac c'u cha'al li'i.
Ta to sta sc'ac'alil chcac'be ta yo'ntonic li jmantaltaque jech ta xch'unic.
Vu'un Diosun yu'unic chic'ot,
jech ja' cu'untac chc'otic o.
11 Me junuc mu'yuc xa boch'o chalbe sbaic ti ac'o yich'icun ta muq'ue,
yu'un scotolic xa yich'ojicun ta muc' c'alal ta muc', ta biq'uit.
12 Yu'un ta jpasbe perdón yu'un li smulique.
J'ech'el ta jch'ay o ta co'nton ti oy smulique,
xi li Diose, xi ts'ibabil.
13 Yu'un ti laj yal Dios oy c'usi yan ach' ta xchapane, yu'un ja' mu'yuc xa stu li c'usi ba'yuc la xchapane. Ti bu poco' ti mu'yuc xa stue ja' ta jcomtsantic.