LIPE ORA SIRIMU
Pe Wendo Ombá Mele Kirasini Jono Ou LIPE ORA SIRIMU Bokumu
Bokumunge Ungu Pulu Mare
I bokumu ye Jonone torumu (1:1,4,9, 22:8). Nakolo Jono temonje? Yambo aisilini pilkulie ‘I ye Jono yu Yesusini “Nanga kongonomo tenjipai.” nimbe lipe mundurumu yemanga ye Jono.’ ningu pilimele (Mateyu 10:2). Aku liemo Temane Peangamo kinie pepá yepoko kinie i bokumu kinie ye telumuni torumu.
Jonone i bokumu torumumunge ungu pulu te i sipe: Romo ye paa aili kumbine Sisamone nimbendo: “Pulu ye te molio kene nokolio yambomane pali na kapi ningu popo tangi.” nimbe ungu te nimbe panjirimu. Nakolo Juda yamboma kinie Kirasinge yamboma kinie enenga Pulu Ye telu mindi ‘Pulu Yemo’ ningu popo toko kapi ningu imbi ambolko ola linjiringimunge “Sisamo paa naa popo tomolo. Molo.” niringi. Kirasinge yambomane “Molo.” niringimunge Romo gapomanomone enenga yambo aisili mindili sipe ka sipe ene tepa kenjirimu. Jono kepe nomuna kolea kanga te lerimu akuna ka sipe panjirimu. Akuna pepalie i bokumu torumu (1:9).
Jonone pepá torumu unguma yuyu konopuni pilipelie naa torumu. Yesusini yu lipe ora sirimu uluma kanopalie pepá torumu (1:10-11). Kanu ulu kanorumumanga ulu mare olio naa molamili ou sike kamu wendo orumunje, naa pilimolo. Ulu mare sike pe wendo ombánje (1:1). Nakolo ulu mare kinie mele mare kinie kanorumu akuma sike melema molonje. Ungu ikuma perimu. Ungu paa aisili ungu iku torumu, akumanga ungu pulumu yambo marene ungu aisili kerepali nilimele.
Kurumanga nomi Setene yu sike tondolo pulimo nakolo yunge tondolomo manie purumu pumbe; Pulu Yemonga Sipisipi Walomonga tondolo olandopamo sike paa pelemo pembamo. Pulu Yemonga opa touma wendo onge, umbuni mare sike wendo ombá nakolo Yesusi sike walse omba Setene kamu kamu topa manie mundupe yunge yamboma lipe memba pumbela, yu kinie pea kamu molopo konjimulú. ‘Akumu pilkulie Kirasinge yamboma Yesusi tondolo munduku ambolko molko, ungu talo pea naa pilku, ungu sikemo munduku naa kelko, taka lelko molangi.’ nimbe pepá torumu. Ungu mare i siku kanoko pilieni: 2:10, 3:10; 2:13, 6:9; 2:14-15.
Pulu Yemo Yesusitolo kapi ningu eltenga imbi ambolko ola linjiringi ungu aisili molemola. Umbu Unguna topele tomolondo pererimulu nakolo ungu paa peangama. Paa kanokolie aku sikula elte kapi ningu imbi ambolko ola linjeyo! I unguma kanangi: 4:8,11, 5:9-10,12,13 ekendo, 7:10,12, 11:15,17-18, 12:10-12, 15:3-4, 16:5,7, 19:1,5-7.
Ungu pulu pokore boku ambolkonomonga alsena anjukundu “24. laip”, “44.3. Pulu Yemonga Sipsip Walomo” molemo.
Ya ungu pulumu pora nikimu.
1
Pe wendo ombá mele Pulu Yemone ‘Yunge kendemande yamboma piliengi!’ nimbe Yesusi Kirasi lipe ora sirimu mele inie molemo. ‘Olio piliemili.’ nimbe Yesusi Kirasi yuni yunge angellomo na yunge kendemande ye Jono molorunduna lipe mundurumu. Nane kanorundu mele pali nimbu para sikiru. Pulu Yemonga unguma kinie, Yesusi Kirasini “Pulu Yemone nilimo unguma sike unguma.” nilimo mele kinie, lipu ora sikiru.
Pe wendo ombá mele i bokuna nimbe silimo yamboma pilku molangi mele kanoko ningu singí yamboma kinie, bokuna molemo unguma konopuna monjiku pilimele yamboma kinie ene malo. Nambemuna, ulu wendo ombá nilimoma nondopa wendo ombámonga kanu yamboma ene malo.
Ene kolea Esia poropinji Kirasinge yambo talape* yepoko pakara molemelena na Jonone i pepámo topo sikiru.
We kondo kololi ulu pulumu kinie konopu pe nili ulu pulumu kinie ene kinie pepili. Ou molorumu, kinié molemo, pe ombá Pulu Yemone** aku ulu pulutolo sipili. Kanu yemo molopa koleama nokolemo koleana wendo olemele mini yepoko pakarane aku ulu pulutolo siengila.*** Yesusi Kirasi, Pulu Yemonga unguma kolo naa topa sumbi sipe nimbe silimo yemo, yambo kololime lomboroko ola molonge yambomanga yu kumbi lepa lomboropa ola molorumu yemo, ma koleana pali molemele ye nomi ailimenga ye nomimu molopa nokolemo ye nomi paa ailimu, yuni aku ulu pulutolo ene sipilila.
Olio konopu monjilimo yemo, yuni yunge meme ‘olionga’ nimbe ondo lenjirimu mememone olionga ulu pulu kerime ‘Manie pupili.’ nimbe kulu tonjipe, ‘Yunge Lapa Pulu Yemonga kongonomo tenjengi.’ nimbe ‘Olio yu kinie melema nokopo molopo, Pulu Yemo popo tonjili yamboma* molangi.’ nirimu yemo,** yunge imbimu taki taki paa ola molopa, yamboma nokomba tondolomo yu kinie kamu kamu pepa mindi pupili. Aku sipe wendo opili.
Kaname! Yu kupena molopa ombá tepa molemo.
Ombá kinie yambomane pali enenga mongone kanonge.
Yu toko konjiringi yambomane kanongela.
Yu ombá kinie
ma koleana yamboma pali kola aili teko tenge.
Sike aku sipe wendo ombá.
Aku sipe wendo ombá.
Tondoloma pali yu kinie pelemo Pulu Ye Ailimuni nimbendo: “Na ou kumbi lepo molorundu pe akilipu molombo yemo.” nikimu.* Kanu Yemo yu kinié molemo mele ou molorumu, pe ombá yemo.**
Na enenga angenu Jono, ene kinie olio Yesusinge yamboma molemolomonga mindili nombo umbuni melemolo. Mindili molo umbuni te wendo olemo kinie ‘Olio mindilime we namili.’ nimbu tondolo mundupu molopo, olio Pulu Yemo ye nomi kingimu molopa nokolemo talapena* molemolo yamboma. Na Pulu Yemonga unguma yamboma nimbu sipu, Yesusinge temanemo topo siliomonga na ka siku nomu kusana sukundu ma kanga lemo akumu ‘Kolea Patemosi’ nilimele akuna ka siku mengo oringi molio. 10 Ailimunge wale te wendo orumu kinie* Mini Kake Telimuni na molorunduna omba na ambolorumu kinie nanga bulkundu ungu tondolo te, biyukele mele, pilirindu. 11 Aku ungu nirimumuni nimbendo: “Nu mongone kanoni mele pepána tokolie Kirasinge talape yepoko pakara, Epesasi kinie Simena kinie Pekamame kinie Tayataira kinie Sadisi kinie Pilladepia kinie LLadosia kinie, aku taonomanga Kirasinge yambo talape molemelemanga pepá toko mundeni.” nirimu.
12 ‘Naene nikimunje?’ nimbu bulkundu topele topo kanorundu kinie kou gollone teli tepe llame yepoko pakara lerimu kanorundu. 13 Kanu llamema lerimu suku singine ye te angilirimu, yu mana ye none teli te,* yu ye nomi telemele mele wale pakoli sulu te pakopa kimbu aki topa, kou gollone teli kako te luwine torumu. 14 Yunge pengemo kinie penge indi pali paa kake telimu, yu kongi sipisipimenga indi kinie* kalopera kinie akutolo kake telemo mele terimu. Yunge mongotolo tepe mele tondolo pa terimu. 15 Yunge kimbutolo kou kopa tepena kalemele kinie* tondolo pa telemo mele pa terimu. Yunge ungumu no topa ungu nilimo mele ungu nirimu. 16 Yunge ki umbukundu kombukandipi yepoko pakara ambolorumu. Opa teli lou pulse ekendo ekendo pea ne nolimu yunge kerena perimu.* Enane tondolo mongo takele telemo mele yunge kumbikeremo aku sipe none terimu.
17 Nane yu kanorundu kinie na yambo kololi none telimu yunge kumbikerena sumbi sipu tamalu perindu. Kanu kinie yuni yunge ki umbukundu na ambolopalie nimbendo: “Nu pipili naa koloi. Na Kumbinemo Pe Akilipemo.* 18 Na Konde Mololimu. Ou sike kolorundu nakolo kinié na kamu konde molopo mindi pulimu molio kanumu. Na kololi ulu pulumu kinie kololi yambomanga koleamotolonga* kimu ambolio.
19 “Akumunge nu kanokono mele temanema pepána tani. Ulu kinié wendo olemoma kinie pe wendo ombá uluma kinie pepána tani. 20 Kombukandipi yepoko pakara kinie kou gollone teli tepe llame yepoko pakara kinie kanonu akuma ungu iku mele akumanga ungu pulumu i sipe: Kombukandipi yepoko pakara nanga ki umbukundu ambolondu akuma na Kirasinge yambo talape yepoko pakaranga angelloma;* tepe llame yepoko pakara akuma Kirasinge yambo talape yepoko pakara.” ⸤nirimu.⸥