10
Israel Yangan asi Kik aurin Ebitainaya
1 Yau taitaiu tutuau, yau men agogoi woninosfotai mes, ato wawat agirit on kasakasau babanai simama ato osi engon tutufin sinai kamitai sisur sirabon rebanai sigat.
2 Osi on kamitai sirabon a kasakasau babanai nan sibib ato osi bobo on nanaba sifour sinat Moses an baigibubunuotis simatar.
3 Osi engon tutufin on bayu kaitamom wabin manna God ibites on siyam,
4 a osi engon tutufin sareu kaitamom God ibites on sitoman; osi on ayubit an agim on ibituranis ibibaisis on emon on sareu sitoman ato on agim min Keriso.
5 Baise God on men iyasisir osi sabu fani engon auris, on mes osi sabu sirarabob ato usis on efan koiteterinai nan fetag fetag si’yen.
6 Atonio osi bobo simamatar on asir baiyoboen ba ot aurit, on nan ot nunuat on tanitotoren men bobo komasis tangogoien mes, men taniyamai osi wawat agirit sifofour ba tanafour mes.
7 Omi men baisigogo god wonkwafires mes, ato osi sabu fani sifofour ba; God an dura buk amonai sigayam siyau: “Sabu simair bayu sitam sitatom mes, ato simisir sikwarer sisau kuke foro asi yawas ba siyayar ato sabu bokomasotis sefofour ba.”
8 Ot men kuke foro asi yawas ba taniyayar mes, ato sabu fani sifofour ba—ato ra kaitamom amonai wat on sabu engon tutufin 23,000 nanaba on sirabob.
9 Ot God men tanrutobonai mes, ato sabu fani sifofour ba—ato mota simisir sabu engon sibogigies sirabob.
10 Ato omi men ami babadis auris gam dura fetag fetag wonikakafun mes—ato sabu fani sifofour ba—ato anea sabu asububunuotin on sabu engon iyasububunues.
11 Ato osi bobo simamatar on baiyoboen ba, ato dura buk amonai sigayam ot aurit ebitainaya, ato ot tama inat ari ra au kanfoun e’gat wera kafakakai mom innat.
12 On mes, om iyafan enonosin on efaskikin tiwag on, unkaifarem tiwag men unafeu mes!
13 Omi rutobon mamaba woboai, min on kaita nanaba on sabu fani seboai. God an aumatan dura ebikakafun on iniyamai; On arimon men inikirirem rutobon nana wonboai kwakwan mes. Baise omi rutobon wonboboai an rai on, On arimon eta iniyoboem mamaba rutobon emon wongat; onai omi arimon wonfaskikin tiwag.
Baisigogo God an Forag a Bada An Bayu
14 On mes yau tuturau au nuabo, dura wawaninai awurem, omi baisigogo god wokwakwafires on wonikirir wongat.
15 Yau on omi sabu not gigiboanotim aurim on abikakafun, toum wonigurubabanim wonitai mamaba dura bag abikakafun o ambin.
16 Ot viga baimomogin taboai God aurin tabikakaiwai on, ot Keriso an tara tatotoman on nan sabu engon mat tafasararam. Ato rafi sarar ato tabaseseb tanin on Keriso usin on sabu engon mat tafasararam.
17 Omi wonitai wonsagob on, rafi sarar kaitamom wat ato sabu sigaraba, on engon tutufin usin kaitamom Kerisoai tamatar, ato ot engon rafi sarar kaitamom on taboai.
18 Omi Israel sabu wonnosis: Osi sabu iyabon ato sirifu kemai nan sirifu sikuteten si’yam on, osi min ato sirifu kemai nan engon tutufin sinat God mat sibikaita siraram.
19 Yau min dura abifan anikakafun? Yau men aikakafun au, omi bayu ato baiyuyur nanai wokutetai on magin tani men bayu fani ba o aikakafun au, baiyuyur on god maiau?
20 Ambin, baise dura aifan abikakafun au on sabu bokomasotis asi sirifu on dau auris sekuteten, men God maiau aurin on, ato yau men agogoi omi on dau mat wonikaita bayu wonraram mes.
21 Omi on men Bada an viga wontoman ato dau mat asi viga wontoman on; omi men fofonin osi bobo ruam engon wonafour Bada an kemai a dau asi kemai nan bayu wonam on.
22 Ot mamaba tagogoi Bada taniyamai ot aurit iniyatatab mes? Ot tanonosin ot min faiwarit bag men On ba i?
Baitutumotis asi Gogoi Nanaba Sinafour
23 Sabu fani arimon sinau, “Ot on bobo engon tutufin fofonin tanafour”—baise men bobo engon tutufin on obis wat ot aurit tanafour on. “Bobo engon tutufin on fofonin tanafour”—baise men bobo engon tutufin on sabu inibaisis God sinsagobai tiwag ato On an eta on sinigibubunuai.
24 Men iyafan tani on toun an obin aurin on innuen, baise sabu fani asi obin aurin on innuen weines.
25 Omi baitotobon efanai nan masono wototobon on wonam, omi men masono aurin wonitetem mes, yabin omi ami bainonotai woinonot on masono obin o komasin,
26 omi masono wonam yabin God an dura buk amonai sigayam siyau, “Tafanamai sawar engon sen on Bada ebinoanai.”
27 Orot men baitutumotin tani inibebegim wonan an goai nan bayu am mes, ato omi wongogoi wonnanan on, bayu ato namui seyeyeinin on asir wonam mom, men wonitetem mes, yabin omi ami bainonot on masono on obin o komasin.
28 Baise iyai iyafan aurim inau, “Atonio masono on baisigogo god aurin sikutetai,” basit on men unboai unan mes, yabin ato orot iyawurem on fasinai a on an not fetag unikomasai mat—‘P9BJ250’29 Dura aifan abikakafun on men om am bainonot on baise orot tani an bainonot on aurin on abikakafun. Yau au gogoi anafour on, aibo mes sabu fani asi bainonotai on yau sinigurubabaniu?
30 Yau au bayu am mes on ainau God aurin abikakaiwai, ato aibo mes orot jever yau auriu dura komasin sebikakafun yabin yau bayu aifan am on God abikakaiwai on mes?
31 On fasinai omi bayu wam o sareu wototom o bobo aifan wofofour on, woniyamai engon God an baifain an baiduduranin aurin wat.
32 Omi ami yawas obinai wat wonama, men yawas woniyamai sabu asi baitutum aurin on inwani, mamaba osi Jew yangan o osi sabu men Jew yangan o osi God an ekalesia kuayo emon—
33 yau mat on nanaba eta au engonai afofourtobon sabu engon atiyawasis mes. Men yau tou au obin aurin anunuen on, baise sabu engon tutufin asi obin aurin anunuen, onai osi yawas sitboai mes.